ກາຍເປັນປະເດັນທີ່ຄົນໃນສັງຄົມໃຫ້ຄວາມສົນໃຈ ຫຼັງຈາກມີຜູ້ໃຊ້ເຟສບຸກທ່ານໜຶ່ງອອກມາໂພສວິດີໂອໃນຂະນະທີ່ແອັດລົດກຳລັງຊັ່ງເຄື່ອງຜູ້ໂດຍສານ ພ້ອມກັບຂໍ້ຄວາມທີ່ວ່າ “ນະວັດຕະກຳໃໝ່ຂອງການຂີ່ລົດເມ ຊັ່ງນໍ້າໜັກເຄື່ອງຂອງຕ່າງໆກິໂລລະ 3.000 ກີບ”. ເລື່ອງດັ່ງກ່າວແມ່ນເກີດຂຶ້ນແທ້ທີ່ສະຖານີຫົວພັນຂົນສົ່ງໂດຍສານ.
ເນື່ອງຈາກຄວາມສົງໃສ ແລະ ຫຼາຍຄຳຖາມທີ່ເກີດຂຶ້ນ ທ່ານ ຄຳສຸ ວິໄຊ ຫົວໜ້າສະຖານີຫົວພັນຂົນສົ່ງໂດຍສານ ໄດ້ໃຫ້ສຳພາດກັບນັກຂ່າວລາວໂພສ ເມື່ອວັນທີ 14 ກຸມພາ 2019 ວ່າ ການເກັບຄ່າເຄື່ອງຈາກຜູ້ໂດຍສານແມ່ນທາງຂົນສົ່ງໂດຍສານຫົວພັນໄດ້ມີການຈັດຕັ້ງປະຕິບັດມາເກືອບປີແລ້ວ ໂດຍອີງໃສ່ຂໍ້ກຳນົດຊົ່ວຄາວຂອງທ່ານເຈົ້າແຂວງຫົວພັນ, ສະບັບເລກທີ 411/ຈຂ-ຫພ, ລົງວັນທີ 15/03/2018 ວ່າດ້ວຍການເກັບຄ່າຝາກເຄື່ອງນຳລົດໂດຍສານພາຍໃນ, ຕ່າງແຂວງ ແລະ ຕ່າງປະເທດ ແລະ ຍັງອີງຕາມກົດລະບຽບຂອງກະຊວງຂົນສົ່ງ ແລະ ໄປສະນີທີ່ໄດ້ຮັບຮອງເອົາຢ່າງເປັນທາງການ ໂດຍດຳລັດຂອງປະທານສະພາລັດຖະມົນຕີ, ສະບັບເລກທີ 256/ນຍ, ລົງວັນທີ 29/9/1982. ສ່ວນການຕັ້ງລາຄານັ້ນແມ່ນອີງໃສ່ໃບສະເໜີພະແນກໂຍທາທິການ ແລະ ຂົນສົ່ງປະຈຳແຂວງຫົວພັນ, ສະບັບເລກທີ 280/ຍທຂ, ລົງວັນທີ 30/01/2018.
ການເກັບເງິນຄ່າເຄື່ອງກັບຜູ້ໂດຍສານ ນອກຈາກນຳເອົາຂໍ້ກຳນົດ, ກົດລະບຽບຕ່າງໆຈາກຂັ້ນເທິງມາຜັນຂະຫຍາຍໃຫ້ເປັນຮູບປະທຳແລ້ວ, ຍັງອີງໃສ່ວ່າດ້ວຍການຂົນສົ່ງເຄື່ອງຜູ້ໂດຍສານແມ່ນ ຜູ້ໂດຍສານມີສິດຖືເຄື່ອງໂດຍສານຕິດຕົວຂຶ້ນລົດນຳ 20 ກິໂລກຣາມ/1ຄົນ, ສຳລັບເດັກນ້ອຍແມ່ນ 10 ກິໂລກຣາມ/ 1 ຄົນ. ຫາກວ່າຜູ້ໂດຍສານທ່ານໃດຖືເຄື່ອງນໍ້າໜັກເກີນກຳນົດແມ່ນຈະໄດ້ເສຍຄ່າບໍລິການຕາມຕົວຈິງຂອງນໍ້າໜັກເຄື່ອງທີ່ເກີນ ໂດຍຄິດໄລ່ໃສ່ລາຄາຕາມປະເພດເຄື່ອງທີ່ທ່ານຖືມາ ເຊິ່ງລາຄາແຕ່ລະປະເພດແຕກຕ່າງກັນອອກໄປ (ຍົກເວັ້ນເຄື່ອງທີ່ມີມູນຄ່າສູງເຊັ່ນ: ຄຳ ແລະ ເງິນສົດແມ່ນບໍ່ຮັບຝາກ ບໍ່ຮັບຄຸ້ມຄອງໃຫ້) ແລະ ດີແທ້ການຝາກເຄື່ອງແມ່ນຢາກໃຫ້ຜູ້ຝາກເຄື່ອງໄປໃຊ້ບໍລິການຮັບຝາກເຄື່ອງໃນຄິວລົດດີກວ່າ ເພາະຈະໄດ້ຈ່າຍຄ່າຝາກທີ່ເປັນເອກະພາບກັນ ແລະ ເຄື່ອງກໍ່ຮອດຕາມກຳນົດໝາຍຄືກັນກັບຝາກຜ່ານລົດເມ.
