ເມື່ອວັນທີ 4 ພຶດສະພາຜ່ານມາ ກຸ່ມບໍລິສັດ ຄຣີດ ແລະ ອານັນດີ ໄດ້ເປີດນຳໃຊ້ຫ້ອງການຂາຍໂຄງການອະຣາຕະໄຊເສດຖາຢ່າງເປັນທາງການ ຊຶ່ງເປັນໂຄງການອະສັງຫາລິມມະຊັບແຫ່ງທຳອິດຂອງຢີ່ປຸ່ນໃນລາວ ທັງເປັນຫ້ອງການເພື່ອແນະນໍາ ແລະ ໃຫ້ຂໍ້ມູນກ່ຽວກັບໂຄງການກໍ່ສ້າງ ແລະ ການອອກແບບບ້ານ ໂຄງການດັ່ງກ່າວຕັ້ງຢູ່ບ້ານໂພນທັນ ເມືອງໄຊເສດຖາ ນະຄອນຫຼວງວຽງຈັນ.
ທ່ານ ໂທຊິຮິໂກ ມູນິໂຢຊິ ຜູ້ອຳນວຍການກຸ່ມບໍລິສັດ ຄຣີດ ກ່າວວ່າ ກຸ່ມບໍລິສັດຄຣີດ ເປັນກຸ່ມບໍລິສັດອະສັງຫາລິມະຊັບແນວໜ້າຂອງປະເທດຢີ່ປຸ່ນ ມີປະສົບການຫຼາຍກວ່າ 20 ປີ ມີໂຄງການທີ່ປະສົບຜົນສຳເລັດໃນ 9 ປະເທດ ແລະ ລົງທຶນໃນຕະຫຼາດອະສັງຫາລິມະຊັບທີ່ກໍາລັງຂະຫຍາຍຕົວຢູ່ປະເທດກຳປູເຈຍ ມາເລເຊຍ ຫວຽດນາມ ບັງກາລາເທດ ແລະ ລາວ ໂຄງການທີ່ຢູ່ອາໄສອະຣາຕະໄຊເສດຖາ ແມ່ນໂຄງການທຳອິດຂອງ ຄຣີດ ໃນ ສປປ ລາວ ຊຶ່ງເປັນໂຄງການຮ່ວມລົງທຶນກັບກຸ່ມບໍລິສັດ ອານັນດີ ລາວ ຈຳກັດ ໂຄງການທຳອິດແມ່ນໂຄງການທີ່ຢູ່ອາໄສຊຸມຊົນ ຢູ່ດ້ານຫຼັງສູນການຄ້າ ລາວ-ໄອເຕັກ ແລະ ຢູ່ໃກ້ບຶງທາດຫລວງ ທັງນີ້ ໂຄງການຈະເລີ່ມກໍ່ສ້າງພາຍໃນປີ 2019 ແລະ ຈະໃຫ້ສຳເລັດໃນປີ 2021.
ໂອກາດດຽວກັນ ທ່ານ ນາງ ຊູມຽນ ເດດປັນຍາ ຜູ້ອຳນວຍການກຸ່ມບໍລິສັດ ອານັນດີ ກ່າວວ່າ ກຸ່ມບໍລິສັດອານັນດີທີ່ມີສຳນັກງານໃຫຍ່ຕັ້ງຢູ່ສິງກະໂປໄດ້ເລີ່ມຫຼາຍໂຄງການຢ່າງຕໍ່ເນື່ອງ ໃນນີ້ ລວມທັງໂຄງການ ອານັນດີ ລີເວີວິວ ຊຶ່ງເລີ່ມຈັດຕັ້ງປະຕິບັດໃນເດືອນກຸມພາ 2018 ແລະ ຈະສໍາເລັດໃນປີ 2019 ຊຶ່ງທັງສອງກຸ່ມບໍລິສັດໄດ້ນຳເອົາວິທີການ ແລະ ມາດຕະຖານຂອງຍີ່ປຸ່ນເຂົ້າໃນການຄຸ້ມຄອງຄຸນນະພາບການກໍ່ສ້າງ ແລະ ການອອກແບບໂຄງການ ເປົ້າໝາຍສຳຄັນຂອງກຸ່ມບໍລິສັດ ຄຣີດ ແມ່ນຕ້ອງກາຍເປັນສ່ວນໜຶ່ງຂອງຖານເສດຖະກິດທີ່ຂະຫຍາຍຕົວໄວທີ່ສຸດໃນການສະໜັບສະໜູນຂະແໜງການພັດທະນາອະສັງຫາລິມະຊັບ ທັງຕອບສະໜອງໂຄງການພັດທະນາທີ່ຢູ່ອາໄສທີ່ຕິດເສັ້ນທາງ 450 ປີ ແລະເຂດດອນນົກຂຸ້ມຈະກາຍເປັນສູນກາງທາງທຸລະກິດ-ການຄ້າ ຂອງນະຄອນຫລວງວຽງຈັນໃນອະນາຄົດ.
“ອະຣາຕະ” ໃນພາສາຍີ່ປຸ່ນແປວ່າ “ໃໝ່” ເປັນການນຳເອົາແນວຄວາມຄິດໃໝ່ທີ່ເໝາະສົມ ແລະ ສອດຄ່ອງກັບການປ່ຽນແປງໃໝ່ຂອງການໃຊ້ຊີວິດຂອງຄົນລາວໃນປັດຈຸບັນ ອະຣາຕະໄຊເສດຖາ ປະກອບມີ 108 ຫຼັງ ມີແບບບ້ານໃຫ້ເລືອກຫຼາກຫຼາຍເຊັ່ນ ບ້ານຫ້ອງແຖວຢູ່ອາໄສ 2 ຊັ້ນ ບ້ານຫ້ອງແຖວ 3 ຊັ້ນ ສາມາດຄ້າຂາຍໄດ້ ແລະ ບ້ານດ່ຽວວິນລາ 2 ຊັ້ນ ໃນລາຄາເລີ່ມຕົ້ນພຽງແຕ່ 95.789 ໂດລາສະຫະລັດ ນອກນັ້ນ ຍັງມີສະຖານທີ່ຕ່າງໆເຊັ່ນ ສະລອຍນໍ້າຊຸມຊົນ ສະລອຍນໍ້າເດັກນ້ອຍ ສະໜາມເດັກຫຼີ້ນ ມິນິມາກ ສູນອອກກຳລັງກາຍ ແລະ ການຮັກສາຄວາມປອດໄພ 24 ຕະຫຼອດຊົ່ວໂມງ ຫ່າງຈາກສູນການຄ້າ ລາວ-ໄອເຕັກ ພຽງ 4 ກີໂລແມັດ ພ້ອມນີ້ ກໍເປັນຈຸດທີ່ມີບໍລິສັດ ແລະຫ້າງຮ້ານຕ່າງໆທີ່ທັນສະໄໝອີກດ້ວຍ.
ໂດຍ: ສະຫະລັດ ວອນທິວົງໄຊ