ກໍລະນີໂທລະພາບຊ່ອງ Spring News ຂອງໄທ ໄດ້ລາຍງານ ໃນວັນທີ 13 ທັນວາ 2018 ໃນເວລາປະມານ 21:00 ກ່ຽວກັບບັນຫາການກໍ່ສ້າງໂຄງການທາງລົດໄຟ ລາວ-ຈີນ ໂດຍມີເນື້ອໃນຂ່າວລະບຸວ່າ: ” ລັດຖະບານລາວໄປຢືມເງິນນໍາຈີນ ແລ້ວຈ້າງຈີນ ມາເປັນຜູ້ກໍ່ສ້າງໃຫ້ ອັນນີ້ແມ່ນບໍ່ຖືກຕ້ອງ ເພາະວ່າພາຍຫລັງທີ່ມີ ບົດວິພາກເສດຖະກິດ-ເຕັກນິກ ຂອງໂຄງການນີ້ແລ້ວ ສອງລັດຖະບານ ລາວ-ຈີນ ໄດ້ມີການຮັບຮອງເອົາ ແລະ ເຫັນດີລົງທຶນຮ່ວມກັນ, ໂດຍແມ່ນຝ່າຍລາວ ຖືຮຸ້ນ 30% ແລະ ຝ່າຍຈີນ ຖືຮຸ້ນ 70% ແລ້ວທັງສອງຝ່າຍ ໄດ້ຕົກລົງສ້າງເປັນບໍລິສັດ ຮ່ວມທຶນທາງລົດໄຟ ລາວ-ຈີນ, ລວມທັງໄດ້ດຳເນີນການປະມູນ ເພື່ອຄັດເລືອກເອົາ 6 ບໍລິສັດກໍ່ສ້າງ, 3 ບໍລິສັດທີ່ປຶກສາ ແລະ 3 ບໍລິສັດ ທີ່ປຶກສາພາກສ່ວນທີ່ສາມ, ພ້ອມໄດ້ດຳເນີນການປະມູນ ຈັດຊື້-ຈັດຈ້າງຕາມລະບຽບການ.”
ຂ່າວລະບຸຕື່ມວ່າ: ທ້າວ ຄຳສຸກ ສສຊ ແຂວງຜົ້ງສາລີ ໄປໃຫ້ສຳພາດແກ່ວີໂອເອ ສຽງອາເມລິກາ ພາກພາສາລາວ ແລະ ເວົ້າວ່າ ຈີນກຳລັງທຳລາຍຄວາມ ໄວ້ເນື້ອເຊື່ອໃຈລະຫວ່າງກັນ ລະຫວ່າງລາວ-ຈີນ.
ໃນວັນທີ 20 ທັນວາ 2018, ທ່ານ ຄຳສຸກ ບຸນຍະວົງ ສະມາຊິກສະພາແຫ່ງຊາດ (ສສຊ) ເຂດເລືອກຕັ້ງທີ 2 ແຂວງ ຜົ້ງສາລີ ຢືນຢັນຢ່າງໜັກແໜ້ນ ຕໍ່ສຳນັກຂ່າວສານປະເທດລາວວ່າ: “ໂທລະພາບຊ່ອງ Spring News ອອກຂ່າວໃນຄັ້ງນີ້ ບໍ່ແມ່ນຄໍາເວົ້າຂອງຂ້າພະເຈົ້າ ທີ່ໄດ້ປະກອບຄຳເຫັນ ໃນກອງປະຊຸມສະພາ ສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດ VIII ແລະ ຂ້າພະເຈົ້າ ບໍ່ໄດ້ໄປໃຫ້ສໍາພາດ ຕໍ່ນັກຂ່າວວີໂອເອ ແລະ ຖືວ່ານັກຂ່າວຂອງໂທລະພາບຊ່ອງ Spring News (2 ທ່ານ ຍິງ-ຊາຍ) ຂາດຈັນຍາບັນ, ບໍ່ໜ້າເຊື່ອຖື ແລະ ເປັນການໃຫ້ຂ່າວທີ່ບໍ່ຖືກຕ້ອງ ກັບເນື້ອໃນໂຄງການກໍ່ສ້າງທາງລົດໄຟ ລາວ-ຈີນ ແຕ່ປະການໃດ.”
“ກ່ຽວກັບບັນຫາແຮງງານ, “ນັກຂ່າວຊ່ອງ Spring News ກໍມີຄໍາເຫັນວ່າ: ເປັນເລື່ອງທີ່ທຸເລດນັ້ນ” ເຊິ່ງແປເປັນພາສາລາວ ກໍ່ມີຄວາມໝາຍດູໝິ່ນປະມາດ ປະຊາຊົນລາວ ແລະ ຊາດລາວ ເຊິ່ງເປັນຄຳເຫັນທີ່ບໍ່ກົງກັບເວລາທີ່ຂ້າພະເຈົ້າປະກອບຄຳເຫັນ ໃນກອງປະຊຸມສະພາແຫ່ງຊາດ.” ກ່າວໂດຍ ທ່ານ ຄໍາສຸກ
ນັກຂ່າວຂອງຊ່ອງ Spring News ເວົ້າວ່າ: “ຈີນຕິດໜີ້ຄ່າຊົດເຊີຍ” ເຊິ່ງປະເດັນນີ້ ກໍເຫັນວ່າເຂົ້າໃຈບໍ່ຖືກຕ້ອງ ເພາະໃນສັນຍາສໍາປະທານໄດ້ລະບຸວ່າ ຄ່າຊົດເຊີຍທີ່ດິນ ແມ່ນລັດຖະບານລາວ ເປັນຜູ້ຮັບຜິດຊອບ ແລະ ຄ່າຊົດເຊີຍ ສິ່ງປຸກສ້າງ, ສິ່ງກີດຂວາງ ແມ່ນບໍລິສັດຮ່ວມທຶນ ລາວ-ຈີນ ເປັນຜູ້ຮັບຜິດຊອບ.
