ອີງຕາມແຈ້ງການຂອງກະຊວງອຸດສາຫະກໍາ ແລະ ການຄ້າ ເລກທີ 1328/ອຄ.ທຄວ ລົງວັນທີ 13 ກໍລະກົດ 2015 ຊຶ່ງໄດ້ລະບຸໄວ້ຢ່າງຊັດເຈນກ່ຽວກັບອາຊີບທີ່ຕ້ອງສະຫງວນສິດໄວ້ໃຫ້ປະຊາຊົນລາວທີ່ຖືສັນຊາດລາວ ແລະ ຈະບໍ່ອານຸຍາດໃຫ້ຄົນຕ່າງປະເທດທີ່ເຂົ້າມາດໍາເນີນທຸລະກິດຢູ່ໃນ ສປປ ລາວ ດຳເນີນທຸລະກິດຕ່າງໆທີ່ລະບຸໄວ້.
ທັງນີ້ ອາຊີບທີ່ລະບຸໄວ້ໃນພາກການຄຸ້ມຄອງເຫັນວ່າຍັງບໍ່ສາມາດຄຸ້ມຄອງ ແລະ ປະຕິບັດໄດ້ ເນື່ອງຈາກຄົນສັນຊາດອື່ນໄດ້ເຂົ້າມາປະກອບທຸລະກິດດັ່ງກ່າວຢ່າງຫຼວງຫຼາຍ ໂດຍບໍ່ມີມາດຕາການລົງໂທດ ຫຼື ສັ່ງຫ້າມໃຫ້ຄົນຕ່າງຊາດເຂົ້າມາປະກອບອາຊີບທີ່ສະ ຫງວນໄວ້ໃຫ້ຄົນລາວ ຊຶ່ງອາຊີບທີ່ສະຫງວນໄວ້ໃຫ້ແກ່ປະຊາຊົນລາວ 37 ອາຊີບປະກອບມີດັ່ງນີ້.
- ເກັບເຄື່ອງປ່າຂອງດົງ ຫຼື ພືດພັນຈາກປ່າໄມ້
- ການຕ່ຳແຜ່ນແພ
- ການຖັກ ແລະ ແສ່ວຜ້າແພ
- ການຜະລິດ ຜະລິດຕະພັນຈາກໄມ້ ຫວາຍ ເຟືອງ ແລະ ວັດຖຸຈັກສານ
- ການເຄື່ອນໄຫວບໍລິການກ່ຽວກັບການພິມ
- ການຜະລິດເຄື່ອງປັ້ນດິນເຜົາ ແລະ ຖ້ວຍຊາມ
- ການຜະລິດເຄື່ອງເອປະດັບ ແລະ ສິ້ນສ່ວນ
- ການຜະລິດເຄື່ອງເອ້ທຽມ ແລະ ສິ້ນສ່ວນປະກອບ
- ການຜະລິດ ຖ່າຍເທກຳລັງ ແລະ ແຈກຢາຍກະແສໄຟຟ້າ
- ການຕິດຕັ້ງໄຟຟ້າ
- ການຕິດຕັ້ງທໍ່ສົ່ງນ້ຳ ເຄື່ອງເຮັດຄວາມຮ້ອນ ແລະ ເຄື່ອງປັບອາກາດ
- ການຄ້າຂາຍຍົກທີ່ໃຊ້ທຶນຈົດທະບຽນຕ່ຳກວ່າ 4 ຕື້ກີບລົງມາ
- ການຄ້າຂາຍຍ່ອຍທີ່ໃຊ້ທຶນຈົດທະບຽນຕ່ຳກວ່າ 4 ຕື້ກີບລົງມາ
- ການຂົນສົ່ງໂດຍສານທາງບົກພາຍໃນຕົວເມືອງ ຫຼື ຊານເມືອງ
- ການຂົນສົ່ງໂດຍສານທາງບົກອື່ນໆ (ຍົກເວັ້ນບໍລິການແທັກຊີມິເຕີ)
- ການເຄື່ອນໄຫວບໍລິການປະຈຳວັນໃຫ້ການຂົນສົ່ງທາງບົກ
- ການເຄື່ອນໄຫວໃຫ້ທີ່ພັກເຊົາໄລຍະສັ້ນ (ເຮືອນພັກ ຫຼື ໂຮງແຮມລະດັບ 3 ດາວລົງມາ)
- ການພິມ ຂ່າວສານໜັງສືພິມ ບົດຄວາມ ແລະ ວາລະສານ
- ການເຄື່ອນໄຫວດ້ານສະຖາປັດຕະຍະກຳ ວິສະວະກອນ ແລະ ການໃຫ້ຄຳປຶກສາດ້ານເຕັກນິກ
- ການເຄື່ອນໄຫວຈັດພິມ ບົດເພງ ແລະ ບັນທຶກສຽງ
- ທຸລະກິດການສ້າງຕັ້ງສະຖານີວິທະຍຸຢູ່ໃນຊຸມຊົນ
- ທຸລະກິດການສ້າງຕັ້ງໂທລະພາບຢູ່ໃນຊຸມຊົນ
- ຄັງເງິນ ກອງທຶນ ແລະ ກົງຈັກການເງິນອື່ນໆ
- ການໃຫ້ສິນເຊື່ອ ກູ້ຢືມເງິນອື່ນໆ (ສະເພາະທຸລະກິດໂຮງຊວດຈຳ)
- ການປະດັບປະດາສະຖານທີ່ ແລະ ກິດຈະກຳກ່ຽວກັບການຕິດຕັ້ງລະບົບໄຟ ແສງ ສີ ແລະ ສຽງ
- ການເຄື່ອນໄຫວກິດຈະກຳແປພາສາລາວ
- ການເຄື່ອນໄຫວຂອງອົງການຈັດຫາງານ
- ການເຄື່ອນໄຫວບໍລິການຕ້ອນຮັບອື່ນໆ (ແຫຼ່ງທ່ອງທ່ຽວສະເພາະໃດໜຶ່ງ)
- ການອະນາໄມຮັກສາຄວາມສະອາດໃນຕຶກ-ອາຄານທົ່ວໄປ
- ການສຶກສາດ້ານເຕັກນິກ ແລະ ວິຊາຊີບ
- ທຸລະກິດສອນພາສາລາວໃຫ້ຄົນຕ່າງປະເທດ
- ຫ້ອງກວດພະຍາດ ເອກະສານແຕ່ລະປະເພດ
- ທຸລະກິດສ້ອມແປງເກີບ ແລະ ເຄື່ອງໜັງ
- ບໍລິການຊັກປຽກ-ຊັກແຫ້ງປະເພດແຜ່ນແພ ແລະ ຜະລິດຕະພັນຂົນສັດ
- ບໍລິການດັດຜົມ ແລະ ເສີມຄວາມງາມ (ທີ່ບໍ່ແມ່ນສັນຍະກຳ)
- ບໍລິການຈັດງານປົງສົບ ແລະ ກິດຈະການທີ່ກ່ຽວພັນ
- ທຸລະກິດການສ້າງຕັ້ງສຳນັກພິມຕ່າງໆ
ໂດຍ: ສະຫະລັດ ວອນທິວົງໄຊ
ຮູບພາບ: (ພາບປະກອບຈາກອິນເຕີເນັດ)