ສືບເນື່ອງຈາກເຫດການເຂື່ອນເຊປຽນ-ເຊນໍ້ານ້ອຍແຕກ ເມື່ອວັນທີ 23 ກໍລະກົດ 2018ທີ່ຜ່ານມາ, ພາຍຫຼັງຫ້ອງວ່າການສຳນັກງານນາຍົກລັດຖະມົນຕີ ຕົກລົງເຫັນດີມອບຄ່າຊົດເຊີຍໃຫ້ກັບບັນດາຍາດພີ່ນ້ອງຜູ້ເສຍຊີວິດ ແລະ ຜູ້ສູນຫາຍ ຈຳນວນ 71 ຄົນ ຈາກ 51 ຄອບຄົວ ໃນມູນຄ່າການຊົດເຊີຍ 10.000 ໂດລາ ຫຼື 85.560.000ກີບ ຕໍ່ຫົວຄົນ.
ພິທີມອບ-ຮັບເງິນຊົດເຊີຍໃຫ້ແກ່ຍາດພີ່ນ້ອງຜູ້ເສຍຊີວິດ ຖືກຈັດຂຶ້ນໃນຕອນເຊົ້າຂອງວັນທີ 26 ມັງກອນ 2019 ທີ່ຜ່ານມາ ທີ່ເມືອງ ສະໜາມໄຊ ແຂວງ ອັດຕະປື ເຊິ່ງລວມມີ: ບ້ານໃໝ່ ມີຜູ້ເສຍຊີວິດ 11 ຄົນຈາກ 10 ຄອບຄົວ, ບ້ານທ່າຫິນ ມີຜູ້ເສຍຊີວິດ 8 ຄົນຈາກ 6 ຄອບຄົວ, ບ້ານສະໝອງ ມີຜູ້ເສຍຊີວິດ 1 ຄົນຈາກ 1 ຄອບຄົວ, ບ້ານຫິນລາດ ມີຜູ້ເສຍຊີວິດ 31ຄົນຈາກ 20 ຄອບຄົວ, ບ້ານທ່າແສງຈັນ ມີຜູ້ເສຍຊີວິດ 18 ຄົນຈາກ 12 ຄອບຄົວ, ບ້ານແທ ມີຜູ້ເສຍຊີວິດ 2 ຄົນຈາກ 2 ຄອບຄົວ.
ນອກຈາກນີ້, ທາງບໍລິສັດເຈົ້າຂອງໂຄງການຈະຮັບຜິດຊອບຊົດເຊີຍໃຫ້ແກ່ຄອບຄົວຜູ້ເສຍຊີວິດຕື່ມອີກ ຫາກໃນຕໍ່ໜ້າພົບສົບຜູ້ເສຍຊີວິດຕື່ມ.ໂດຍອີງຕາມແຈ້ງການ ເລກທີ 138/ຫສນຍ, ລົງວັນທີ 23 ມັງກອນ 2019.
ມີລາຍງານຕື່ມອີກວ່າ ໃນວັນທີ 25-26 ມັງກອນ 2019 ທີ່ຜ່ານມາ ທາງຄະນະອົງການຈັດຕັ້ງຂັ້ນສູນກາງ ພ້ອມດ້ວຍຄະນະອົງການຈັດຕັ້ງຂອງແຂວງອັດຕະປື ແລະ ພາກສ່ວນທີ່ກ່ຽວຂ້ອງໄດ້ຮ່ວມກັນຈັດຕັ້ງກອງອັດຖະບັງສະກຸນ (ກອງບຸນ) ເພື່ອອຸທິດໃຫ້ແກ່ດວງວິນຍານຜູ້ທີ່ເສຍຊີວິດ ແລະ ສູນຫາຍຈາກເຫດການເຂື່ອນແຕກ ຈຳນວນ 71 ກອງ ໃນນັ້ນມີອີກ 4 ກອງ ທີ່ອຸທິດໃຫ້ແກ່ເຈົ້າຖິ່ນເຈົ້າຖານ ແລະ ເຈົ້າກຳນາຍເວນ ລວມທັງໝົດເປັນ 75 ກອງບຸນ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: laoedaily