ສຳນັກຂ່າວສານປະເທດລາວໄດ້ລາຍງານວ່າ: ການທີ່ໄດ້ອອກຂ່າວ ວິຈານຂ່າວບິດເບືອນນັ້ນ ແມ່ນເປັນການເສກສັນປັ້ນແຕ່ງ, ສ້າງກະແສຂ່າວໃຫ້ປະຊາຊົນ ແລະ ສັງຄົມເຂົ້າໃຈຜິດ ຕໍ່ການລົງທຶນຮ່ວມມື ລາວ-ຈີນ ໃນໂຄງການນີ້, ໂດຍສັງ ລວມໄດ້ ຄື: ນັກຂ່າວຊ່ອງ Spring News ເວົ້າວ່າ: “ປະຊາຊົນແຂວງຜົ້ງສາລີ ໄດ້ຮັບຜົນກະທົບໂດຍກົງຈາກໂຄງການນີ້” ແມ່ນບໍ່ຖືກຕ້ອງ ເພາະວ່າແຂວງຜົ້ງສາລີ ບໍ່ມີເສັ້ນທາງລົດໄຟຜ່ານເລີຍ, ເຊິ່ງເປັນການວິເຄາະຂ່າວທີ່ບໍ່ຮູ້ເລື່ອງ ເນື່ອງຈາກວ່າ ຕະຫຼອດໄລຍະເສັ້ນທາງລົດໄຟ ທີ່ມີຄວາມຍາວທັງໝົດ 409 ກວ່າກິໂລແມັດ ໄດ້ຜ່ານບັນດາແຂວງເຊັ່ນ: ແຂວງ ຫຼວງນໍ່າທາ 16,9 ກິໂລແມັດ, ອຸດົມໄຊ 126,9 ກິໂລແມັດ, ຫຼວງພະບາງ 80 ກິໂລແມັດ, ແຂວງ ວຽງຈັນ 145,5 ກິໂລແມັດ ແລະ ນະຄອນຫຼວງວຽງຈັນ 40 ກິໂລແມັດ.
“ນັກຂ່າວທັງສອງຄົນນັ້ນ ໄດ້ສະຫຼຸບວ່າ: “ລາວຫາກະຮູ້ວ່າຕົນ ໄດ້ແຕ່ເສດເນື້ອ” ຫຼື ຄວາມໝາຍພາສາລາວແປວ່າ ໄດ້ແຕ່ເສດຊີ້ນຕ່ອນນ້ອຍໆ ໃນໂຄງການກໍ່ສ້າງທາງລົດໄຟນີ້ ເຊິ່ງເປັນຄຳເວົ້າທີ່ບໍ່ສ້າງສັນ ແລະ ບໍ່ສອດຄ່ອງກັບຂໍ້ຕົກລົງ ລະຫວ່າງ ສະມາຊິກອາຊຽນ ກັບ ລັດຖະບານຈີນ ແລະ ເປັນຄຳເວົ້າທີ່ບໍ່ມີສາລະ, ເຊິ່ງຂ້າພະເຈົ້າຜູ້ຖືກກ່າວຫາ, ປະຊາຊົນລາວ ແລະ ຄົນລາວ ບໍ່ຍອມ ຮັບເອົາໄດ້. ຕໍ່ບັນຫາເຫຼົ່ານີ້, ທ່ານ ຄຳສຸກ ບຸນຍະວົງ ຜູ້ເປັນຫົວໜ້າຄະນະສະເພາະກິດ ຕິດຕາມກວດກາແຕ່ຫົວທີ ໂຄງການກໍ່ສ້າງທາງລົດໄຟ ລາວ-ຈີນ ຈຶ່ງຮຽກຮ້ອງໃຫ້ຄົນລາວ ມີຄວາມເຂົ້າໃຈຕາມການສະເໜີຂອງທ່ານ, ພ້ອມທັງຮຽກຮ້ອງ ແລະ ສະເໜີໃຫ້ຂະແໜງການທີ່ກ່ຽວຂ້ອງ ດຳເນີນມາດຕະການຕາມກົດໝາຍສື່ມວນຊົນຂອງລາວ, ພ້ອມທັງໄດ້ຮຽກຮ້ອງໃຫ້ນັກຂ່າວຂອງໂທລະພາບຊ່ອງ Spring News ທັງສອງຄົນ ຈົ່ງອອກມາສະແດງ ຄວາມຮັບຜິດຊອບ ແລະ ສະແດງຄວາມຂໍໂທດ ຕໍ່ປະຊາຊົນລາວ ທີ່ໄດ້ອອກຂ່າວ ວິຈານບິດເບືອນ ແລະ ບໍ່ຖືກຕ້ອງຕາມ ຄວາມເປັນຈິງ.” ກ່າວໂດຍ ທ່ານ ຄໍາສຸກ ບຸນຍະວົງ
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ສຳນັກຂ່າວສານປະເທດລາວ
ຮູບ ແລະ ວິດີໂອປະກອບ: SpringNews