ຫລາຍກວ່າ 110 ຮ້ານ ຮວ່ມວາງສະແດງ ແລະ ຈຳໜ່າຍສິນຄ້າ ໜຶ່ງເມືອງ ໜຶ່ງຜະລິດຕະພັນ(ໂອ ດັອບ) ແລະ ສິນຄ້າຄອບຄົວຕົວແບບ ຂອງນະຄອນຫລວງວຽງຈັນ ຄັ້ງທີ VI ໃນລະຫວ່າງວັນທີ 27 ເມສາ ຫາ 5 ພຶດສະພາ 2019 ຢູ່ ສູນການຄ້າ ລາວ-ໄອເຕັກ ນະຄອນຫລວງວຽງຈັນ.
ງານຄັ້ງນີ້, ໄດ້ນຳເອົາສິນຄ້າຫລາກຫລາຍປະເພດ ມາວາງສະແດງ ແລະ ຈຳໜ່າຍ ເປັນຕົ້ນ ອາຫານ, ເຄື່ອງດື່ມ, ເຄື່ອງຫັດຖະກຳ, ຢາພື້ນເມືອງ, ໄມ້ແກະສະຫລັກ, ເຄື່ອງເງິນ, ກະເປົາ, ເສື້ອຜ້າ, ສິ້ນ, ຜ້າບ່ຽງຝ້າຍ-ໄໝ ແລະ ອື່ນໆ ຈາກຫົວໜ່ວຍທຸລະກິດ ທີ່ເຂົ້າຮ່ວມທັງໝົດ 123 ຫົວໜ່ວຍ, ມີ 116 ຮ້ານ. ໃນນັ້ນ, ສິນຄ້າໜຶ່ງເມືອງ ໜຶ່ງຜະລິດຕະພັນ (ໂອດັອບ) ມີ 42 ຫົວໜ່ວຍ, ສິນຄ້າຄອບຄົວຕົວແບບ 57 ຫົວໜ່ວຍ, ຫົວໜ່ວຍທຸລະກິດທ່ອງທ່ຽວ 4 ຫົວໜ່ວຍ, ສິນຄ້າກະສິກຳ ປະເພດເບ້ຍໄມ້ 17 ຫົວໜ່ວຍ. ນອກນັ້ນ, ຍັງມີສິນຄ້າ ໂອດັອບ ແລະ ສິນຄ້າຄອບຄົວຕົວແບບ ຈາກບັນດາແຂວງ ໃນຂອບເຂດທົ່ວປະເທດ ຈຳນວນ 24 ຫົວໜ່ວຍ.
ຈຸດປະສົງ ຂອງການຈັດງານໃນຄັ້ງນີ້, ແນໃສ່ສ້າງກິດຈະກຳຕອນຮັບວັນກຳມະກອນສາກົນ ແລະ ປີທ່ອງທ່ຽວ ລາວ-ຈີນ 2019 ໃຫ້ເປັນຂະບວນຟົດຟື້ນ ທັງເປັນການຍູ້ໜູນຜະລິດຕະພັນພາຍໃນ ກ້າວໄປສູ່ການພັດທະນາແບບຢືນຍົງ ໃຫ້ສາມາເຂົ້າເຖິງຕະຫລາດເປົ້າໝາຍໄດ້, ສ້າງຄວາມເຂັ້ມ ແຂງໃຫ້ຫົວໜ່ວຍທຸລະກິດ ທີ່ເຮັດການຜະລິດ ສາມາດເຂົ້າຕະຫລາດ ເພື່ອຈຳໜ່າຍ ແລະ ຈັບຄູ່ທຸລະກິດຮ່ວມກັນ. ສິ່ງສຳຄັນແມ່ນຊ່ວຍຊຸກຍູ້ໃຫ້ທຸລະກິດຄອບຄົວຕົວແບບ ໃຫ້ມີການພັດທະນາຕົນເອງ ໃນການຄຸ້ມຄອງບໍລິຫານການຜະລິດສິນຄ້າຂອງຕົນ, ສ້າງມູນຄ່າເພີ້ມໃຫ້ແກ່ສິນຄ້າໜຶ່ງເມືອງ ໜຶ່ງຜະລິດ ຕະພັນ ແຫ່ງຊາດ ໃຫ້ເປັນທີຍອມຮັບຂອງສັງຄົມ, ສາມາດເປັນແຫລ່ງລາຍຮັບ ແລະ ສ້າງຄວາມເຂັ້ມ ແຂງໃຫ້ແກ່ຫົວໜ່ວຍທຸລະກິດໂອດັອບ.
ໃນລະຫວ່າງເປີດງານວາງສະແດງ-ຈຳໜ່າຍສິນຄ້າ ຍັງໄດ້ຈັດສຳມະນາ ແລກປ່ຽນບົດຮຽນໃຫ້ຫົວໜ່ວຍສິນຄ້າທີ່ໄດ້ຮັບກາໝາຍ ໂອດັອບ ແລະ ຫົວໜ່ວຍຄອບຄົວຕົວແບບ ໃນຫົວຂໍ້ “ການພັດທະ ນາຜະລິດຕະພັນເຂົ້າຫາຕະຫລາດ, ການສ້າງຍີ່ຫໍ້ເຄື່ອງໝາຍການຄ້າ ແລະ ການເຂົ້າຫາແຫລ່ງທຶນ”.
ຂຽນໂດຍ: ສະຫະລັດ ວອນທິວົງໄຊ