ກົມອຸຕຸນິຍົມ ແລະ ອຸທົກກະສາດ ຄາດຄະເນສະພາບອາກາດ ໃນໄລຍະວັນທີ 12 -18 ພະຈິກ 2018 ວ່າ ຄວາມກົດອາກາດສູງຂອງອາກາດເຢັນຍັງປົກຄຸມຢູ່ທົ່ວທຸກພາກຂອງປະເທດລາວ ດ້ວຍກຳລັງອ່ອນ ຫາ ປານກາງ, ພ້ອມກັບລົມຕາເວັນອອກ – ຕາເວັນອອກສຽງເໜືອພັດປົກຄຸມເປັນສ່ວນໃຫຍ່, ຈະເຮັດໃຫ້ມີຝົນຕົກກະຈາຍຢູ່ໃນລະດັບຄ່ອຍຢູ່ບາງທ້ອງຖິ່ນແຂວງພາກເໜືອ ແລະ ພາກກາງ ແລະ ອາກາດເຢັນໃນຕອນກາງຄືນ ຫາ ຕອນເຊົ້າ ຢູ່ໃນແຕ່ລະພາກ ໂດຍສະເພາະຢູ່ແຂວງພາກເໜືອ, ແຂວງ ໄຊສົມບູນ ແລະ ເຂດພູພຽງບໍລະເວນອາກາດເຢັນ ຫາ ໜາວເຢັນພ້ອມມີໝອກໜາຢູ່ບາງທ້ອງຖິ່ນເຂດຈອມພູ, ຮ່ອມພູ, ສຳລັບພາກໃຕ້ຍັງຈະຮ້ອນໃນຕອນກາງເວັນ ແລະ ລົມພັດແຮງບາງໂອກາດ.

• ພາກເໜືອດ້ານຕາເວັນອອກ: ໃນໄລຍະວັນທີ 12-16 ພະຈິກ 2018 ຈະມີຝົນຕົກຢູ່ໃນລະດັບຄ່ອຍ ແລະ ບາງທ້ອງຖິ່ນ ແລະ ໂດຍທົ່ວໄປ ອາກາດຍັງຈະເຢັນ ຫາ ໜາວເຢັນພ້ອມມີໝອກປກຫຸ້ມໃນຕອນເຊົ້າ ອຸນຫະພູມຕ່ຳສຸດ 13-15 ອົງສາ ແລະ ສູງສຸດ 25-26 ອົງສາ.
• ພາກເໜືອດ້ານຕາເວັນຕົກ: ໃນໄລຍະວັນທີ 12-18 ພະຈິກ 2018 ຈະມີຝົນຕົກໃນລະດັບຄ່ອຍ ຢູ່ບາງທ້ອງຖິ່ນແຂວງອຸດົມໄຊ, ບໍ່ແກ້ວ, ຫຼວງນ້ຳທາ, ຫຼວງພະບາງ ແລະ ໄຊຍະບູລີ ອາກາດເຢັນ ຫາ ໜາວເຢັນ ພ້ອມມີໝອກບາງປົກຫຸ້ມຢູ່ທົ່ວໄປ ແລະໝອກໜາປົກຫຸ້ມຢູ່ບາງທ້ອງຖິ່ນເຂດຈອມພູ ແລະ ຮ່ອມພູ, ອຸນຫະພູມຕໍ່າສຸດ 14-16 ອົງສາ ແລະ ສູງສຸດ 29-31 ອົງສາ.
• ພາກກາງ: ໃນໄລຍະວັນທີ 12-13 ພະຈິກ 2018 ອາກາດຍັງຈະເຢັນໃນຕອນເຊົ້າ ແລະ ຈະມີຝົນຕົກກະຈາຍໃນລະດັບຄ່ອຍ ຢູ່ບາງທ້ອງຖິ່ນແຂວງ ວຽງຈັນ, ຄຳມ່ວນ ແລະ ບໍລິຄຳໄຊ ຈາກນັ້ນວັນທີ 14-18 ພະຈິກ 2018 ອາກາດເຢັນພ້ອມມີໝອກປົກຫຸ້ມບາງໃນຕອນເຊົ້າ, ສ່ວນຕອນກາງເວັນອາກາດຮ້ອນຂຶ້ນ, ອຸນຫະພູມຕ່ຳສຸດ 16-18 ອົງສາ ແລະ ສູງສຸດ 32-34 ອົງສາ.
