ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ຕອບຄຳຊັກຖາມຂອງສະມາຊິກສະພາແຫ່ງຊາດຫຼາຍໆບັນຫາໃນກອງປະຊຸມສະໄໝສາມັນເທື່ອທີ 7 ສະພາແຫ່ງຊາດ ຊຸດທີ VIII ພ້ອມຍົກໃຫ້ເຫັນບັນຫາສໍ້ລາດບັງຫຼວງ ແລະ ສາມາດກວດພົບເຫັນຢູ່ສະຖາບັນການເງິນຝາກປະຍັດກະຊວງໄປສະນີໂທລະຄົມມະນາຄົມ ແລະ ການສື່ສານ (ປທສ ) ຈໍານວນ 100 ກວ່າຕື້ກີບ.
ໂດຍທ່ານນາຍົກລັດຖະມົນຕີໄດ້ກ່າວວ່າ ລັດຖະບານໄດ້ມອບໝາຍໃຫ້ອົງການກວດກາລັດຖະບານເຮັດໜ້າທີ່ກວດກາການສໍ້ລາດບັງຫຼວງ ແລະ ການກະທຳຜິດຂອງພະນັກງານຢ່າງຈິງຈັງ ຊ່ຶ່ງໃນໄລຍະຜ່ານມາຖ້າມີການລາຍງານວ່າມີການກະທຳຜິດຢູ່ບ່ອນໄດ້ກໍໄດ້ແຕ່ງຕັ້ງຄະນະລົງເກັບກຳຂໍ້ມູນ ແລະ ກວດກາ ກໍລະນີພົບເຫັນ ແລະ ມີຫຼັກຖານກໍໄດ້ປະຕິບັດວິໄນຕໍ່ພະນັກງານຕາມກົດໝາຍ ແລະ ລະບຽບການຢ່າງເຂັ້ມງວດ ຕົວຢ່າງ ໄດ້ກວດເຫັນການກະທຳຜິດຢູ່ສະຖາບັນການເງິນຝາກປະຢັດ ກະຊວງໄປສະນີໂທລະຄົມມະນາຄົມ ແລະ ການສື່ສານ ໂດຍພົບເຫັນຜົນເສຍຫາຍທັງໝົດ 100.481 ຕື້ກີບ ໃນນີ້ ໄດ້ເກັບກູ້ຄືນໄດ້ແລ້ວ 51.310 ຕື້ກວ່າກີບ ພ້ອມນີ້ ກໍໄດ້ປະຕິບັດວິໄນຕໍ່ພະນັກງານທີ່ກະທຳຜິດຕາມລະບຽບການ ໄດ້ກວດເຫັນການກະທຳຜິດຢູ່ສາງທ່ານາແລ້ງ ພົບເຫັນຜົນເສຍຫາຍທັງໝົດ 37,540 ຕື້ກີບ 42,406 ລ້ານບາດ ແລະ 107 ລ້ານກວ່າໂດລາ ສາມາດເກັບກູ້ແລ້ວ 18,507 ຕື້ກີບ ແລະ ມອບໃຫ້ພາກສ່ວນກ່ຽວຂ້ອງ ແລະ ແຂວງສືບຕໍ່ເກັບກູ້ຄືນໃຫ້ໝົດ (ໂດຍມີການຕິດຕາມຊຸກຍູ້ຂອງອົງການກວດກາລັດຖະບານ) ພ້ອມນີ້ ກໍໄດ້ປະຕິບັດວິໄນຕໍ່ພະນັກງານທີ່ກະທຳຜິດຕາມລະບຽບການ.
ການເກັບກູ້ຊັບສິນຂອງລັດຄືນດັ່ງກ່າວໃນກໍລະນີໄດ້ຄືນມາບໍ່ທັນຄົບກໍໄດ້ປະຕິບັດຫຼາຍວິທີ ເປັນຕົ້ນແມ່ນການອາຍັດຊັບສິນຂອງຜູ້ກະທຳຜິດ ແລະ ໃຫ້ທົດແທນຄືນພາຍຫຼັງທີ່ສານໄດ້ຕັດສິນຕາມກົດໝາຍ ດ້ວຍຮູບການໃຊ້ແທນດ້ວຍເງິນສົດ ພາຫະນະ ທີ່ດິນ ແລະ ຊັບສິນອື່ນໆທີ່ມີມູນຄ່າເທົ່າທຽມກັນ.
ໂດຍ: ສະຫະລັດ ວອນທິວົງໄຊ