ພາຍຫຼັງທີ່ມີຂ່າວກະຈາຍທາງສື່ສັງຄົມອອນລາຍນ໌ວ່າ ສິມວັດບ້ານສີໄຄ ເມືອງໄຊບູລີ ແຂວງສະຫວັນນະເຂດຈະຖືກທຸບນັ້ນ, ທ່ານ ອາໂນລາດ ພິມໂວຫານ ຜູ້ອຳນວຍການສູນຂໍ້ມູນຂ່າວສານແລະສື່ສານການສຶກສາ-ກິລາ ພະແນກສຶກສາທິການແລະກິລາແຂວງສະຫວັນນະເຂດ ໄດ້ໂທລະສັບສອບຖາມໄປຍັງນາຍບ້ານບ້ານດັ່ງກ່າວ ແລະໄດ້ຮັບຄຳຊີ້ແຈງວ່າ ສິມເກົ່າຂອງວັດໄຕຣພູມ ບ້ານສີໄຄ ເມືອງໄຊບູລີ ແຂວງສະຫວັນນະເຂດຈະຍັງຖືກຮັກສາໄວ້ ໂດຍການກໍ່ອຸໂມງກວມເອົາໄວ້ ເພື່ອປ້ອງກັນອັນຕະລາຍຈາກໄພທຳມະຊາດ.
ທ່ານກ່າວວ່າ: ທາງການຈັດຕັ້ງບ້ານ ເຖົ້າແນວແນວໂຮມບ້ານສີໄຄ ສີຊຽງໃຫມ່ແມ່ນມີຄວາມເລື່ອມໃສສັດທາຕໍ່ມູນມັງມໍລະດົກນີ້ຫລາຍ ແລະມັນກໍ່ບໍ່ເປັນການງ່າຍປານໃດທີ່ຈະທຸບທຳລາຍໄດ້ລົງດອກ ເພາະອະດີດຜ່ານມາທັງດົນນານແລະມໍ່ມານີ້ ສິມດັ່ງກ່າວກໍ່ຍັງເປັນບ່ອນຕ້ອນຮັບຜູ້ນຳສູງສຸດລະດັບປະມຸກລັດ ແລ້ວຊາວບ້ານຊາວເມືອງໄຊບູລີກໍ່ມີຈິດສຳນຶກໃນພຸດທະສາສນາດີພໍ ເຊິ່ງບໍ່ມີວັນທີ່ຈະກະທຳການນັ້ນໄດ້ດອກ ເຊິ່ງທ່ານຜູ້ອ່ານຈະເຫັນຮູບທີ່ເຂົາກໍ່ຂ້າງນອກນັ້ນ ເຊິ່ງແມ່ນການທີ່ຊາວບ້ານພະຍາຍາມທີ່ຈະກໍ່ສ້າງເປັນກວມເອົາໄວ້ເພື່ອບໍ່ໃຫ້ສິມດັ່ງກ່າວຖືກຜົນກະທົບຈາກແດດ ແລະຝົນ ແຕ່ບໍ່ແມ່ນເພື່ອສ້າງອັນໃຫມ່ ແລ້ວຈະຮື້ອັນເກົ່າຖິ້ມ.
ແນວໃດກໍຕາມ ຂ່າວວ່າການຈະທຸບສິມເກົ່າຖິ້ມຄັ້ງນີ້ ເຖິງມັນຈະບໍ່ຖືກທຸບກໍຖືເປັນເລື່ອງດີທີ່ຄົນທັງຫຼາຍປາຖະໜາ ແລະຂ່າວກໍຍັງໄດ້ກະຕຸ້ນໃຫ້ຜູ້ອ່ານຮູ້ສຶກຮັກ ແລະຫວງແຫນມູນມໍລະດົກຂອງຊາດໄວ້ໄດ້. ແລະແຜນການກໍ່ອຸໂມງກວມເພື່ອອະນຸລັກໄວ້ຂອງປະຊາຊົນບ້ານສີໄຄ ເມືອງໄຊບູລີ ແຂວງສະຫວັນນະເຂດ ຍັງເປັນຕົວຢ່າງທີ່ດີ ທີ່ເຂດອື່ນໆ ຄວນເອົາເປັນແບບຢ່າງ.
