ລັດຖະບານເກົາຫຼີເໜືອ ອ້າງຄວາມສຳເລັດໃນການທົດສອບປະສິດທິພາບຂອງ “ອາວຸດນຳວິຖີທາງຍຸດທະວິທີ” ຮຸ່ນໃໝ່ຫຼ້າສຸດ ທີ່ສາມາດຕິດຕັ້ງຫົວຮົບໄດ້ ໃນຊ່ວງໄລຍະທີ່ຄວາມສຳພັນກັບສະຫະລັດກັບມາເຄັ່ງຕຶງອີກຄັ້ງ ຫຼັງຈາກທີ່ມີການພົບປະຫາລືກັນທີ່ນະຄອນຫຼວງຮ່າໂນ້ຍ ປະເທດຫວຽດນາມ ໃນທ້າຍເດືອນ ກຸມພາ 2019 ທີ່ຜ່ານມາ ແຕ່ຢຸດຕິກ່ອນກຳນົດ ແລະ ບໍ່ມີຂໍ້ສະຫຼຸບ.
ສຳນັກຂ່າວຕ່າງປະເທດລາຍງານຈາກນະຄອນຫຼວງໂຊລ ປະເທດເກົາຫຼີໃຕ້ ເມື່ອວັນທີ 18 ເມສາ 2019 ວ່າ ສຳນັກຂ່າວກາງເກົາຫຼີເໜືອ ໄດ້ລາຍງານວ່າ ທ່ານ ຄິມ ຈອງ ອຶນ ຜູ້ນຳສູງສຸດເກົາຫຼີເໜືອ ລົງພື້ນທີ່ສະຖາບັນເທັກໂນໂລຢີ ແລະ ວິທະຍາສາດປ້ອງກັນປະເທດ ເພື່ອສັງເກດການທົດສອບປະສິດທິພາບຂອງ “ອາວຸດນຳວິຖີທາງຍຸດທະວິຖີຮຸ່ນໃໝ່” ເຊິ່ງລາຍງານບໍ່ໄດ້ລະບຸຢ່າງຊັດເຈນວ່າມັນຄືສິ່ງໃດ ແຕ່ກ່າວວ່າ “ເປັນການພັດທະນາທີ່ກ້າວໜ້າ” ແລະ ອາວຸດຊະນິດນີ້ສາມາດໃຊ້ຕິດຕັ້ງ “ຫົວຮົບທີ່ຊົງພະລັງ” ໄດ້.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews