ໃນເມື່ອບໍ່ດົນຜ່ານມານີ້, ທີ່ສູນກາງແນວລາວສ້າງຊາດ ໄດ້ຈັດງານມອບໃບຍ້ອງຍໍ ໃຫ້ຜູ້ທີ່ມີຜົນງານດີເດັ່ນ ໃນການປະກອບສ່ວນເຂົ້າໃນກອງປະຊຸມຜູ້ຊົງຄຸນວຸດທິບັນດາເຜົ່າທົ່ວປະເທດຄັ້ງທີ 3 ປີ 2018, ກອງປະຊຸມອົງການພຸດທະສາສະໜາ 3 ອພສ ລາວ, ຫວຽດນາມ ແລະ ກຳປູເຈຍ ພາຍໃຕ້ການເປັນປະທານຂອງ ທ່ານ ຄຳໃບ ດຳລັດ ຮອງປະທານສູນກາງແນວລາວສ້າງຊາດ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ການມອບໃບຍ້ອງຍໍລັດຖະບານ ໃຫ້ພະນັກງານ-ລັດຖະກອນ ແລະ ຄະນະຮັບຜິດຊອບຈັດກອງປະຊຸມດັ່ງກ່າວຄັ້ງນີ້, ມີຈຳນວນ 118 ທ່ານ ທີ່ມີຜົນງານຄຸນງາມຄວາມດີ ປະກອບສ່ວນເຂົ້າໃນການກະກຽມ ແລະ ຮັບໃຊ້ກອງປະຊຸມຜູ້ຊົງຄຸນວຸດທິບັນດາເຜົ່າທົ່ວປະເທດ ຄັ້ງທີ 3 ປີ 2018 ແລະ ກອງປະຊຸມອົງການພຸດທະສາສະໜາ 3 ປະເທດ ລາວ-ຫວຽດນາມ ແລະ ກຳປູເຈຍ. ນອກຈາກນີ້, ຍັງໄດ້ຮັບຟັງການຜ່ານຂໍ້ຕົກລົງວ່າດ້ວຍການແຕ່ງຕັ້ງ ສັບຊ້ອນໜ້າທີ່ໃໝ່ໃຫ້ພະນັກງານສູນກາງແນວລາວສ້າງຊາດ ອີກ ຈຳນວນໜຶ່ງ.
ໃນໂອກາດນີ້, ທ່ານ ຄຳໃບ ດຳລັດ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານຄຸນງາມຄວາມດີ ຂອງພະນັກງານ-ລັດຖະກອນ, ທີ່ໄດ້ປະກອບສ່ວນເຂົ້າໃນກອງປະຊຸມດັ່ງກ່າວ ໃຫ້ມີຜົນສຳເລັດຕາມແຜນ ແລະ ໄດ້ນຳພາວຽກງານແນວຄິດຕໍ່ສະມາຊິກພັກ-ພະນັກງານ ທັງໝົດໃນການເລື່ອນຊັ້ນ, ຊັບຊ້ອນ ແລະ ຍົກຍ້າຍຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ.
ຂຽນໂດຍ: ສະຫະລັດ ວອນທິວົງໄຊ