ປັດຈຸບັນການຊົມໃຊ້ໄຟຟ້າ ຢູ່ 9 ຕົວເມືອງ ໃນນະຄອນຫລວງວຽງຈັນ, ນັບແຕ່ເດືອນ ມັງກອນ ຫາ ເດືອນມີນາ 2019 ມີກໍາລັງການຊົມໃຊ້ເຖິງ 266.617,5 ລ້ານກິໂລວັດໂມງ, ທຽບໃສ່ໄລຍະດຽວກັນຂອງປີ 2018 ເພີ່ມຂຶ້ນ 12,35%.
ທ່ານ ເຄນ ເທບວົງສາ ຜູ້ຊ່ວຍ ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ຫົວໜ້າຝ່າຍປະຕິບັດການໄຟຟ້ານະຄອນຫລວງວຽງຈັນ ໄດ້ລາຍງານໃຫ້ຮູ້ໃນວັນທີ 20 ມີນາ 2019 ນີ້ວ່າ: ການນຳໃຊ້ໄຟຟ້າ ຢູ່ນະຄອນຫລວງວຽງຈັນ ໃນປັດຈຸບັນ ມີທ່າອ່ຽງເພີ່ມຂຶ້ນເລື້ອຍໆ ໂດຍສະເພາະໃນລະດູຮ້ອນ ເຊິ່ງໃນເດືອນມັງກອນຜ່ານມາ ມີກຳລັງການຊົມໃຊ້ເຖິງ 133.795,8 ກິໂລວັດໂມງ, ສ່ວນເດືອນກຸມ ພາ ມີກຳລັງການຊົມໃຊ້ 132.821,7 ກິໂລວັດໂມງ ທຽບໃສ່ປີ 2018 ເພີ່ມຂຶ້ນຫລາຍເທົ່າຕົວ, ຄາດວ່າແຕ່ນີ້ຮອດເດືອນທັນວາ ອັດຕາການຊົມໃຊ້ໄຟຟ້າອາດຈະເພີ່ມຂຶ້ນ ເນື່ອງສະພາບອາກາດຢູ່ປະເທດເຮົາ ອາດຈະຮ້ອຍຂຶ້ນກວ່າປີຜ່ານມາ. ຢ່າງໃດກໍ່ຕາມ ຕໍ່ກັບສະພາບອາກາດຮ້ອນດັ່ງກ່າວ, ອາດເປັນສາເຫດກໍ່ໃຫ້ເກີດອັກຄີໄພໄດ້ງ່າຍ. ດັ່ງນັ້ນ, ຂໍຝາກເຕືອນໃຫ້ທຸກຄົນໃນສັງຄົມ ມີສະຕິໃນການນຳໃຊ້ໄຟຟ້າເຂົ້າໃນຊີວິດປະຈຳວັນ ໂດຍສະເພາະຕ້ອງໝັ່ນກວດກາລະບົບສາຍໄຟ, ອຸປະກອນເຄື່ອງໃຊ້ໄຟຟ້າພາຍໃນເຮືອນ ແລະ ຄອບຄົວໃຫ້ດີ, ຖ້າພົບເຫັນສາຍໄຟ, ປັກສຽບໄຟ, ເຄື່ອງໃຊ້ໄຟຟ້າ ມີສະພາບເກົ່າຊຸດໂຊມກໍຕ້ອງໃຫ້ປ່ຽນຖ່າຍ ແລະ ມີການປັບປຸງປົວແປງໃຫ້ຮັບປະກັນ ເພື່ອຫລີກລ້ຽງ ການເກີດອັກຄີໄພຕ່າງໆ.
ທ່ານ ເຄນ ເທບວົງສາ ໃຫ້ຮູ້ຕື່ມວ່າ: ປັດຈຸບັນ ລັດວິສາຫະກິດໄຟຟ້າລາວ ພວມຕິດຕັ້ງລະ ບົບວັດແທກ AMI (ໝໍ້ນັບໄຟທັນສະໄໝ, ລະບົບດິຈິິຕອນທີ່ມີໂປແກຣມຄວບຄຸມ) ຢູ່ 4 ຕົວເມືອງເປົ້າໝາຍ ຄື ເມືອງໄຊເສດຖາ, ສີໂຄດຕະບອງ, ສີສັດຕະນາກ ແລະ ເມືອງຈັນທະບູລີ ຈຳນວນ 50 ພັນໜ່ວຍ. ນອກນັ້ນ, ຍັງຈະໄດ້ຕິດຕັ້ງຢູ່ເມືອງໄຊທານີ 16 ພັນໜ່ວຍ, ເຊິ່ງໝໍ້ນັບໄຟດັ່ງກ່າວຈະອຳນວຍຄວາມສະດວກໃນດ້ານຕ່າງໆ ເປັນຕົ້ນ ການວັດແທກຄ່າໄຟ, ການເກັບຄ່າໄຟ, ການຈ່າຍຄ່າໄຟຟ້າ ເຊິ່ງຈະເປັນຜົນດີ ໃຫ້ການຈັດຕັ້ງປະຕິບັດວຽກງານຂອງລັດວິສາຫະກິດໄຟຟ້າລາວ ກໍຄື ຜູ້ຊົມໃຊ້ໄຟ ຟ້າໃຫ້ມີຄວາມສະດວກສະບາຍ, ໂປ່ງໃສວ່ອງໄວ ແລະ ອື່ນໆ.
ຂຽນໂດຍ: ແຟນຊິສ ສະຫວັນຄຳ