ກະຊວງການຕ່າງປະເທດ ໄດ້ຈັດກອງປະຊຸມເຊື່ອມຊຶມ, ຜັນຂະຫຍາຍມະຕິ ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ໃນລະຫວ່າງວັນທີ 17-18 ມັງກອນ 2019 ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ກຳມະການກົມການ ເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ, ມີບັນດາພະນັກງານການນຳ, ຄະນະບໍລິຫານງານພັກ ແລະ ຂັ້ນຫົວໜ້າກົມ ມາຈາກບັນດາກະຊວງ, ອົງການໃນຂົງເຂດ ເສດຖະກິດ-ການຕ່າງປະເທດເຂົ້າຮ່ວມ.
ໃນກອງປະຊຸມ, ໄດ້ເຊື່ອມຊຶມ 2 ເອກະສານສຳຄັນຄື: ເອກະສານທີ 1 ການເພີ່ມທະວີການນຳພາແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ສ້າງຄວາມເຂັ້ມແຂງຂອງການຄຸ້ມຄອງມະຫາພາກ ແລະ ເອກະພາບກັນໃນລະດັບສູງກັບທິດທາງ, ວິທີການ, ມາດຕະການທີ່ສູນກາງວາງອອກ; ສ້າງຄວາມຕັດສິນໃຈເດັດດ່ຽວແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃນຕໍ່ໜ້າ ພ້ອມທັງຄົ້ນຄວ້າກຳນົດບັນດາມາດຕະການໃຫ້ແທດເຫມາະກັບຕົວຈິງ; ສ້າງຂະບວນການຈັດຕັ້ງປະຕິບັດຢ່າງແຂງແຮງ ແລະ ທົ່ວເຖິງ ເພື່ອຫັນປ່ຽນຕົວຈິງທີ່ມີລັກສະນະບຸກທະລຸໃນທຸກຂົງເຂດວຽກງານ ແລະ ຊຸກຍູ້ດ້ານການພັດທະນາໃນດ້ານຕ່າງໆ ໃຫ້ບັນລຸຕາມຄາດໝາຍທີ່ກອງປະຊຸມໃຫຍ່ຄັ້ງທີ X ຂອງພັກວາງອອກ. ເອກະສານທີ 2 ວ່າດ້ວຍການປັບປຸງຮາກຖານການເມືອງຂອງລະບອບປະຊາທິປະໄຕປະຊາຊົນ ໃຫ້ເຂັ້ມແຂງ ແລະ ໜັກແໜ້ນ.
ທ່ານ ທອງລຸນ ສີສຸລິດ ໄດ້ຮຽກຮ້ອງມາຍັງຄະນະພັກ-ຄະນະນໍາແຕ່ລະຂັ້ນ ຈົ່ງເພີ່ມທະວີຄວາມຮັບຜິດຊອບ, ຄວາມເປັນເຈົ້າການ ໃນການຈັດຕັ້ງເຊື່ອມຊຶມ ເພື່ອກໍາແໜ້ນ ແລະ ນຳໄປຈັດຕັ້ງປະຕິບັດ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ຢ່າງເປັນຂະບວນຟົດຟື້ນ, ແຂງແຮງ, ແທດເໝາະຕົວຈິງ ແລະ ມີຜົນສໍາເລັດຕາມຄາດໝາຍ.
ໃນກອງປະຊຸມ, ຍັງຈະໄດ້ພ້ອມກັນຄົ້ນຄວ້າ ແລະ ປຶກສາຫາລືປະກອບຄຳເຫັນຢ່າງກົງໄປກົງມາ ໃສ່ບັນຫາທີ່ສຳຄັນ ໃນຂົງເຂດເສດຖະກິດ-ການເງິນ ກໍຄືການກໍ່ສ້າງຮາກຖານການເມືອງລະບອບປະຊາທິປະໄຕປະຊາຊົນ ທີ່ຕິດພັນກັບພຶດຕິກຳຕົວຈິງຂອງຂະແໜງການຂອງຕົນ ແລະ ສະເໝີການປັບປຸງພາຍໃນ ໂດຍສະເພາະແກ້ໄຂຈຸດອ່ອນ ແລະ ຂໍ້ຄົງຄ້າງ, ຊອກໃຫ້ເຫັນບັນດາສາເຫດທີ່ເປັນພຶ້ນຖານ ແລະ ຕົ້ນຕໍ ເພື່ອວາງມາດຕະການ, ທິດທາງ, ວິທີການແກ້ໄຂທີ່ຖືກຕ້ອງ, ແທດເຫມາະກັບຕົວຈິງ ແລະ ທັງສາມາດປະຕິບັດໄດ້ຢ່າງມີປະສິດທິຜົນ ໃນການຈັດຕັ້ງປະຕິບັດວຽກງານໃນສະເພາະໜ້າ ແລະ ຍາວນານ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: Lao National Radio, kpl.gov.la
ຮູບພາບຈາກ: Lao National Radio