ທ່ານ ຄຳສຸກ ຍັງອະທິບາຍຕື່ມອີກວ່າ “ທຸກຄົນຮູ້ດີວ່າເສັ້ນທາງທີ່ໃຊ້ເດີນທາງມາແຂວງຫົວພັນບໍ່ແມ່ນທາງສະດວກສະບາຍຫາກບໍ່ມີການຄວບຄຸມ ຫຼື ຈຳກັດເລື່ອງນໍ້າໜັກຈະເຮັດໃຫ້ລົດເມບັນທຸກນໍ້າໜັກຫຼາຍຈົນເກີນໄປ ເຊິ່ງມັນເປັນອັນຕະລາຍກັບການເດີນທາງ ແລະ ຍັງເຮັດໃຫ້ເສັ້ນທາງເປ່ເພໄວຍ້ອນການບັນທຸກນໍ້າໜັກເກີນ, ນອກຈາກນີ້ການກຳນົດລາຄາຝາກເຄື່ອງທີ່ຊັດເຈນມັນຊ່ວຍຮັກສາສິດຜົນປະໂຫຍດຂອງຜູ້ໂດຍສານໃຫ້ໄດ້ຈ່າຍໃນລາຄາທີ່ເໝາະສົມເປັນເອກະພາບກັນ ແລະ ຍັງເຮັດໃຫ້ເຈົ້າຂອງລົດໂດຍສານໄດ້ຮັບຄ່າຂົນສົ່ງຕາມສົມຄວນ” ທາງສະຖານີຫົວພັນຂົນສົ່ງໂດຍສານບໍ່ໄດ້ປະຕິບັດຕາມອຳເພີໃຈ ທຸກຢ່າງແມ່ນຖືກຕ້ອງຕາມຂັ້ນຕອນ ມີການຄົ້ນຄວ້າ, ການເຫັນດີຈາກຂັ້ນເທິງຄັກແນ່.
ຕໍ່ກັບເນື້ອໃນທີ່ເຜີຍແຜ່ອອກໄປທາງເຟສບຸກເມື່ອ 2-3ວັນກ່ອນໜ້ານີ້ມັນໄດ້ສ້າງຄວາມເສື່ອມເສຍໃຫ້ແກ່ທາງສະຖານີຫົວພັນຂົນສົ່ງໂດຍສານ, ສະນັ້ນ, ຈິ່ງຮຽກຮ້ອງໃຫ້ສັງຄົມຢ່າເຂົ້າໃຈຜິດກັບສິ່ງທີ່ເຫັນ ທຸກເລື່ອງມັນມີເຫດຜົນໃນຕົວຂອງມັນ, ປັດຈຸບັນທາງສະຖານີຫົວພັນຂົນສົ່ງໂດຍສານໄດ້ຮູ້ຕົວຜູ້ປ່ອຍຄລິບດັ່ງກ່າວແລ້ວ ແລະ ຈະມີການນຳຕົວຜູ້ກ່ຽວມາດຳເນີນການຕາມລະບຽບກົດໝາຍ.
ທ່ານສາມາດເບິ່ງຮູບເອກະສານຂໍ້ກຳນົດຕ່າງ ແລະ ລາຍການລາຄາຝາກເຄື່ອງໄດ້ລຸ່ມນີ້:
ຮຽບຮຽງບົດ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ທ່ານ ຄຳສຸ ວິໄຊ ຫົວໜ້າສະຖານີຂົນສົ່ງໂດຍສານຫົວພັນ
ຮູບປະກອບຂ່າວ