ໃນຕອນບ່າຍວັນທີ 6 ມິຖຸນາ 2019 ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ຊີ້ແຈງຕໍ່ຂໍ້ຊັກຖາມຂອງບັນດາສະມາຊິກສະພາແຫ່ງຊາດຫຼາຍບັນຫາສຳຄັນ ໃນນັ້ນ ແມ່ນໄດ້ຊີ້ແຈງບັນຫາກ່ຽວກັບຄວາມຄືບໜ້າໃນການແກ້ໄຂບັນຫາໜີ້ສາທາລະນະ ໂດຍສະເພາະໜີ້ພາຍໃນ ແລະ ຕ່າງປະເທດ ລວມເຖິງກົນໄກໃນການແກ້ໄຂ ຊຶ່ງເປັນບັນຫາທີ່ແກ່ຍາວມາເປັນເວລາດົນ.
ໂອກາດນີ້ ທ່ານຮອງນາຍົກລັດຖະມົນຕີໄດ້ຊີ້ແຈງກ່ຽວກັບຄວາມຄືບໜ້າໃນການແກ້ໄຂບັນຫາໜີ້ສາທາລະນະ ຊຶ່ງເປັນບັນຫາທີ່ແກ່ຍາວມາເປັນເວລາດົນນານ ສົ່ງຜົນໜີ້ສິນຢູ່ໃນລະດັບສູງພໍສົມຄວນ ແນວໃດກໍຕາມ ລັດຖະບານກໍໄດ້ມີຄວາມພະຍາຍາມໃນການແກ້ໄຂຊຳລະໃຫ້ທັນຕາມກຳນົດເວລາ ສ່ວນໜີ້ໂຄງການລົງທຶນຂອງລັດຜ່ານມາກໍໄດ້ມີຫຼາຍມາດຕະການໃນການແກ້ໄຂ ດ້ວຍການອ່ວຍໜີ້ສາມແຈ ດ້ວຍການຂຶ້ນແຜນງົບປະມານປົກກະຕິເພື່ອຊຳລະໜີ້ລົງທຶນ ເຮັດໃຫ້ມີການຫຼຸດຜ່ອນໜີ້ສິນໄດ້ຈຳນວນໜຶ່ງ ພ້ອມນີ້ ກໍໄດ້ມີນະໂຍບາຍຈຳກັດການກໍ່ສ້າງໂຄງການໃໝ່ ໂຄງການທີ່ເຫັນວ່າຍັງບໍ່ທັນມີຄວາມຈຳເປັນຮີບດ່ວນ ແລະ ສຸມໃສ່ສືບຕໍ່ຈັດຕັ້ງປະຕິບັດໂຄງການທີ່ຍັງບໍ່ທັນສຳເລັດ ໂດຍໄດ້ມີການກວດກາຄືນມູນຄ່າໂຄງການທີ່ເຫັນວ່າບໍ່ສົມເຫດສົມຜົນ ຊຶ່ງໄດ້ເຮັດໃຫ້ໜີ້ສິນຫຼຸດລົງຈຳນວນໜຶ່ງແຕ່ກໍຍັງຢູ່ໃນລະດັບສູງ.
ສ່ວນມາດຕະການໜີ້ສິນຂອງຕ່າງປະເທດນັ້ນ ລັດຖະບານກໍໄດ້ພະຍາຍາມຊອກລາຍຮັບເພື່ອມາຊຳລະໃນແຕ່ລະປີ ສຳລັບການຊຳ ລະດອກເບ້ຍແມ່ນໄດ້ເອົາແຫຼ່ງທຶນພາຍໃນ ແຕ່ສຳລັບຕົ້ນທຶນແຕ່ລະໄລຍະແມ່ນຊອກຫາແຫຼ່ງດຸ່ນດ່ຽງມາຕື່ມເພື່ອຊຳລະ ທັງນີ້ ໃນປີ 2019 ລັດຖະບານຈະບໍ່ຢືມເງິນຕ່າງປະເທດມາຊຳລະດອກເບ້ຍໜີ້ ແຕ່ຈະເອົາຢູ່ພາຍໃນ ຖ້າຫາກຂາດດຸນກໍຈະລະດົມແຫຼ່ງທຶນຈາກພາຍໃນດ້ວຍການຂາຍພັນທະບັດ ແລະ ລະດົມແຫຼ່ງທຶນພາຍໃນຕ່າງໆເພື່ອມາຊຳລະໜີ້ ປີ 2020 ເປັນຕົ້ນໄປຈະໃຫ້ລາຍຮັບ ແລະ ລາຍຈ່າຍພາຍໃນໃຫ້ດຸ່ນດ່ຽງກັນ ແລະ ບໍ່ໃຫ້ມັນຂາດດຸນອີກ ໝາຍຄວາມວ່າຮັບເທົ່າໃດຕ້ອງຂຶ້ນແຜນຈ່າຍເທົ່ານັ້ນ ໂດຍອີງຕາມລາຍຮັບ ຂະນະທີ່ປີ 2021-2022 ຂຶ້ນໄປພວກເຮົາຕ້ອງໄດ້ບຸກບືນເຮັດໃຫ້ລາຍຮັບເຫຼືອຈ່າຍ ເຫຼືອຈ່າຍພາຍໃນເທົ່າໃດກໍເອົາໄປຊຳລະຕົ້ນທຶນໜີ້ຕ່າງປະເທດໃຫ້ມັນຄ່ອຍໆຫຼຸດລົງ ສ່ວນວ່າການຈະກູ້ຢືມໃໝ່ນັ້ນຕ້ອງມີການຈຳກັດ ໂຄງການກູ້ຢືມໃໝ່ແມ່ນຈະກູ້ຢືມໂຄງການທີ່ມີລັກສະນະຜ່ອນຜັນສູງ ໄລຍະເວລາການຊຳລະຍາວ ແລະ ມີດອກເບ້ຍຕ່ຳບໍ່ເກີນ 1,5% ແລະ ມີໄລຍະຜ່ອນຜັນ 6-7 ປີ ສ່ວນໂຄງການທີ່ມີດອກເບ້ຍສູງແມ່ນຈະບໍ່ກູ້ຢືມຕໍ່ໄປອີກ.
ໂດຍ: ສະຫະລັດ ວອນທິວົງໄຊ