ເປຣູຜະເຊີນແຜ່ນດິນໄຫວລະດັບຮຸນແຮງເຖິງ 8,0 ແມັກນີຈູດ ສົ່ງຜົນໃຫ້ປະຊາຊົນຫຼາຍກວ່າ 1 ແສນຄົນທີ່ອາໄສໃນລັດສະໝີ 100 ກີໂລແມັດຈາກຈຸດສູນກາງຂອງແຜ່ນໄຫວໄດ້ຮັບຜົນກະທົບຢ່າງໜັກ ໄຟຟ້າດັບ ອາຄານ ບ້ານເຮືອນ ແລະ ອື່ນໆໄດ້ຮັບເສຍຫາຍຈຳນວນຫຼາຍ.
ສຳນັກຂ່າວຕ່າງປະເທດລາຍງານເມື່ອວັນທີ 26 ພຶດສະພາຜ່າານມາກ່ຽວກັບລາຍງານຄວາມຄືບໜ້າເຫດແຜ່ນດິນໄຫວຄັ້ງໃຫຍ່ ຊຶ່ງວັດແທກຄວາມຮຸນແຮງໄດ້ເຖິງລະດັບ 8,0 ແມັກນີຈູດທາງພາກເໜືອຂອງເປຣູ ເຫດການດັ່ງກ່າວເກີດຂຶ້ນໃນເວລາປະມານ 2:40 ນາທີ (ຕາມເວລາທ້ອງຖິ່ນ) ໂດຍສູນກາງຂອງແຜ່ນດິນໄຫວຢູ່ຫ່າງຈາກເມືອງໂມ ໂຢບັມບາ ໄປທາງຕາເວັນອອກປະມານ 180 ກີໂລແມັດ ຂະນະທີ່ແຮງສັ່ນສະເທືອນໄປໄກເຖິງປະເທດເອກົວດໍຣ ໂກລຳບີ ແລະ ເບຣຊິນ ຊຶ່ງຢູ່ຫ່າງຈາກສູນກາງແຜ່ນດິນ ໄຫວກວ່າ 1.000 ກີໂລແມັດ.
ຂະນະທີ່ປະທານາທິບໍດີ ມາຣຕິນ ວິຊຄາຣຣາ ໄດ້ແຈ້ງຜ່ານໂຊຊຽວວ່າ ເຈົ້າໜ້າທີ່ພວມປະເມີນຄວາມເສຍຫາຍໃນພື້ນທີ່ປະສົບໄພແຜ່ນດິນໄຫວ ແລະ ຂໍໃຫ້ປະຊາຊົນຢູ່ໃນຄວາມສະຫງົບ ສ່ວນເຈົ້າໜ້າທີ່ກ່ຽວຂ້ອງກໍໄດ້ເປີດເຜີຍວ່າ ມີປະຊາຊົນປະມານ 180.000 ຄົນຮູ້ສຶກເຖິງແຮງສັ່ນສະເທືອນທີ່ຮຸນແຮງ ຊຶ່ງໄດ້ສົ່ງຜົນໃຫ້ໄຟຟ້າດັບເກືອບທົ່ວປະເທດ ແລະ ປະຊາຊົນສ່ວນຫຼາຍຍັງຫຼົບໄພຢູ່ນອກເຮືອນ ເຖິງແມ່ນວ່າແຜ່ນດິນໄຫວຄັ້ງນີ້ຈະຜ່ານໄປແລ້ວຫຼາຍຊົ່ວໂມງ ເນື່ອງຈາກຢ້ານວ່າຈະເກີດອັຟເຕີຊ໋ອກແຜ່ນດິນໄຫວຕາມມາ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: ໄທຣັດ