ເມື່ອວັນທີ 14 ມິຖຸນາຜ່ານມາ ທີ່ສະຖານທູດໄທ ນະຄອນຫຼວງວຽງຈັນ ຄະນະມູນລະນິທິລາງວັນສົມເດັດເຈົ້າຟ້າມະຫາຈັກກຣີ ຫຼື (Princess Mahachakri Award : PMCA) ໄດ້ເດີນທາງມາຢ້ຽມຢາມຄູລາວທີ່ໄດ້ຮັບລາງວັນຈາກສົມເດັດເຈົ້າຟ້າມະຫາຈັກກຣີ ສຳລັບລາງວັນດັ່ງກ່າວແມ່ນໄດ້ເລີ່ມຈັດຕັ້ງຂຶ້ນໃນປີ 2015 ເປັນຕົ້ນມາ ຖືເປັນລາງວັນທີໃຫ້ກັບຄູຜູ້ສ້າງຄວາມປ່ຽນແປງໃຫ້ແກ່ຊີວິດນັກຮຽນ ແລະ ໃຫ້ການຊ່ວຍເຫຼືອຕໍ່ການສຶກສາໃນບັນດາປະເທດອາຊຽນ ລວມເຖິງປະເທດຕິມໍເລສເຕ.
ໃນນັ້ນ ລວມມີຄູລາວຄົນທຳອິດຄື ທ່ານ ນາງ ຄຳສ້ອຍ ວົງສຳພັນ ຈາກໂຮງຮຽນ ມສ ວຽງຈັນ ນະຄອນຫຼວງວຽງຈັນ ທ່ານທີ 2 ຄື ທ່ານ ນາງ ຄູນວິໄລ ເຄນກິຕິສັກ ຈາກໂຮງຮຽນປະຖົມທົ່ງກາງ ນະຄອນຫຼວງວຽງຈັນ ໄດ້ຮັບເມື່ອປີ 2017 ແລະ ຄູຄົນທີ່ 3 ຂອງປະເທດລາວທີ່ໄດ້ຮັບລາງວັນອັນຊົງກຽດໃນປີ 2019 ໄດ້ແກ່ ທ່ານ ນາງ ໄພສະນິດ ປັນຍາສະຫວັດ ຄູພາສາລາວ ແລະ ວັນນະຄະດີ ໂຮງຮຽນມັດທະຍົມສຶກສາສັນຕິພາບ ແຂວງຫຼວງພະບາງ ທັງນີ້ ຄະນະຕົວແທນກໍໄດ້ເດີນທາງໄປຢ້ຽມຢາມແຂວງຫຼວງພຣະບາງຊຶ່ງນຳໂດຍທ່ານ ດຣ ກິດຕິພົງ ກິລະຕິກອນ ປະທານຄະນະກຳມະການ PMCA ທ່ານ ຈັກກະພັດ ວະທາ ແລະ ທ່ານ ນາງ ເບັນຈະລັດ ນໍ້າຟ້າ ຜູ້ຈັດການຄະນະກຳມະການມູນລະນິທິ PMCA.
ລາງວັນເຈົ້າຟ້າມະຫາຈັກກຣີ ເປັນລາງວັນພຣະຣາດຊະທານລະດັບນານາຊາດ ເພື່ອເຊີດຊູກຽດຕິຍົດຄູທີ່ດີເດັ່ນໃນລະດັບການສຶກສາຂັ້ນພື້ນຖານ ອະນຸບານ ປະຖົມ ແລະ ມັດທະຍົມຂອງບັນດາປະເທດໃນອາຊຽນທັງໝົດ 11 ປະເທດ ລວມເຖິງປະເທດ ຕີມໍເລສເຕ ແລະ ກໍ່ຕັ້ງໂຄງການນີ້ຂຶ້ນມາເພື່ອເທີດພະກຽດສົມເດັດພຣະການິຖາທິລາດ ເຈົ້າກົມສົມເດັດພຣະເທບພະລັດລາດສຸດາ ສະຫຍາມບໍຣົມລາຊະກຸມາລີ ຄົບຮອບ 60 ພັນສາໃນປີ 2015 ໂຄງການແມ່ນໄດ້ຈັດຂຶ້ນທຸກໆ 2 ປີ ຊຶ່ງປີນີ້ຖືເປັນຄັ້ງທີ 3.
ສຳລັບການຄັດເລືອກເອົາຄູຜູ້ທີ່ຈະໄດ້ຮັບລາງວັນສົມເດັດເຈົ້າຟ້າມະຫາຈັກກຣີໃນແຕ່ລະປີແມ່ນຕ້ອງມີຄຸນສົມບັດເປັນຄູຜູ້ທີ່ສາມາດສ້າງຄວາມປ່ຽນແປງໃຫ້ແກ່ຊີວິດຂອງລູກສິດ ແລະ ໃຫ້ການຊ່ວຍເຫຼືອສະໜັບສະໜູນແກ່ວຽກງານການສຶກສາພາຍໃນປະເທດ ທັງນີ້ ຜູ້ທີ່ໄດ້ຮັບລາງວັນກໍຈະໄດ້ຮັບພຣະຣາດຊະທານລາງວັນຊຶ່ງປະກອບມີ ຫຼຽນລາງວັນ ປະກາສະນີຍະບັດ ຂັນລາງວັນ ແລະ ເຂັ້ມຂັດຄຳເຊີດຊູພຣະກຽດ ພ້ອມດ້ວຍເງິນລາງວັນມູນຄ່າ 10.000 ໂດລາ.
ໂດຍ: ສະຫະລັດ ວອນທິວົງໄຊ