ປີ 2018 ມູນຄ່າການສົ່ງອອກພາຍໃຕ້ສິດທິພິເສດທາງການຄ້າຂອງ ສປປ ລາວ ບັນລຸໄດ້ປະມານ 1,31 ຕື້ໂດລາ ກວມເອົາ 24.30% ຂອງມູນຄ່າການສົ່ງອອກທັງໝົດ ຊຶ່ງມີມູນຄ່າ 5,41 ຕື້ໂດລາ ອີງຕາມສູນຂໍ້ມູນ-ຂ່າວສານທາງດ້ານການຄ້າຂອງ ສປປ ລາວ ເມື່ອອາທິດຜ່ານມາ ສ່ວນມູນຄ່າການນຳເຂົ້າພາຍໃຕ້ສິດທິພິເສດທາງການຄ້າປະຕິບັດໄດ້ພຽງ 613,83 ລ້ານໂດລາກວມເອົາ 10.80% ຂອງມູນຄ່າການນໍາເຂົ້າທັງໝົດຂອງ ສປປ ລາວ ທີ່ມີມູນຄ່າ 5,84 ຕື້ໂດລາ.
ທັງນີ້ ກົມການນໍາເຂົ້າ ແລະ ສົ່ງອອກ ກະຊວງອຸດສາຫະກໍາ ແລະ ການຄ້າ ໄດ້ສຳເລັດການສັງລວມສະຖິຕິການນຳເຂົ້າ-ສົ່ງອອກ ພາຍໃຕ້ສິດທິພິເສດທາງການຄ້າປະຈໍາປີ 2018 ໃນນັ້ນ ການນຳເຂົ້າ ແລະ ສົ່ງອອກ ພາຍໃຕ້ສິດທິພິເສດທາງການຄ້າແບ່ງອອກເປັນ 02 ຮູບແບບຄື ແບບຝ່າຍດຽວ (ລະບົບສິດທິພິເສດທົ່ວໄປ ຫຼື Generalized System of Preferences: GSP) ແລະ ແບບຕອບແທນກັນ ຫຼື ຕ່າງຝ່າຍຕ່າງໄດ້ຮັບຜົນປະໂຫຍດ (ສັນຍາການຄ້າເສລີ ຫລື Free Trade Agreement: FTA).
ບັນດາປະເທດທີ່ ສປປ ລາວ ສົ່ງອອກພາຍໃຕ້ສິດທິພິເສດທາງການຄ້າມີທັງໝົດ 37 ປະເທດ ໃນນັ້ນ ປະເທດທີ່ມີການສົ່ງອອກໄປຫຼາຍກວ່າໝູ່ແມ່ນ ໄທ ສສ ຫວຽດນາມ ແລະ ສປ ຈີນ ມູນຄ່າປະມານ 425,86 ລ້ານໂດລາ 332,85 ລ້ານໂດລາ ແລະ 250,95 ລ້ານໂດລາຕາມລຳດັບ ຊຶ່ງກຸ່ມສິນຄ້າທີ່ສົ່ງອອກຫຼາຍກວ່າໝູ່ສາມອັນດັບຕົ້ນແມ່ນກຸ່ມສິນຄ້າອຸດສາຫະກຳ ມີມູນຄ່າປະມານ 637,56 ລ້ານໂດລາ ຮອງລົງມາແມ່ນກຸ່ມສິນຄ້າພືດກະສິກຳ ມູນຄ່າປະມານ 406,94 ລ້ານໂດລາ ແລະ ກຸ່ມສິນຄ້າຜະລິດຕະພັນແຮ່ທາດ ມູນຄ່າປະມານ 89,50 ລ້ານໂດລາ.
ສ່ວນປະເທດທີ່ ສປປ ລາວ ນໍາເຂົ້າພາຍໃຕ້ສິດທິພິເສດທາງການຄ້າມີທັງໝົດ 39 ປະເທດ ໃນນັ້ນ ປະເທດທີ່ ສປປ ລາວ ມີການນຳເຂົ້າຫຼາຍກວ່າໝູ່ ແມ່ນ ໄທ ສປ ຈີນ ແລະ ສສ.ຫວຽດນາມ ມູນຄ່າການນຳເຂົ້າປະມານ 329,04 ລ້ານໂດລາ 79,58 ລ້ານໂດລາ ແລະ 76,39 ລ້ານ ໂດລາຕາມລຳດັບ ສຳລັບສາມກຸ່ມສິນຄ້າທີ່ມີມູນຄ່າການນຳເຂົ້າຫຼາຍກວ່າໝູ່ແມ່ນກຸ່ມສິນຄ້າພາຫະນະຊິ້ນສ່ວນ ແລະ ອາໄຫຼ່ ມູນຄ່າ 369,16 ລ້ານໂດລາ ກຸ່ມສິນຄ້າເຄື່ອງກໍ່ສ້າງ ມູນຄ່າ 85,41 ລ້ານໂດລາ ແລະ ກຸ່ມສິນຄ້າເຄື່ອງນຸ່ງຫົ່ມ ເຄື່ອງໃຊ້ສອຍປະຈຳວັນ ມູນຄ່າ 64,14 ລ້ານໂດລາ.
ຢ່າງໃດກໍດີ ການສົ່ງອອກພາຍໃຕ້ສິດທິພິເສດທາງການຄ້າແບບຝ່າຍດຽວ ແລະ ແບບຕອບແທນກັນ ກໍເຫັນວ່າການນຳໃຊ້ສິດທິພິເສດແບບຝ່າຍດຽວແມ່ນມີມູນຄ່າພຽງ 278,60 ລ້ານໂດລາ ຂະນະທີ່ການສົ່ງອອກແບບຕອບແທນກັນປະຕິບັດໄດ້ 1,03 ຕື້ໂດລາ ການສົ່ງອອກແບບຕອບແທນກັນກວມເອົາອັດຕາສ່ວນຫຼາຍກວ່າການສົ່ງອອກແບບຝ່າຍດຽວຊຶ່ງສູງເຖິງ 78.77%.
ໂດຍ: ສະຫະລັດ ວອນທິວົງໄຊ