ກົມພັດທະນາສີມືແຮງງານ ແລະ ຈັດຫາງານ ກະຊວງແຮງງານ ແລະ ສະຫວັດດີການສັງຄົມ (ຮສສ) ຮ່ວມກັບທະນາຄານພັດທະ ນາອາຊີ (ADB) ປະເມີນໂຄງການເສີມສ້າງຄວາມອາດສາມາດທາງດ້ານວິຊາການເພື່ອພັດທະນາລະບົບການຈັດຫາງານຢູ່ ສປປ ລາວ ກອງປະຊຸມດັ່ງກ່າວໄດ້ຈັດຂື້ນໃນວັນທີ 22 ພຶດສະພາ 2019 ທີ່ໂຮງແຮມລາວພາຊາ ນະຄອນຫຼວງວຽງຈັນ.

ຈຸດປະສົງກໍເພື່ອປະກອບຄໍາຄິດຄໍາເຫັນ ແລະ ສົນທະນາກ່ຽວກັບຮ່າງບົດປະເມີນຜົນໄດ້ຮັບຂອງໂຄງການ ເພື່ອເຮັດໃຫ້ບົດປະເມີນໂຄງການດັ່ງກ່າວສົມບູນ ແລະ ສອດຄ່ອງກັບສະພາບຄວາມເປັນຈິງໃນປັດຈຸບັນ ທັງນີ້ ກໍເພື່ອການກໍານົດຜົນໄດ້ຮັບຂອງໂຄງການ ໃນໄລຍະສັ້ນ ແລະ ໄລຍະຍາວ ກໍານົດບັນຫາທີ່ຍັງຄົງຄ້າງ ແລະ ຖອດຖອນບົດຮຽນ ພ້ອມທັງກໍານົດຂໍ້ແນະນໍາໃນການປັບປຸງການຈັດຕັ້ງປະຕິບັດໂຄງການໃນຕໍ່ໜ້າ.

ທ່ານ ໄທ ແສງອາລຸນ ຮອງຫົວໜ້າກົມພັດທະນາສີມືແຮງງານ ແລະ ຈັດຫາງານ ກ່າວວ່າ ໂຄງການດັ່ງກ່າວຈັດຂຶ້ນເພື່ອພັດທະນາລະບົບການຈັດຫາງານຢູ່ ສປປ ລາວ ພາຍໃຕ້ການຊ່ວຍເຫຼືອຂອງປະເທດຍີ່ປຸນ ໂດຍຜ່ານ ADB ໂຄງການດັ່ງກ່າວໄດ້ສ້າງລະບົບການຈັດຫາງານທີ່ທັນສະໄໝ ແລະ ສ້າງຄວາມເຂັ້ມແຂງໃຫ້ພະນັກງານລັດໃນການໃຫ້ບໍລິການທີ່ມີປະສິດທິພາບ ທັງເປັນການປັບປຸງລະບົບຂໍ້ມູນ-ຂ່າວສານຕະຫຼາດແຮງງານ ການວິໄຈ ແລະ ການໂຄສະນາປະຊາສໍາພັນເພື່ອສະໜອງຂໍ້ມູນ-ຂ່າວສານກ່ຽວ ກັບຄວາມເຄື່ອນໄຫວຂອງຕະຫຼາດແຮງງານໃຫ້ຜູ້ທີ່ກຳລັງຊອກວຽກ ນັກລົງທຶນ ລວມທັງຫົວໜ່ວຍແຮງງານ ແລະ ບັນດາວິສາຫະກິດຕ່າງໆ ໂຄງການດັ່ງກ່າວໄດ້ຈັດຕັ້ງປະຕິບັດເປັນເວລາ 2 ປີ (2017-2019).

ໄລຍະຜ່ານມາໂຄງການໄດ້ຈັດຕັ້ງປະຕິບັດຫຼາຍກິດຈະກໍາໂດຍສະເພາະແມ່ນດໍາເນີນການສຶກສາ ສ້າງແຜນບໍລິການຈັດຫາງານ ສ້າງລະບົບການບໍລິການຈັດຫາງານອອນລາຍ ຈັດຝຶກອົບຮົມສ້າງຄວາມສາມາດຫຼາຍໆດ້ານໃຫ້ແກ່ສູນບໍລິການຈັດຫາງານ ແລະ ຄະນະພະແນກ ຮສສ ພະນັກງານຮັບຜິດຊອບຈຸດບໍລິການຈັດຫາງານຢູ່ 9 ແຂວງເປົ້າໝາຍຂອງໂຄງການ ສະໜອງອຸປະກອນໄອທີ (ລະບົບອິນເຕີເນດ ຄອມພິວເຕີຕັ້ງໂຕະ ຄອມພິວເຕີໂນດບຸກ ເຄື່ອງປຮີນເຕີ ແລະ ເຄື່ອງສຽງລົງໂຄສະນາ) ໃຫ້ແກ່ກົມພັດທະນາສີມືແຮງງານ ແລະ ຈັດຫາງານ ລວມເຖິງສູນບໍລິການຈັດຫາງານ ແລະ 9 ຈຸດບໍລິການຈັດຫາງານ.

ນອກນີ້ ຍັງໄດ້ສ້າງຄູ່ມືການບໍລິການຈັດຫາງານ ໂດຍສະເພາະການບໍລິການຜູ້ທີ່ກຳລັງຊອກວຽກ ແລະ ຜູ້ໃຊ້ແຮງງານ ສ້າງນິຕິກໍາ ເພື່ອສົ່ງເສີມວຽກຈຸດບໍລິການຈັດຫາງານ ແລະ ກໍານົດພາລະບົດບາດ ແລະ ໜ້າວຽກຂອງຈຸດບໍລິການຈັດການ ສ້າງແຜນດໍາເນີນງານການໂຄສະນາເຜີຍແຜ່ວຽກງານຈຸດບໍລິການຈັດຫາງານ ແລະ ດໍາເນີນການໂຄສະນາເຜີຍແຜ່ວຽກງານຈຸດບໍລິການຈັດຫາງານ.

ໂດຍ: ສະຫະລັດ ວອນທິວົງໄຊ