ສຳເລັດເປັນທີ່ຮຽບຮ້ອຍແລ້ວສຳລັບການຄັດເລືອກນາງແບບ-ນາຍແບບຮອບສຸດທ້າຍຂອງໂຄງການປະກວດ ລາວ ຊຸບເປີ ໂມເດວ (Lao Super Model 2019) ຊຶ່ງຈັດຂຶ້ນເມື່ອວັນທີ 25-26 ພຶດສະພາຜ່ານມາ ທີ່ໂຮງແຮມແລນມາກ ແມ່ຂອງຣີເວີໄຊ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ນາງ ວັນນາລີ ອ່ອນສະຫວັດ ປະທານໂຄງການ ລາວ ຊຸບເປີ ໂມເດວ ທ່ານ ນາງ ລູກເກດ ເມທິນີ ກິ່ງພະໂຍມ ດາລາ-ນາງແບບຊື່ດັງຈາກປະເທດໄທ ພ້ອມດ້ວຍກຳມະການຮ່ວມຕັດສິນ ແລະ ບັນດານ້ອງໆນາຍແບບ-ນາງແບບຫຼາຍກວ່າ 100 ຄົນທີ່ຜ່ານມາເຂົ້າມາໃນຮອບຄັດເລືອກຮອບສຸດທ້າຍ.
ສຳລັບການຄັດເລືອກນ້ອງໆໃນຮອບສຸດທ້າຍນີ້ ແມ່ນຈະຄັດເອົາພຽງແຕ່ 32 ຄົນຈາກນ້ອງໆທີ່ຜ່ານເຂົ້າມາທັງໝົດຫຼາຍກວ່າ 100 ຄົນ ໃນນັ້ນ ຈະຄັດເອົານາຍແບບ 10 ຄົນ ນາງແບບ 10 ຄົນ ນາຍແບບເດັກຊາຍ 6 ຄົນ ແລະ ນາງແບບເດັກຍິງ 6 ຄົນ ເພື່ອເຂົ້າໄປຊີງໄຊໃນຮອບຕັດສິນ ຊຶ່ງຈະຈັດຂຶ້ນໃນວັນທີ 17 ສິງຫາ 2019 ທີ່ໂຮງແຮມແລນມາກ ແມ່ຂອງຣີເວີໄຊ ນະຄອນຫຼວງວຽງຈັນ.
ໂດຍ: ສະຫະລັດ ວອນທິວົງໄຊ