ທ່ານ ວາລາດິເມຍ ປູຕິນ ກ່າວເມື່ອວັນທີ 2 ກຸມພາ 2019 ວ່າ ລັດຖະບານລັດເຊຍຕັດສິນໃຈຖອນຕົວຈາກສົນທິສັນຍາຄວບຄຸມອາວຸດນິວເຄຣຍຍິງໄລຍະກາງ ເຊິ່ງເປັນສົນທິສັນຍາສະບັບສຳຄັນທີ່ໃຊ້ມາຕັ້ງແຕ່ສະໄໝສົງຄາມເຢັນ ທີ່ເຄີຍເຮັດຮ່ວມກັບລັດຖະບານສະຫະລັດເມື່ອປີ 1987 ເພື່ອຕອບໂຕ້ສະຫະລັດທີ່ປະກາດຖອນຕົວຈາກສົນທິສັນຍານີ້ໃນວັນທີ 1 ກຸມພາ 2019 ທີ່ຜ່ານມາ.

ທ່ານ ປູຕິນ ກ່າວວ່າ “ການຕັດສິນໃຈຂອງເຮົາເປັນການຕອບໂຕ້ກັບ ເພາະກ່ອນໜ້ານີ້ລັດຖະບານສະຫະລັດວ່າຈະຖອນຕົວອອກຈາກສົນທິສັນຍານີ້ ດັ່ງນັ້ນເຮົາກໍ່ຈະເຮັດຄືກັນ”.

ນອກຈາກນີ້, ທ່ານ ປູຕິນ ຍັງກ່າວລະຫວ່າງການປະຊຸມກັບທ່ານ ແຊເກ ລັຟຣອຟ ລັດຖະມົນຕີກະຊວງການຕ່າງປະເທດ ແລະ ທ່ານ ແຊເກ ຊອຍກູ ລັດຖະມົນຕີກະຊວງປ້ອງກັນປະເທດລັດເຊຍວ່າ “ພວກເຂົາກຳລັງວິໄຈ ແລະ ທົດສອບຂີປະນາວຸດໃໝ່ ເຮົາກໍ່ຕ້ອງເຮັດຄືກັນ”.

ໂດຍສະຫະລັດໄດ້ໃຫ້ເຫດຜົນການຖອນຕົວຈາກສົນທິສັນຍາສະບັບນີ້ວ່າ ເພາະເຫັນວ່າລັດເຊຍລະເມີດຂໍ້ຕົກລົງຕະຫຼອດມາ, ທ່ານ ໄມ ປອມແປໂອ ລັດຖະມົນຕີວ່າການກະຊວງການຕ່າງປະເທດສະຫະລັດກ່າວວ່າ “ສະຫະລັດເອງຈະຖືກສັ່ງໃຫ້ຈຳກັດອາວຸດແບບນີ້ບໍ່ໄດ້ ເພາະລັດເຊຍລະເມີດກົດໂດຍຂາດຄວາມລະອາຍໃຈ”.

ຢ່າງໃດກໍ່ຕາມຫຼັງຈາກສະຫະລັດປະກາດຖອນຕົວອອກມາແລ້ວ ທ່ານ ໂດນັລ ທຣໍ້າ ກ່າວວ່າ ຕົນຫວັງວ່າຈະເຫັນທຸກຄົນໃນຫ້ອງປະຊຸມໃຫຍ່ໆ ງາມໆ ພ້ອມໜ້າກັນ ແລະ ເຮັດສົນທິສັນຍາທີ່ມີເງື່ອນໄຂດີກວ່າເກົ່າ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: sanook