• ສະເພາະແຂວງໄຊສົມບູນ: ໃນໄລຍະວັນທີ 12-13 ພະຈິກ 2018 ຈະມີຝົນຕົກກະຈາຍໃນລະດັບຄ່ອຍຢູ່ບາງບໍລິເວນ,​ ຈາກນັ້ນວັນທີ 14-18 ພະຈິກ 2018 ໂດຍທົ່ວໄປອາກາດໜາວເຢັນ ພ້ອມມີໝອກປົກຫຸ້ມໃນຕອນກາງຄືນ ຫາ ຕອນເຊົ້າ ອຸນຫະພູມຕ່ຳສຸດ 11-13 ອົງສາ ແລະ ສູງສຸດ 24-26 ອົງສາ.
• ພາກໃຕ້: ໃນໄລຍະວັນທີ 12-14 ພະຈິກ 2018 ຈະມີຝົນຕົກຢູ່ໃນລະດັບຄ່ອຍຢູ່ບາງທ້ອງຖິ່ນ ແຂວງ ຈຳປາສັກ ແລະ ເຊກອງ ອາຫາດເຢັນພ້ອມມີໝອກບາງປົກຫຸ້ມໃນຕອນເຊົ້າ, ສ່ວນຕອນກາງເວັນອາກາດຮ້ອນຕື່ມອີກ, ຈາກນັ້ນວັນທີ 15-18 ພະຈິກ 2018 ອຸນຫະພູມອາກາດຍັງສືບຕໍ່ເຢັນພ້ອມມີໝອກບາງປົກຫຸ້ມໃນຕອນເຊົ້າຫຼາຍຂຶ້ນ, ອຸນຫະພູມຕ່ຳສຸດ 18-20 ອົງສາ ແລະ ສູງສຸດ 33-35 ອົງສາ.
• ສະເພາະເຂດພູພຽງບໍລະເວນ: ໃນໄລຍະວັນທີ 12-18 ພະຈິກ 2018 ອາກາດຍັງຈະສືບຕໍ່ໜາວເຢັນ ພ້ອມມີໝອກໜາປົກຫຸ້ມຢູ່ທົ່ວໄປໃນຕອນກາງຄືນ ຫາ ຕອນເຊົ້າ ແລະ ຈະມີຝົນຕົກໃນລະດັບຄ່ອຍຢູ່ບາງບໍລິເວນ ອຸນຫະພູມຕ່ຳສຸດ 09-11 ອົງສາ ແລະ ສູງສຸດ 24-26 ອົງສາ.
• ນະຄອນຫຼວງວຽງຈັນ: ໃນໄລຍະວັນທີ 12-14 ພະຈິກ 2018 ຈະມີຝົນຕົກຢູ່ໃນລະດັບຄ່ອຍຢູ່ບາງບໍລິເວນ ແລະ ອາກາດເຢັນໃນຕອນເຊົ້າ ພ້ອມມີໝອກບາງປົກຫຸ້ມຢູ່ທົ່ວໄປ ຈາກນັ້ນໄລຍະວັນທີ 15-16 ພະຈິກ 2018 ອາກາດຍັງເຢັນໃນຕອນກາງຄືນ ຫາ ຕອນເຊົ້າ ອຸນຫະພູນຕ່ຳສຸດ 18-20 ອົງສາ ແລະ ສູງສຸດ 31-33 ອົງສາ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ກົມອຸຕຸນິຍົມ ແລະ ອຸທົກກະສາດ