ສຳນັກຂ່າວຕ່າງປະເທດລາຍງານ ເມື່ອວັນທີ 12 ກຸມພາ 2019 ວ່າ ຮ່າງກົດໝາຍທີ່ຮຽກວ່າ ໂຄງການແຫ່ງຊາດເສດຖະກິດດິຈີຕໍ (Digital Economy National Program) ຜ່ານການພິຈາລະນາ ໃນສະພາຜູ້ແທນລັດເຊຍ ດ້ວຍຄະແນນສຽງ 334 ຕໍ່ 47 ຫຼັງການໂຕ້ແຍ້ງໃນປະເດັນນີ້ ແລະ ຫຼາຍພັກການເມືອງຂະໜາດນ້ອຍກ່າວວິຈານ ນີ້ຈະເປັນທາງໄປສູ່ການກວດສອບຂອງລັດ ເປັນເຄືອຂ່າຍໂດດດຽວຄືກັບປະເທດເກົາຫຼີເໜືອ ລວມທັງເຮັດໃຫ້ມີລາຄາອິນເຕີເນັດແພງເກີນໄປ ແລະ ບໍ່ແມ່ນຜູ້ຊ່ຽວຊານເປັນຜູ້ຂຽນຮ່າງກົດໝາຍສະບັບນີ້ຂຶ້ນ.
ກຸ່ມຜູ້ຂຽນຮ່າງກົດໝາຍສະບັບນີ້ກ່າວວ່າ ລັດເຊຍຕ້ອງຮັບປະກັນຄວາມໝັ້ນຄົງຂອງເຄືອຂ່າຍຕົວເອງ ຫຼັງຈາກທີ່ປະທານາທິບໍດີ ໂດນັລ ທຣໍ້າ ຜູ້ນຳສະຫະລັດເປີດເຜີຍແຜນຍຸດທະສາດຄວາມໝັ້ນຄົງໄຊເບີໃໝ່ຂອງອາເມລິກາເມື່ອປີທີ່ຜ່ານມາ. ຄວາມເຄື່ອນໄຫວຂອງທຣໍ້າມີຂຶ້ນຫຼັງຈາກເຈົ້າໜ້າທີ່ສະຫະລັດກ່າວວ່າ ເກີດການໂຈມຕີດ້ານໄຊເບີເປັນບາງຄັ້ງຄາວຈາກລັດເຊຍ,ອິລ່ານ,ເກົາຫຼີເໜີອ ແລະ ຈີນ ພ້ອມກັບເຕືອນວ່າສະຫະລັດຈະຕອບໂຕ້ການຮຸກຮານໃນອະນາຄົດ.
ກຸ່ມຮ່າງກົດໝາຍຍັງກ່າວຕື່ມອີກວ່າ DENP ມີເປົ້າໝາຍ “ສ້າງກົນໄກປ້ອງກັນ ເພື່ອຮັບປະກັນວ່າການທຳງານຂອງເຄືອຂ່າຍອິນເຕີເນັດໃນລັດເຊຍຈະໝັ້ນຄົງໃນໄລຍະຍາວ”
ຕາມແຜນໂຄງການ ຈະມີການທົດສອບເປັນປະຈຳ ເພື່ອເບິ່ງວ່າລະບົບອິນເຕີເນັດສາມາດປະຕິບັດການໄດ້ ຫຼື ບໍ່ ເມື່ອຕັດຂາດການເຊື່ອມຕໍ່ກັບໂລກພາຍນອກ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews