ໃນວັນທີ 31 ພຶດສະພາ 2019 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໄດ້ມີພິທີຕ້ອນຮັບຢ່າງເປັນທາງການ ແລະ ພົບປະສອງຝ່າຍລະຫວ່າງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ສົມເດັດ ອັກຄະມະຫາ ໂປເຢຍ ຈັກກຣິ ເຮັງຊໍາຣິນ ປະທານສະພາແຫ່ງຊາດ ແຫ່ງຣາຊະອານາຈັກກໍາປູເຈຍ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມຢ່າງເປັນທາງການຢູ່ ສປປ ລາວ ໃນລະຫວ່າງວັນທີ 30 ພຶດສະພາຫາ 1 ມິຖຸນາ 2019.
ການພົບປະສອງຝ່າຍໃນຄັ້ງນີ້ໄດ້ມີການແລກປ່ຽນຄໍາເຫັນ ແລະ ປຶກສາຫາລືຮ່ວມກັນດ້ວຍບັນຍາກາດສາຍພົວພັນມິດຕະພາບ ການຮ່ວມມື ແລະ ຄວາມສາມັກຄີທີ່ດີຂອງປະຊາຊົນສອງຊາດກໍຄືສອງປະເທດ ພ້ອມນີ້ ສອງຝ່າຍຍັງໄດ້ຕິລາຄາສູງຕໍ່ການຮ່ວມມືລະຫວ່າງສະພາແຫ່ງຊາດ ແລະ ສະພາແຫ່ງຊາດກໍາປູເຈຍ ລວມເຖິງທິດທາງການຮ່ວມມືໃນຕໍ່ໜ້າ ທັງນີ້ ສອງສະພາແຫ່ງຊາດແມ່ນສະເໜີໃຫ້ສືບຕໍ່ຈັດຕັ້ງປະຕິບັດເນື້ອໃນຈິດໃຈຂອງບົດບັນທຶກຄວາມເຂົ້າໃຈ ວ່າດ້ວຍການຮ່ວມມືຂອງສອງສະພາສະບັບປີ 2019 ໃຫ້ຕໍ່ເນື່ອງ ແລະ ມີຄຸນນະພາບ ທັງຍັງສະເໜີໃຫ້ມີການພົວພັນຮ່ວມມືລະຫວ່າງສະພາປະຊາຊົນຂັ້ນແຂວງທີ່ມີຊາຍແດນຕິດຈອດກັນເພື່ອແລກປ່ຽນບົດຮຽນກ່ຽວກັບການຈັກຕັ້ງປະຕິບັດພາລະບົດບາດດ້ານນິຕິບັນຍັດນໍາກັນ.
ສໍາລັບການຮ່ວມມືດ້ານການຄ້າຂອງສອງຝ່າຍໃນປັດຈຸບັນເຫັນວ່າມີທ່າອ່ຽງຫຼຸລົງຄື ໃນປີ 2018 ມູນຄ່າການຄ້າມີ 17,8 ລ້ານໂດລາ ຖ້າທຽບໃສ່ມູນຄ່າການຄ້າໃນປີ 2012 ແມ່ນຫຼຸດລົງ 3 ລ້ານກວ່າໂດລາ ສ່ວນການຮ່ວມມືດ້ານການສຶກສາແມ່ນມີທ່າອຽງທີ່ດີ ໂດຍມີການແລກປ່ຽນທຶນການສຶກສາຂອງສອງລັດຖະບານໄດ້ເພີ່ມຂຶ້ນມາເປັນ 15 ທຶນຕໍ່ປີ ເລີ່ມແຕ່ປີ 2019 ເປັນຕົ້ນໄປ ພ້ອມທັງໄດ້ເພີ່ມເບັ້ຍລ້ຽງໃຫ້ນັກສຶກສາທັງສອງຝ່າຍ ນັບແຕ່ປີ 2016 ຈາກ 150 ໂດລາມາເປັນ 180 ໂດລາຕໍ່ເດືອນ.
ໃນວັນດຽວກັນ ສົມເດັດ ອັກຄະມະຫາ ໂປເຢຍ ຈັກກຣິ ເຮັງຊໍາຣິນ ປະທານສະພາແຫ່ງຊາດແຫ່ງຣາຊະອານາຈັກກໍາປູເຈຍ ພ້ອມດ້ວຍຄະນະ ກໍໄດ້ເຂົ້າວາງພວງມາລາທີ່ອະນຸສາວະລີນັກຮົບນິລະນາມ ຢູ່ເດີ່ນພະທາດຫຼວງ.
ໂດຍ: ສະຫະລັດ ວອນທິວົງໄຊ