ເມື່ອວັນທີ 31 ພຶດສະພາຜ່ານມາ ທີ່ຕະຫຼາດຫຼັກຊັບລາວ ໂດຍບໍລິສັດວຽງຈັນເຊັນເຕີ ລາວ ມະຫາຊົນ ໄດ້ເປີດຂາຍຮຸ້ນເປັນຄັ້ງທຳອິດໃນຕະຫຼາດຫຼັກຊັບລາວ ແລະ ກາຍເປັນບໍລິສັດທີ 10 ຂອງ ສປປ ລາວ ທີ່ໄດ້ຈົດທະບຽນເຂົ້າຕະຫຼາດຫຼັກຊັບ ໂດຍການເປັນປະທານຂອງ ທ່ານ ນາງ ສາຍສະໝອນ ຈັນທະຈັກ ຫົວໜ້າສຳນັກງານ ຄະນະກຳມະການຄຸ້ມຄອງຫຼັກຊັບ ທ່ານ ວັນຄຳ ວໍຣະວົງ ຜູ້ອຳນວຍການໃຫຍ່ຕະຫຼາດຫຼັກຊັບລາວ ມີບັນດາຜູ້ຖືຮຸ້ນ ແຂກຖືກເຊີນ ພ້ອມດ້ວຍພາກສ່ວນກ່ຽວຂ້ອງຮ່ວມເປັນສັກຂີພິຍານ.

ໂອກາດດັ່ງກ່າວ ທ່ານ ວັນຄຳ ໄດ້ກ່າວວ່າ ສູນການຄ້າວຽງຈັນເຊັນເຕີລາວ ມະຫາຊົນ ຖືເປັນອີກໜຶ່ງສີສັນທີ່ຈະເຮັດໃຫ້ຕະຫຼາດທຶນຂອງລາວກ້າວສູ່ມິຕິໃໝ່ ລວມທັງເຮັດໃຫ້ບັນດານັກລົງທຶນມີໂອກາດ ແລະ ທາງເລືອກທີ່ຫຼາກຫຼາຍກວ່າເກົ່າ.

ທັງນີ້ ເມື່ອເດືອນພະຈິກ 2017 ບໍລິສັດໄດ້ເອົາຊັບສິນປະກອບເປັນທຶນສ້າງຕັ້ງບໍລິສັດ ວຽງຈັນເຊັນເຕີລາວ ມະຫາຊົນຂຶ້ນ ພ້ອມີ້ ກໍໄດ້ເລີ່ມວຽກງານການເຂົ້າຈົດທະບຽນທີ່ກ່ຽວຂ້ອງ ແລະ ມາຮອດທ້າຍປີ 2018 ບໍລິສັດໄດ້ຮັບໃບຢັ້ງຢືນການອອກຈຳໜ່າຍຮຸ້ນຈາກ ສຄຄຊ ມາຮອດວັນທີ 31 ພຶດສະພາ 2019 ບໍລິສັດໄດ້ສຳເລັດທຸກວຽກງານການກະກຽມຈົດທະບຽນ ແລະ ຈົດທະບຽນເຂົ້າໃນຕະຫຼາດຫຼັກຊັບລາວຢ່າງເປັນທາງການ ດ້ວຍຊື່ຫຍໍ້  “VCL”  ລະຫັດຫຼັກຊັບແມ່ນ A0001000.

ທັງນີ້ ທ່ານ ນາງ ອໍລະໄທ ສັນຕິຄົງຄາ ຮອງປະທານສະພາບໍລິຫານບໍລິສັດວຽງຈັນເຊັນເຕີລາວ ມະຫາຊົນ ໄດ້ກ່າວວ່າ ການດຳເນີນທຸລະກິດຂອງບໍລິສັດແມ່ນດຳເນີນໄປດ້ວຍດີ ແລະ ການເຂົ້າຈົດທະບຽນໃນຕະຫຼາດຫຼັກຊັບລາວກໍຖືເປັນໝາກຜົນຈາກການຮ່ວມ ມືລະຫວ່າງ 2 ບໍລິສັດ ລາວ-ຈີນ ຊຶ່ງໄດ້ສົ່ງເສີມການພັດທະນາດ້ານການຮ່ວມມືບັນລຸເປົ້າໝາຍ ຊຶ່ງພາຍຫຼັງທີ່ຈົດທະບຽນແລ້ວ ບໍລິສັດກໍຈະປະຕິບັດຕາມລະບຽບກົດໝາຍຢ່າງເຂັ້ມງວດ ແລະ ຈະສືບຕໍ່ປະຕິບັດຢ່າງຕັ້ງໜ້າເພື່ອເພີ່ມມູນຄ່າໃຫ້ຊັບສິນ ແລະ ຜົນຕອບແທນທີ່ດີໃຫ້ແກ່ນັກລົງທຶນ.

ໂດຍ: ສະຫະລັດ ວອນທິວົງໄຊ