ທາງການອິນໂດເນເຊຍພວມຮ່າງແຜນງົບປະມານເງິນລົງທຶນໃນໂຄງການເມກະໂປຣເຈັກຄັ້ງໃຫຍ່ສຸດຂອງປະເທດ ມູນຄ່າ 412.000 ລ້ານໂດລາສຳລັບການກໍ່ສ້າງໂຄງການຕ່າງໆໃນທົ່ວປະເທດ ໃນນັ້ນ ລວມມີໂຄງການກໍ່ສ້າສະໜາມບິນ 25 ແຫ່ງ ແລະ ໂຮງງານໄຟຟ້າອີກຫຼາຍແຫ່ງ.
ໂດຍອ້າງການເປີດເຜີຍຂອງລັດຖະມົນຕີກະຊວງການວາງແຜນພັດທະນາແຫ່ງຊາດທີ່ລະບຸວ່າ ການລົງທຶນໃນຄັ້ງນີ້ຖືເປັນການໃຊ້ ເງິນທຶນຈຳນວນມະຫາສານທີ່ສຸດໃນປະຫວັດສາດຂອງປະເທດ ປະມານ 5.957 ລ້ານລ້ານຣູເປຍ (ສະກຸນເງິນອິນໂດເນເຊຍ) ຊຶ່ງຈະຄວບຄຸມໃນໄລຍະເວລາແຕ່ປີ 2020-2024 ໂດຍ 40% ຂອງຈຳນວນເງິນດັ່ງກ່າວແມ່ນເປັນການລົງທຶນຂອງລັດຖະບານ ສ່ວນ 25% ເປັນການລົງທຶນຜ່ານລັດວິສາຫະກິດ ແລະ ສ່ວນທີ່ເຫຼືອແມ່ນຈະເປີດໂອກາດໃຫ້ພາກເອກະຊົນໄດ້ມີສ່ວນຮ່ວມໃນການລົງທຶນ.
ປັດຈຸບັນ GDP ຂອງອິນໂດເນເຊຍຂະຫຍາຍຕົວຢູ່ທີ່ປະມານ 5% ຕໍ່ປີ ຂະນະທີ່ລັດຖະບານໄດ້ຕັ້ງເປົ້າໃຫ້ເຕີບໂຕທີ່ 5,3-5,6% ໃນປີຕໍ່ໄປ ທັງນີ້ ຂໍ້ມູນຈາກເວັບໄຊ Indonesia-investments.com ໄດ້ລະບຸວ່າ ອິນໂດເນເຊຍຍັງຄົງຢູ່ໃນສະຖານະຂາດດຸນການຄ້າຢູ່ທີ່ປະມານ 5,5 ພັນລ້ານໂດລາ ຊຶ່ງໃນໄລຍະຜ່ານມາຫຼາຍໂຄງການຂອງອິນໂດເນເຊຍມັກຖືກໂຈະ ຫຼື ດຳເນີນການຊັກຊ້າ ຊຶ່ງເກີດຈາກຫຼາຍປັດໄຈ ແລະ ທີ່ເຫັນໄດ້ຢ່າງຊັດເຈນກໍຄື ໂຄງການລົດໄຟຟ້າສາຍທຳອິດຂອງປະເທດ (Jakarta MRT) ທີ່ຫາກໍເປີດໃຫ້ບໍລິການເມື່ອເດືອນມີນາຜ່ານມາ ທັງນີ້ ຈາຣກາຕາແມ່ນມີແຜນກໍໍ່ສ້າງໂຄງການດັ່ງກ່າວມາແຕ່ປີ 1980.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: posttoday