ສຳນັກຂ່າວຕ່າງປະເທດລາຍງານ ຈາກນະຄອນຫຼວງ ໂຕກຽວ ປະເທດຍີ່ປຸ່ນ ເມື່ອວັນທີ 5 ກຸມພາ 2019 ວ່າ ທ່ານ ທາໂຣະ ອາໂສະ ລັດຖະມົນຕີກະຊວງການເງິນໄດ້ອອກມາກ່າວຂໍໂທດປະຊາຊົນເມື່ອວັນອັງຄານທີ່ຜ່ານມາວ່າ “ຫາກຄຳເວົ້າຂອງຂ້ອຍເຮັດໃຫ້ປະຊາຊົນບາງສ່ວນຮູ້ສຶກບໍ່ສະບາຍໃຈ ຂ້ອຍຕ້ອງຂໍອະໄພ”.
ຫຼັງຈາກເກີດກະແສປະຊາຊົນບໍ່ພໍໃຈຕໍ່ຄຳເວົ້າຂອງທ່ານ ທາໂຣະ ອາໂສະ ໃນລະຫວ່າງງານສຳມະນາໃນທ້າຍອາທິດທີ່ຜ່ານມາ ເນື່ອງຈາກວ່າເຂົາໄດ້ຫຼຸດປາກຕຳນິປະຊາຊົນຜູ້ທີ່ບໍ່ມີລູກ ວ່າເປັນຕົ້ນເຫດເຮັດໃຫ້ຄ່າໃຊ້ຈ່າຍດ້ານປະກັນສັງຄົມຂອງປະເທດສູງຂຶ້ນ ລວມເຖິງບັນຫາສັງຄົມຜູ້ສູງອາຍຸ ແລະ ຈຳນວນປະຊາກອນຫຼຸດນ້ອຍລົງ.
ຂໍ້ມູນສະຖິຕິຂອງລັດຖະບານຍີ່ປຸ່ນລະບຸວ່າ ຈຳນວນການເກີດໃນຍີ່ປຸ່ນໃນປີ 2018 ຫຼຸດລົງເຫຼືອພຽງ 921.000ຄົນ ເຊິ່ງເປັນອັດຕາການເກີດທີ່ຕໍ່າທີ່ສຸດນັບຕັ້ງແຕ່ຍີ່ປຸ່ນເລີ່ມເຮັດການຈົດບັນທຶກສະຖິຕິໃນປີ 1899 ແລະ ປີທີ່ຜ່່ານມາຈຳນວນປະຊາກອນຍີ່ປຸ່ນທົ່ວປະເທດຫຼຸດລົງເປັນສະຖິຕິ 448.000ຄົນ ເຫຼືອປະມານ 126 ລ້ານຄົນ ແລະ ຕາມແນວໂນ້ມຄາດວ່າຈຳນວນຈະຫຼຸດລົງເຫຼືອຕໍ່າກວ່າ 100 ລ້ານຄົນ ພາຍໃນອີກ 31 ປີຕໍ່ໜ້າ ຍົກເວັ້ນຍີ່ປຸ່ນຈະເປີດປະເທດຮັບຜູ້ອົບພະຍົບຊາວຕ່າງຊາດຈຳນວນຫຼາຍເຂົ້າມາອາໃສ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews