ນະຄອນຫຼວງວຽງຈັນ ແລະ ບໍລິສັດນິກເກັງເຊັກເກ ວິວະກຳ ຈຳກັດ ໄດ້ຈັດກອງປະຊຸມສຳມະນາເປີດກວ້າງຄັ້ງສຸດທ້າຍ
ໂຄງການສຳຫຼວດອອກແບບວາງແຜນຜັງເມືອງລະອຽດ ລະດັບມາດຕາສ່ວນ 1/2.000 ຂອງການພັດທະນາແບບຈຸດ
ສຸມລຽບຕາມເສັ້ນທາງ 450 ປີ ຊຶ່ງດຳເນີນພາຍໃຕ້ການເປັນປະທານຂອງ ທ່ານ ແກ້ວພິລາວັນ ອາໄພລາດຮອງເຈົ້າ
ຄອງນະຄອນຫຼວງວຽງຈັນ, ມີບັນດານັກວິຊາການ ແລະ ພະນັກງານທີ່ກ່ຽວຂ້ອງໃຫ້ກຽດເຂົ້າຮ່ວມ.
ທ່ານ ແກ້ວພິລາວັນ ກ່າວວ່າ: ໂຄງການດັ່ງກ່າວໄດ້ເລີ່ມການເຊັນສັນຍາໃນປີ 2010 ແລະ ປີຕໍ່ມາໄດ້ຈັດກອງປະຊຸມຄັ້ງ
ທີ 1 ຂຶ້ນເພື່ອປຶກສາຫາລືກ່ຽວກັບແນວຄວາມຄິດຂອງໂຄງການ ໂດຍກອງປະຊຸມຄັ້ງນັ້ນໄດ້ມີການຮັບຮອງເອົາແນວ
ທາງໃນການພັດທະນາ, ແນວທາງການນຳໃຊ້ທີ່ດິນ, ຂະໜາດຂອງຈຳນວນປະຊາກອນ ແລະ ອື່ນໆ.
ຫຼັງຈາກນັ້ນ ກໍໄດ້ມີການລົງມືສຳຫຼວດ ແລະ ວັດແທກໄປຄຽງຄູ່ກັບການສຳຫຼວດຄືນເງື່ອນໄຂດ້ານສະພາບການທີ່ນັບ
ມື້ນັບປ່ຽນແປງໄປ ແລ້ວກຳນົດເປັນເງື່ອນໄຂຂອງໂຄງການຈິ່ງໄດ້ສືບຕໍ່ປະຕິບັດຕາມເງື່ອນໄຂຂອງໂຄງການ ພ້ອມທັງ
ສ້າງຕັ້ງຄະນະກຳມະການເພື່ອປະກອບຄວາມຄິດເຫັນ ແລ້ວລວບລວມຜົນໄດ້ຮັບຂອງໂຄງການ.
ສຳລັບກອງປະຊຸມຄັ້ງນີ້ ທ່ານຮອງເຈົ້າຄອງນະຄອນຫຼວງລະບຸວ່າ: ເປັນກອງປະຊຸມຄັ້ງທີ 2 ຊຶ່ງເນື້ອໃນຕົ້ນຕໍເພື່ອປຶກ
ສາຫາລືກ່ຽວກັບແຜນການນຳໃຊ້ທີ່ດິນຢ່າງລະອຽດ, ການອອກແບບຕົວເມືອງ, ແຜນການດ້ານໂຄງລ່າງພື້ນຖານ
ແລະ ອື່ນໆ ໂດຍຂອບເຂດໂຄງການມີເນື້ອທີ່ 5.750 ເຮັກຕາ ກວມເອົາເມືອງໄຊເຊດຖາ, ໄຊທານີ ແລະ ເມືອງສີໂຄດ
ຕະບອງ ທີ່ມີຄວາມໝາຍຄວາມສຳຄັນຢູ່ 2 ຢ່າງຄື: ການສ້າງຈຸດຂ້າມຜ່ານ ແລະ ການສ້າງການຂະຫຍາຍຕົວຂອງ
ເສດຖະກິດໃນຕໍ່ຫນ້າ.
ແນວໃດກໍດີ ສຳລັບການຈັດແບ່ງເຂດທາງເໜືອຈະພັດທະນາໃຫ້ເປັນເຂດສົ່ງເສີມກະສິກຳ, ເຂດກະສິກຳ, ເຂດປະຕູ
ທາງເຂົ້າ, ເຂດທີ່ພັກອາໄສ; ເຂດທາງກາງແມ່ນຈະພັດທະນາເປັນເຂດອຸດສະຫະກຳ, ເຂດຕົວເມືອງ, ເຂດທີ່ພັກອາໄສ
ສ່ວນເຂດທາງໃຕ້ແມ່ນຈະພັດທະນາໃຫ້ເປັນເຂດວັດທະນະທຳ, ເຂດກະຊວງ, ສະພາບແວດລ້ອມທີ່ຮັກສາຕາໜ່າງ
ສີຂຽວເດີມ ແລະ ລັກສະນະພູມສັນຖານ, ເຂດຕົວເມືອງ, ເຂດການຂົນສົ່ງ ແລະ ທີ່ພັກອາໄສ.
ແຫລ່ງຂ່າວ: ເສດຖະກິດ – ສັງຄົມ