ພະນັກງານຈາກກົມກວດກາ ກະຊວງໄປສະນີ ໂທລະຄົມມະນາຄົມ ແລະ ການສື່ສານ (ປທສ) ໄດ້ຍົກລະດັບຄວາມຮູ້ຄວາມສາມາດ ໃນວຽກງານ ການຕິດຕາມກວດກາ ແລະ ແກ້ໄຂຄຳຮ້ອງຟ້ອງ ຮ້ອງທຸກ ແລະ ຄຳສະເໜີ.
ງານສຳມະນາກ່ຽວກັບວຽກງານວິຊາສະເພາະກວດກາຈັດຂື້ນໃນວັນທີ 28 ພຶດສະພາ 2019 ທີ່ນະຄອນຫຼວງວຽງຈັນ ໂດຍການເຂົ້າຮວ່ມຂອງ ທ່ານ ທອງໃສ ຊານໄຊຍະ ຮອງລັດຖະມົນຕີ ກະຊວງ ປທສ ມີຄະນະພັກ ເລຂາໜ່ວຍພັກ ເລຂາຄະນະພັກຮາກຖານ ບັນດາບໍລິສັດ-ລັດວິສາຫະກິດທີ່ຂຶ້ນກັບກະຊວງ ປທສ ພ້ອມດ້ວຍພະແນກ ປທສ ແຂວງວຽງຈັນ ໄຊສົມບູນ ແລະ ແຂວງບໍລິຄຳໄຊ ເຂົ້າຮ່ວມ.
ຈຸດປະສົງກໍເພື່ອເປັນການຍົກສູງຄວາມຮູ້ຄວາມສາມາດ ປັບປຸງທັດສະນະຄວາມເຂົ້າໃຈ ແລະ ຄວາມຮັບຜິດຊອບຕໍ່ກັບວຽກງານກວດກາຂອງພະນັກງານນຳພາ-ຄຸ້ມຄອງແຕ່ລະຂັ້ນພາຍໃນຂະແໜງການ ປທສ ແລະ ສາມາດນຳໄປຈັດຕັ້ງປະຕິບັດໃຫ້ມີປະສິດທິຜົນດີກວ່າເກົ່າ ໂດຍຫົວຂໍ້ໃນການສຳມະນາໃນຄັ້ງນີ້ມີ 3 ຫົວຂໍ້ ເປັນຕົ້ນແມ່ນບັນດາຄວາມຮູ້ພື້ນຖານກ່ຽວກັບວຽກງານຕິດຕາມ ກວດກາໂຄງການລົງທຶນຂອງລັດຕັ້ງແຕ່ຫົວທີ ວຽກງານການແກ້ໄຂຜົນການກວດກາ ແລະ ການຕິດຕາມກວດກາການຈັດຕັ້ງປະຕິບັດຜົນການກວດກາ ວຽກງານຄົ້ນຄວ້າ ແລະ ແກ້ໄຂຄຳຮ້ອງຟ້ອງ ຮ້ອງທຸກ ແລະ ຄຳສະເໜີ.
ໂອກາດັ່ງກ່າວ ທ່ານ ທອງໃສ ຊານໄຊຍະ ໄດ້ກ່າວວ່າ ໃນປີ 2018 ຜ່ານມາ ບັນດາຄະນະພັກ ເລຂາໜ່ວຍພັກ ຄະນະພັກຮາກຖານ ໄດ້ເອົາໃຈໃສ່ ແລະ ມີຄວາມຮັບຜິດຊອບສູງ ໂດຍສະເພາະວຽກງານກວດກາແມ່ນມີບົດບາດສຳຄັນທີ່ຈະຕ້ອງໄດ້ເອົາໃຈໃສ່ໃນການຄົ້ນຄວ້າຮ່ຳຮຽນໃຫ້ມີຄວາມຮູ້ເລິກເຊິ່ງ ຕ້ອງເຊື່ອມຊຶມກຳແໜ້ນກ່ຽວກັບວຽກງານກວດກາຮອບດ້ານ ເພາະມັນແມ່ນຄວາມຮູ້ທີ່ສຳຄັນ ແລະ ສາມາດຍົກໃຫ້ເຫັນດ້ານຕັ້ງໜ້າ ບົດຮຽນທີ່ຕ້ອງເສີມຂະຫຍາຍ ຊອກໃຫ້ເຫັນດ້ານອ່ອນ ຂໍ້ຄົງຄ້າງ ສາເຫດຕ້ອງປັບປຸງແກ້ໄຂໃນຕໍ່ໜ້າ ເພື່ອປະກອບສ່ວນເຮັດໃຫ້ການຄຸ້ມຄອງລັດດ້ວຍກົດໝາຍໃຫ້ມີຄວາມສັກສິດ, ການພັດທະນາເສດຖະກິດ-ສັງຄົມ ມີການຂະຫຍາຍຕົວ, ບັນລຸຕາມຄາດໝາຍທີ່ວາງໄວ້.
ດັ້ງນັ້ນ, ພະນັກງານກວດກາ ຕ້ອງມີຈັນຍາບັນໃນການຈັດຈັ້ງປະຕິບັດ, ມີຄຸນສົມບັດສິນທຳປະຕິວັດ, ມີຄວາມສັດຊື່ບໍລິສຸດ, ມີສະຕິເຄົາລົບຕໍ່ການຈັດຕັ້ງ, ການປະຕິບັດກົດລະບຽບຂອງພັກ ແລະ ກົດ ໝາຍຂອງລັດຢ່າງເຂັ້ມງວດ.
ໂດຍ: ສະຫະລັດ ວອນທິວົງໄຊ