ໂດຍອີງຕາມຂໍ້ມູນຈາກກະຊວງສຶກສາທິການ ແລະ ກີລາ ຊຶ່ງໄດ້ເປີດເຜີຍເມື່ອບໍ່ດົນມານີ້ວ່າ ປີ 2019 ກະຊວງສຶກສາທິການ ແລະ ກີລາຈະສຸມໃສ່ໜ້າວຽກກ່ຽວກັບການຂະຫຍາຍໂອກາດການເຂົ້າເຖິງການຮ່ຳຮຽນຂອງນັກຮຽນໃນສະຖາບັນການສຶກສາຊັ້ນສູງ ລວມທັງຈະສືບຕໍ່ປະຕິບັດນະໂຍບາຍມອບທຶນການສຶກສາໃຫ້ແກ່ນັກຮຽນດີ-ຮຽນເກັ່ງ (ເພດຍິງ) ແລະ ຜູ້ດ້ອຍໂອກາດທີ່ຄອບຄົວ ທຸກຍາກ.
ໃນນັ້ນ 20% ແມ່ນຈະໄດ້ຮັບເບ້ຍລ້ຽງຈາກລັດຖະບານ ໂດຍແບ່ງອອກເປັນ 10% ແມ່ນມອບໃຫ້ມະຫາວິທະຍາໄລຄົ້ນຄວ້າ ແລະ ຄັດເລືອກ ແລະ 10% ແມ່ນຈະມອບໃຫ້ພະແນກສຶກສາທິການ ແລະ ກີລາຂອງແຕ່ລະແຂວງເປັນຜູ້ຄົ້ນຄວ້າ ແລະ ຄັດເລືອກ ສ່ວນທີ່ເຫຼືອ 80% ແມ່ນຈະຕ້ອງໄດ້ຈ່າຍຄ່າຮຽນ.
ພ້ອມນີ້ ກໍຈະສຸມໃສ່ວຽກງານຊຸກຍູ້ແລກປ່ຽນ ແລະ ຮ່ວມມືກັບຕ່າງປະເທດ ໂດຍສະເພາະການແລກປ່ຽນລະຫວ່າງຄູ-ອາຈານ ແລະ ນັກສຶກສາ ເພື່ອພັດທະນາການສຶກສາຊັ້ນສູງໃຫ້ມີຄຸນນະພາບທຽບເທົ່າລະດັບສາກົນ ປັດຈຸບັນ ສປປ ລາວ ມີສະຖາບັນການສຶກສາ ຊັ້ນສູງທັງໝົດ 80 ແຫ່ງ ໃນນັ້ນ ພາກລັດມີ 21 ແຫ່ງ ແລະ ເອກະຊົນມີ 59 ແຫ່ງ.
ໂດຍ: ສະະຫະລັດ ວອນທິວົງໄຊ
ຮູບພາບ: ວຽງຈັນທາມ