ລັດຖະບານໄດ້ໃຫ້ທິດຊີ້ນຳພາກສ່ວນທີ່ກ່ຽວຂ້ອງແຕ່ສູນກາງລົງຮອດທ້ອງຖິ່ນ ຕ້ອງເປັນເຈົ້າການຮ່ວມກັນ
ໃນການຕິດຕາມກວດກາ ແລະ ມີການປະເມີນຜົນຢ່າງລະອຽດບັນດາໂຄງການຂຸດຄົ້ນແຮ່ທາດ, ປູກຢາງພາ
ລາ ແລະ ປູກໄມ້ວິກໃນຂອບເຂດທົ່ວປະເທດ ເປັນຕົ້ນແມ່ນການປະຕິບັດສັນຍາຂອງບໍລິສັດທີ່ເຂົ້າມາລົງທຶນ
ໃຫ້ສຳເລັດ ພ້ອມສາມາດສະຫຼຸບໄດ້ໃນປີໜ້າ.
ກາງປີ 2012 ລັດຖະບານໄດ້ອອກ ຄຳສັ່ງເລກທີ 13/ນຍ ວ່າດ້ວຍການໂຈະພິຈາລະນາ ແລະ ອະນຸຍາດໂຄງການ
ລົງທຶນໃໝ່ສຳລັບການຊອກຄົ້ນ, ສຳຫຼວດແຮ່ທາດ, ການປູກຢາງພາລາ ແລະ ໄມ້ວິກໃນຂອບເຂດທົ່ວປະເທດ
ທັງນີ້ ກໍເພື່ອຕິດຕາມກວດກາປະເມີນຜົນຄືນການຈັດປະຕິບັດຕົວຈິງ ແລະ ຊຸກຍູ້ບັນດາໂຄງການອະນຸມັດໄປ
ແລ້ວຮັບປະກັນການພັດທະນາແບບຍືນຍົງ, ການນຳໃຊ້ຊັບພະຍາກອນທຳມະຊາດຢ່າງມີປະສິດທິຜົນສູງ, ປົກ
ປັກຮັກສາສີ່ງແວດລ້ອມ ແລະ ການສົ່ງເສີມກະສິກຳສະອາດທີ່ຍືນຍົງສອດຄ່ອງກັບແນວທາງນະໂຍບາຍຂອງ
ພັກລັດໃນແຕ່ລະໄລຍະ.
ແນວໃດກໍດີ ໜຶ່ງໃນຫຼາຍປະເດັນທີ່ກອງປະຊຸມລັດຖະບານປະຈຳສົກປີທີ່ຈັດຂຶ້ນ ໃນອາທິດຜ່ານມານີ້ໄດ້ມີທິດຊີ້
ນຳໃຫ້ພວກສ່ວນທີ່ກ່ຽວຂ້ອງ ນຳເອົາຄຳເຫັນຂອງສະມາຊິກລັດຖະບານໄປປັບປຸງຂັ້ນຕອນການປະເມີນຄືນ ບັນ
ດາໂຄງການເຫຼົ່ານັ້ນເປັນຕົ້ນໃຫ້ເອົາໃຈໃສ່ການຕິດຕາມ, ກວດກາ ແລະ ມີການປະເມີນຜົນໃນການຈັດຕັ້ງປະຕິ
ບັດບັນດາໂຄງການຕ່າງໆທີ່ໄດ້ອະນຸມັດໄປແລ້ວນັ້ນ ອັນທີ່ສຳຄັນແມ່ນການເຮັດສັນຍາກັບບໍລິສັດທີ່ເຂົ້າມາລົງ
ທຶນ ຕ້ອງມີຄວາມຮັດກຸມ ເພື່ອບໍ່ໃຫ້ມີຊ່ອງວ່າງ ແລະ ແກ່ຍາວການຈັດຕັ້ງປະຕິບັດໂຄງການ ທັງນີ້ບັນດາຂະ
ແໜງການສູນກາງ ແລະ ທ້ອງຖິ່ນຕ້ອງເປັນເຈົ້າການຮ່ວມກັນ.
ພ້ອມນັ້ນ ກອງປະຊຸມກໍໄດ້ໃຫ້ກະຊວງແຜນການ ແລະ ລົງທຶນສົມທົບກັບພາກສ່ວນທີ່ກ່ຽວຂ້ອງສືບຕໍ່ຄົ້ນຄວ້າ
ລະອຽດເປັນຕົ້ນການປະຕິບັດສັນຍາ ເມື່ອພົບເຫັນບັນຫາຕ້ອງແກ້ໄຂຮ່ວມກັນຫຼີກເວັ້ນການໂຍນຄວາມຮັບຜິດ
ຊອບ ໃຫ້ກັນລະຫວ່າງສູນກາງ ແລະ ທ້ອງຖິ່ນ, ເມື່ອກວດກາພົບເຫັນການກະທຳຜິດກົດໝາຍຕ້ອງຮ່ວມກັນ
ແກ້ໄຂ, ຮ່ວມກັນຈັດຕັ້ງປະຕິບັດກວດກາໃຫ້ສຳເລັດ ແລະ ສາມາດສະຫຼຸບໄດ້ຕາມແຜນການທີ່ໄດ້ວາງໄວ້ຄືໃນປີ
2015.
ແຫລ່ງຂ່າວ: ເສດຖະກິດ – ສັງຄົມ