ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະ ຈະເດີນທາງໄປຮ່ວມກອງ​ປະຊຸມ​ສາກົນກ່ຽວ​ກັບອະນາຄົດ​ຂອງ​ອາຊີ ຄັ້ງ​ທີ 25 ​ຊຶ່ງຈະຈັດຂຶ້ນ​ໃນລະຫວ່າງ​ວັນ​ທີ 30-31 ພຶດສະພາ 2019 ທີ່ນະຄອນຫຼວງໂຕກຽວ ປະເທດຍີ່ປຸ່ນ.

ກອງປະຊຸມສາກົນກ່ຽວກັບອະນາຄົດຂອງອາຊີແມ່ນຈັດຂຶ້ນທຸກໆປີໂດຍສໍານັກຂ່າວໜັງສືພິມນິກເກຂອງຍີ່ປຸ່ນ ຊຶ່ງໄດ້ເລີ່ມມາແຕ່ປີ 1995  ໂດຍໄດ້ເຊີນບັນດາຜູ້ນໍາ ແລະ ຜູ້ບໍລິຫານຂັ້ນສູງຂອງພາກລັດ ແລະ ພາກເອກະຊົນ ລວມທັງ​ອະດີດການນໍາ ຜູ້ຊົງຄຸນ  ວຸດທິ ປະທານອົງການ ສະຖາບັນຕ່າງໆທັງພາກພື້ນ ແລະ ສາກົນຂອງອາຊີ ລວມພາກພື້ນອື່ນໆເຂົ້າຮ່ວມ ທັງນີ້ ກໍເພື່ອແລກປ່ຽນທັດສະນະ ແລະ ວິໄສທັດຕໍ່​ບັນ​ຫາ​ພົ້ນ​ເດັ່ນ​ທີ່​ເກີດ​ຂຶ້ນ​ໃນ​ພາກ​ພື້ນ ແລະ ໃນ​ໂລກຮ່ວມກັນ ກອງປະຊຸມຄັ້ງນີ້ແມ່ນຈະດໍາເນີນພາຍໃຕ້ຫົວຂໍ້ “ຄົ້ນຫາລະບຽບຂອງໂລກແບບໃໝ່ເພື່ອແກ້ໄຂຄວາມວຸ້ນວາຍໃນໂລກ (Seeking a new global order-overcoming the chaos)”.

ໂອກາດເຄື່ອນໄຫວຢູ່ປະເທດຍີ່ປຸ່ນຄັ້ງນີ້ ທ່ານນາຍົກລັດຖະມົນຕີແຫ່ງ ສປປ ລາວ ຈະຂຶ້ນກ່າວບົດປາໄສເພື່ອສະແດງທັດສະນະຂອງ ສປປ ລາວ ທີ່ປິ່ນອ້ອມຫົວຂໍ້ກອງປະຊຸມ ລວມທັງພົບປະສອງຝ່າຍ ກັບທ່ານ ຊິນໂຊະ ອາເບະ ນາຍົກລັດຖະມົນຕີຍີ່ປຸ່ນ ພ້ອມທັງ​ເຂົ້າ​ຮ່ວມເປັນສັກຂີພິຍານໃນພິທີລົງນາມເອກະສານແລກປ່ຽນໂຄງການພັດທະນາຊັບພະຍາກອນມະນຸດໃຫ້ແກ່ ສປປ ລາວ ເອ​ກະ​ສານ​ແລກ​ປ່ຽນ​ອີກ​ຈຳ​ນວນ​ໜຶ່ງ ແລະ ​ຮັບການເຂົ້າຢ້ຽມຂໍ່ານັບຈາກຜູ້ຕາງໜ້າອົງການ ແລະ ບໍລິສັດຕ່າງໆ.

ໂດຍ: ສະຫະລັດ ວອນທິວົງໄຊ