ໃນລະດູຝົນປີນີ້ເຂື່ອນໄຟຟ້ານ້ຳງື່ມ 1 ໄດ້ມີການກະກຽມບໍລິຫານຈັດການນໍ້າໂດຍສ້າງຕັ້ງໜ່ວຍງານຮັບຜິດຊອບໃນການຕິດຕາມແຜນທີ່ໃນຈຸດວັດແທກນ້ຳ ກວດກາຈຸດທີ່ເປັນພື້ນທີ່ສູງ ແລະ ປອດໄພ ເພື່ອຮອງຮັບການອົບພະຍົບປະຊາຊົນຜູ້ທີ່ອາໄສຢູ່ກ້ອງເຂື່ອນ ໂດຍສະເພາະຜູ້ທີ່ຢູ່ພື້ນທີ່ຕ່ຳ ແລະ ມີຄວາມສ່ຽງ ພ້ອມນີ້ ກໍມີການຄິດໄລ່ປະລິມານນໍ້າຝົນ ແລະ ມີໜ່ວຍງານແຈ້ງເຫດສຸກເສີນໃນເວລາຝົນຕົກໜັກ.
ທ່ານ ບົວວັນ ຈັນສະຫວັດ ຜູ້ອໍານວຍການເຂື່ອນນໍ້າງື່ມ 1 ໄດ້ກ່າວວ່າ ໂດຍປົກກະຕິໃນແຕ່ລະປີຜ່ານມາເຂື່ອນຂອງພວກເຮົາມີການບໍລິຫານຈັດການນ້ຳໄປຕາມເສັ້ນກົດເກນຂອງອ່າງນ້ຳງື່ມ 1 ແຕ່ປີນີ້ທາງເຂື່ອນໄດ້ຮັບການຊີ້ນຳຈາກສູນບັນຊາພະລັງງານຂອງບໍລິສັດໄຟຟ້າລາວໃຫ້ລະບາຍນ້ຳລົງຕໍ່າສຸດຄື 198 ແມັດເໜືອນ້ຳທະເລ ມາເຖິງມື້ນີ້ລະດັບນ້ຳຕົວຈິງເທົ່າກັບ 200,65 ແມັດເໜືອນ້ຳທະເລ ປົກກະຕິລະດັບນ້ຳຕໍ່າສຸດຈະຢູ່ທີ່ 202 ແມັດເໜືອນ້ຳທະເລ ເພື່ອຫຼີກເວັ້ນການປ່ອຍນ້ຳໃນລະດູຝົນປີນີ້ແມ່ນໃຫ້ນ້ຳງື່ມກັກເກັບນ້ຳໄວ້ເພື່ອໃຫ້ໂອກາດເຂື່ອນອື່ນໆແລ່ນຈັກຍ້ອນວ່າເຂື່ອນອື່ນໆເຫຼົ່ານັ້ນບໍ່ມີອ່າງກັກເກັບນ້ຳໃຫຍ່ ຄືອ່າງນ້ຳງື່ມ ພ້ອມນີ້ ທ່ານກໍໄດ້ຢືນຢັນວ່າ ໂອກາດທີ່ຈະປ່ອຍນ້ຳຜ່ານປະຕູນ້ຳລົ້ນໃນປີນີ້ແມ່ນເປັນໄປໄດ້ຍາກ ໃນປີຜ່ານມາຈາກເຫດການພາຍຸຫຼາຍລູກໄດ້ພັດຜ່ານປະເທດເຮົາເຮັດໃຫ້ເກີດມີຝົນຕົກໜັກ ແຕ່ເໜືອເຖິງໃຕ້ ແລະ ໄດ້ເຮັດໃຫ້ເກີດມີນ້ຳຖ້ວມບາງພື້ນທີ່ໃນຂອບເຂດທົ່ວປະເທດ ໂດຍສະເພາະແມ່ນບາງເມືອງຂອງແຂວງວຽງຈັນທີ່ຢູ່ພື້ນທີ່ຕໍ່າ ແລະ ເຂດທີ່ມີຄວາມສ່ຽງຕາມລຳນ້ຳງື່ມໄດ້ຮັບຜົນກະທົບ ເປັນຕົ້ນເຮືອນຊານບ້ານຊ່ອງ ສັດສາວາສິ່ງ ໄຮ່ນາ ແລະ ຮົ້ວສວນຂອງປະຊາຊົນຖືກເສຍຫາຍຫຼາຍສົມຄວນ ເພື່ອປ້ອງກັນບັນຫາດັ່ງກ່າວໃນລະດູຝົນປີນີ້ເຂື່ອນໄຟຟ້ານ້ຳງື່ມ 1 ກໍໄດ້ມີມາດຕະການໃນການບໍລິຫານຈັດການນ້ຳໃນອ່າງດັ່ງນີ້ ຕ້ອງກຳນົດການຜະລິດພະລັງງານ ແລະ ການນຳໃຊ້ນ້ຳເຂົ້າເພື່ອຜະລິດໃຫ້ເກີດປະໂຫຍດສູງສຸດ ປະສານສົມທົບກັບບັນດາເຂື່ອນຕອນເທິງໂດຍສະເພາະເຂື່ອນນ້ຳງື່ມ 2 ເພື່ອຮັບຊາບຂໍ້ມູນໃນການລະບາຍນ້ຳລົງສູ່ອ່າງນ້ຳງື່ມ 1.
ພ້ອມນີ້ ກໍຕ້ອງຄົ້ນຄວ້າຄາດຄະເນປະລິມານນ້ຳໄຫຼເຂົ້າອ່າງໃນປີນີ້ ໂດຍອາໄສຂໍ້ມູນຍ້ອນຫຼັງ 50 ປີຈາກຂໍ້ມູນຈາກກົມອຸຕຸນິຍົມເພື່ອເປັນບ່ອນອີງໃນການຄິດໄລ່ ແລະ ຕ້ອງໄດ້ຈັດກອງປະຊຸມຄະນະກຳມະການຕ້ານແລ້ງ ແລະ ຕ້ານອຸທົກກະໄພໃນໄລຍະລະດູຝົນເພື່ອນຳສະເໜີຂັ້ນເທິງ.
ໂດຍ: ສະຫະລັດ ວອນທິວົງໄຊ