ບໍລິສັດຄາຍເຊັນ ໄດ້ເປີດໂຮງສາຍຮູບເງົາ ຊິຕີ ເພຣັກ (City Plex) ຢ່າງເປັນທາງການເມື່ອວັນທີ 5 ມິຖຸນາ 2019 ທີ່ບ້ານດົງໂດກ ເມືອງໄຊທານີ ນະຄອນຫຼວງວຽງຈັນ ທັງນີ້ City Plex ເປັນໂຮງຮູບເງົາທີ່ມີຄວາມທັນສະໄໝ ຮັບປະກັນຄວາມປອດໄພ ສະອາດ ແລະ ໄດ້ມາດຕະຖານສາກົນ.
ທ່ານ ນາງ ລະອຽດ ຈຸນລະມຸນຕຣີ ປະທານບໍລິສັດຄາຍເຊັນ ກ່າວວ່າ ໂຮງສາຍຮູບເງົາ ຊິຕີ ເພຣັກ ມີທັງໝົດ 3 ຊັ້ນ ມີ 3 ຫ້ອງ ຊຶ່ງແຕ່ລະຫ້ອງສາມາດບັນຈຸຄົນໄດ້ 70-100 ຄົນ ລວມມີສິ່ງອຳນວຍຄວາມສະດວກຄົບຊຸດ ມີສະະຖານທີ່ຈອດລົດ (ລົດຈັກ-ລົດໃຫຍ່) ທີ່ກວ້າງຂວາງ ມີຈຸດບໍລິການອາຫານ ແລະ ເຄື່ອງດື່ມ ມີບ່ອນນັ່ງຫຼິ້ນ ໂດຍລາຄາເລີ່ມຕົ້ນແມ່ນ 16.000-40.000 ກີບເທົ່ານັ້ນ.
ນອກນັ້ນ ຍັງມີໂປຣໂມເຊິນ ແຈກແຖມຫຼາຍຢ່າງໄປຈົນເຖິງທ້າຍເດືອນນີ້ ພ້ອມນີ້ ໂຮງສາຍຮູບເງົາຊິຕີ ເພຣັກ ໄດ້ນໍາເອົາຮູບເງົາຫຼາຍເລື່ອງຫຼາຍອາລົມທີ່ໄດ້ຮັບຄວາມນິຍົມໃນລະດັບໂລກເຂົ້າມາ ໃນນີ້ ແມ່ນຈະສາຍຮູບເງົາ 12-15 ຮອບຕໍ່ມື້ ເລີ່ມແຕ່ເວລາ 10:30-22:00 ໂມງເປັນຕົ້ນໄປ.
ທ່ານປະທານບໍລິສັດຄາຍເຊັນກ່າວຕື່ມວ່າ ຈຸດປະສົງຂອງການສ້າງໂຮງສາຍຮູບເງົາດັ່ງກ່າວກໍເພື່ອແນໃສ່ໃຫ້ໄວໜຸ່ມ ນັກຮຽນນັກສຶກສາທີ່ເຂົ້າມາເບິ່ງຮູບເງົາໄດ້ຮູ້ຈັກ ແລະ ສຳຜັດເຖິງວັດທະນະທຳທີ່ຫຼາກຫຼາຍເພື່ອນຳໄປພັດທະນາໃຫ້ເກີດປະໂຫຍດທັງຕໍ່ຕົນເອງ ແລະ ສັງຄົມກໍຄືປະເທດຊາດ ທັງເປັນການສົ່ງເສີມທາງດ້ານວັດທະນະທຳໃຫ້ເຊື່ອມໂຍງກັບພາກພື້ນ ແລະ ສາກົນອີກດ້ວຍ.
ໂດຍ: ສະຫະລັດ ວອນທິວົງໄຊ