ເວິລແບັງ (World bank) ຄາດຄະເນໂຕເລກເສດຖະກິດໂລກໃນປີ 2019 ຫຼຸດລົງເຫຼືອ 2,6% ຈາກທີ່ເຄີຍຄາດຄະເນວ່າຈະຂະຫຍາຍຕົວໃນລະດັບ 2,9% ຈາກຜົນກະທົບດ້ານການຄ້າ ພາວະເຄັ່ງຕຶງດ້ານການເງິນທີ່ເກີດຂຶ້ນທົ່ວໂລກ ລວມເຖິງການຢຸດນິ້ງຂອງເສດຖະກິດໃນບັນດາປະເທດຂະໜາດໃຫຍ່.
ສ່ວນໃນປີ 2020 ທະນາຄານໂລກໄດ້ຄາດຄະເນວ່າ ການຂະຫຍາຍຕົວຂອງເສດຖະກິດໂລກຈະຢູ່ທີ່ລະດັບ 2,7% ເນື່ອງຈາກວ່າເສດຖະກິດໂລກພວມຜະເຊີນກັບຄວາມບໍ່ແນ່ນອນດ້ານນະໂຍບາຍຊຶ່ງລວມເຖິງຂໍ້ຂັດແຍ່ງທີ່ເກີດຂຶ້ນໃນຫຼາຍປະເທດ ລວມເຖິງການລົງທຶນກໍຢຸດນິ້ງຈາກຄວາມເຊື່ອໝັ້ນທີ່ຫຼຸດລົງ.
ຂະນະທີ່ ທ່ານ ເດວິດ ມັລພາສ ປະທານທະນາຄານໂລກກ່າວວ່າ ທ່າອຽງເສດຖະກິດໂລກທັງໃນໄລຍະສັ້ນ ແລະ ໄລຍະຍາວກຳລັງຜະເຊີນກັບອຸປະສັກຫຼາຍດ້ານ ສ່ວນຄວາມສ່ຽງທີ່ອາດເຮັດໃຫ້ເສດຖະກິດໂລກຜະເຊີນພາວະຖອຍຫຼັງກໍຄື ກຳແພງການຄ້າທີ່ສູງຂຶ້ນ ໜີ້ສິນຂອງລັດຖະບານທີ່ເພີ່ມຂຶ້ນ ແລະ ການຢຸດນິ້ງທີ່ເພີ່ມຂຶ້ນຂອງປະເທດເສດຖະກິດຂະໜາດໃຫຍ່.
ທັງນີ້ ທະນາຄານໂລກໄດ້ຄາດຄະເນວ່າ ການຂະຫຍາຍຕົວຂອງປະເທດໃນກຸ່ມຕະຫຼາດເກີດໃໝ່ ແລະ ກຸ່ມປະເທດກຳລັງພັດທະນາຈະລົງມາຢູ່ທີ່ລະດັບ 4% ໃນປີ 2019 ຊຶ່ງເປັນລະດັບຕ່ຳສຸດໃນຮອບ 4 ປີ ຂະນະທີ່ຫຼາຍປະເທດກຳລັງຮັບມືກັບຜົນກະທົບຂອງພາວະຄົງທີ່ດ້ານການເງິນ ແລະ ຄວາມບໍ່ແນ່່ນອນດ້ານນະໂຍບາຍ ແຕ່ວ່າການຂະຫຍາຍຕົວຂອງປະເທດເຫຼົ່ານີ້ຈະປັບຂຶ້ນຢູ່ທີ່ລະດັບ 4,6% ໃນປີ 2020.
ສ່ວນການຂະຫຍາຍຕົວໃນປະເທດກຸ່ມພັດທະນາແລ້ວຈະຫຼຸດລົງສູ່ລະດັບ 1,7% ໃນປີນີ້ ໂດຍຄາດວ່າເສດຖະກິດເອີຣົບຈະຂະ ຫຍາຍຕົວໃນລະດັບ 1,2% ຂະນະທີ່ເສດຖະກິດຂອງອາເມຣິກາຄາດວ່າຈະຫຼຸດລົງມາຢູ່ທີ່ລະດັບ 2,5% ໃນປີນີ້ເຊັ່ນກັນ ແລະ ຈະຫຼຸດລົງມາຢູ່ທີ່ລະດັບ 1,7 ໃນປີ 2020 ສ່ວນເສດຖະກິດຂອງ ສປ ຈີນ ຄາດວ່າຈະຂະຫຍາຍຕົວໃນປີນີ້ຢູ່ທີ່ລະດັບ 6,2%.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: mgronline