ການແຂ່ງຂັນຊ່ວງເຮືອກີິລາ 12 ສີພາຍ ແລະ 22 ສີພາຍຍິງ-ຊາຍ ຊ່ວງເຮືອຍາວ 55 ສີພາຍຊາຍ, ເຈັດສະກີ, ລົດວິບາກ ແລະ ພາຣາມໍເຕີ ຊີງຂັນທ່ານນາຍົກລັດຖະມົນຕີ ສປປ ລາວ ຄັ້ງທີ I ຈະຈັດຂຶ້ນທ້າຍເດືອນ ມີນາ 2019, ທີ່ນະຄອນຫຼວງວຽງຈັນ ເພື່ອສ້າງຂະບວນການຕ້ອນຮັບວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 64 ປີ (22 ມີນາ 1955-22 ມີນາ 2019) ທັງເປັນການສົ່ງເສີມປີທ່ອງທ່ຽວ ລາວ-ຈີນ 2019 ໃຫ້ມີບັນຍາກາດຟົດຟື້ນມ່ວນຊື່ນ.
ສະຫະພັນກິລາເຮືອຊ່ວງ ນະຄອນຫຼວງ ແຈ້ງເມື່ອບໍ່ດົນມານີ້ວ່າ: ຄະນະຮັບຜິດຊອບເຮືອຊ່ວງບັນດາພະແນກສະໂມສອນກີິລາ ບ້ານ, ເມືອງ, ແຂວງ, ບໍລິສັດ, ພາກສ່ວນຕ່າງໆ ທົ່ວປະເທດ ແລະ ເຮືອຕ່າງປະເທດທີ່ມີເງື່ອນໄຂ ເຂົ້າຮ່ວມການແຂ່ງຂັນດັ່ງກ່າວ ທີ່ເຂດເສດຖະກິດພິເສດ ບຶງທາດຫຼວງ ເມືອງໄຊເຊດຖາ ນະຄອນຫຼວງວຽງຈັນ ແລະ ຈົ່ງຮີບຮ້ອນມາສະໝັກນຳຄະນະກຳມະການຈັດການແຂ່ງຂັນຢູ່ສະມາຄົມກິລາ-ກາຍຍະກຳ (ສູນກິລາບຶງຂະຫຍອງ ຊັ້ນ 2) ເມືອງ ສີສັດຕະນາກ ນະຄອນຫຼວງວຽງຈັນ ໃນໂມງລັດຖະການ ນັບແຕ່ມື້ປະກາດເຖິງວັນທີ 19 ມີນາ 2019 ເຊິ່ງຄ່າຂົນສົ່ງເຮືອຍາວ 55 ສີພາຍຊາຍ ໃນນະຄອນຫຼວງວຽງຈັນແມ່ນ 1 ລ້ານກີບ ແລະ ຕ່າງແຂວງ 5 ລ້ານກີບ.
ສ່ວນລາງວັນເຮືອກິລາ 12 ແລະ 22 ສີພາຍຍິງ-ຊາຍ: ຊະນະເລີດແມ່ນຈະໄດ້ຮັບຂັນ 1 ໜ່ວຍ ພ້ອມເງິນລາງວັນ 8 ລ້ານກີບ, ຮອງຊະນະເລີດໄດ້ຮັບຂັນ 1 ໜ່ວຍ ພ້ອມເງິນລາງວັນ 6 ລ້ານກີບ, ທີ 3 ໄດ້ຮັບຂັນ 1 ໜ່ວຍ ພ້ອມເງິນລາງວັນ 4 ລ້ານກີບ ແລະ ທີ 4 ໄດ້ຮັບເງິນລາງວັນ 2 ລ້ານກີບ; ປະເພດເຮືອຍາວ 55 ສີພາຍຊາຍ: ຊະນະເລີດໄດ້ຮັບຂັນ 1 ໜ່ວຍ ພ້ອມເງິນລາງວັນ 25 ລ້ານກີບ, ຮອງຊະນະເລີດຮັບຂັນ 1 ໜ່ວຍ ພ້ອມເງິນລາງວັນ 20 ລ້ານກີບ, ທີ 3 ໄດ້ຮັບຂັນ 1 ໜ່ວຍ ພ້ອມເງິນລາງວັນ 18 ລ້ານກີບ ແລະ ທີ 4 ໄດ້ຮັບເງິນລາງວັນ 10 ລ້ານກີບ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່