ສຳນັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດອາເມລິກາ ເມື່ອວັນທີ 22 ມັງກອນ 2019 ກະຊວງຍຸດຕິທຳສະຫະລັດອອກຖະແຫຼງການເມື່ອວັນອັງຄານ ຢືນຢັນການຍື່ນຄຳຮ້ອງຢ່າງເປັນທາງການຕໍ່ການາດາໃຫທັນຕາມກຳນົດຄືພາຍໃນວັນທີ 30 ມັງກອນ 2019 ນີ້ ເພື່ອໃຫ້ລັດຖະບານການາດາພິຈາລະນາໃຫ້ສົ່ງຕົວ ນາງ ເມິ່ງ ຫວ່ານໂຈ ມາທີ່ສະຫະລັດໃນຖານະຜູ້ຮ້າຍຂ້າມແດນ ເພື່ອເຂົ້າຮັບການສອບສວນໃນຄະດີລະເມີດມາດຕະການຂວໍ້າບາດອິຣານ ຕາມໝາຍຈັບຂອງສານແຂວງລັດຖະບານກາງນະຄອນນິວຢອກ ເຊິ່ງລົງວັນທີ 22 ສິງຫາ 2018.
ຄວາມເຄື່ອນໄຫວດັ່ງກ່າວຂອງກະຊວງຍຸດຕິທຳສະຫະລັດຖືເປັນການສະແດງທ່າທີຢ່າງເປັນທາງການຄັ້ງທຳອິດໃນລະດັບລັດຖະບານກາງ ຫຼັງ ທ່ານ ເດວິດ ແມດນໍຕັນ ເອກອັກຄະລາດຖະທູດສະຫະລັດປະຈຳນະຄອນອອດຕາວາ ກ່າວເມື່ອວັນຈັນທີ່່ຜ່ານມາ ຢືນຢັນການສົ່ງເອກະສານທີ່ຈຳເປັນຕາມກົດໝາຍວ່າດ້ວຍການສົ່ງຕົວຜູ້ຮ້າຍຂ້າມແດນຂອງການາດາ.
ນາງ ຫົວ ຊຸນຫຍິງ ໂຄສົກຍິງກະຊວງການຕ່າງປະເທດຈີນ ກ່າວກ່ຽວກັບຄະດີຄວາມຂອງທາຍາດຫົວເວີ່ຍວ່າ “ບໍ່ປົກກະຕິ” ແລະ ການອ້າງສົນທິສັນຍາການສົ່ງຜູ້ຮ້າຍຂ້າມແດນລະຫວ່າງສະຫະລັດກັບການາດາໃນກໍລະນີນີ້ “ກຳລັງລະເມີດຄວາມປອດໄພ ແລະ ສິດທິອັນຊອບທຳ ຕະຫຼອດຈົນເຖິງການຮັກສາຜົນປະໂຫຍດຂອງພົນລະເມືອງຈີນ” ໂດຍນາງກ່າວວ່າລັດຖະບານສະຫະລັດ ຕ້ອງຢຸດຕິເລື່ອງນີ້ ແຕ່ບໍ່ໄດ້ກ່າວຕໍ່ວ່າການຕອບໂຕ້ຂອງຈີນນັບຈາກນີ້ຈະເປັນແນວໃດ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews.co.th