ກຸ່ມນັກກິດຈະກຳແລະນັກຄິດສ້າງສັນ Z999 ຮ່ວມກັນນຳສະເໜີສະພາບເສັ້ນທາງເປ່ເພໃນປະເທດ ລິທົວເນຍ (Lithuania) ໂດຍການຍິງຮູບຖ່າຍໃນຮູບແບບຕ່າງໆ ຮອບໆ ຂຸມເທິງເສັ້ນທາງ ໃນKaunas ເຊິ່ງມີເປົ້າໝາຍຄືການສ້າງຄວາມຕະຫຼົກເຮຮາ ດ້ວຍອົງປະກອບຕ່າງໆ ໃນສະຖານທີ່ຖ່າຍຮູບເພື່ອສ້າງຄວາມສົນໃຈແກ່ສະພາບເສັ້ນທາງທີ່ເປ່ເພ.

ຊ່າງຖ່າຍຮູບມືອາຊີບArturas Artiusenka ກັບEurika Balciute ຕັ້ງໃຈຖ່າຍຮູບຕະຫຼົກເຮຮາຊຸດນີ້ຂຶ້ນມາ ບໍ່ພຽງແຕ່ສ້າງປະສົບການມຸມມອງໃໝ່ໆ ແຕ່ບັນດາສື່ມວນຊົນຂອງ ລິທົວເນຍ ກໍຄືທົ່ວໂລກ ຕ່າງກໍພາກັນສົນໃຈກັບໂຄງການນີ້ ແລະມີການນຳສະເໜີພາບຖ່າຍເຫຼົ່ານີ້ຢ່າງຫຼວງຫຼາຍ.

ແນ່ນອນວ່າຮູບຖ່າຍຊຸດນີ້ຈະເປັນການກະຕຸ້ນຄວາມຄິດອາລົມຂັນແບບຕະຫຼົກເຮຮາແກ່ປະຊາຊົນ ລິທົວເນຍ ແລະຜູ້ພົບເຫັນ ໂດຍຫວັງເລິກໆ ພຽງແຕ່ວ່າ ເສັ້ນທາງຫຼາຍສາຍຄົງຈະດີຂຶ້ນໃນປີໜ້າ.

ສຳລັບທີມງານລາວໂພສຕ໌ ທີ່ນຳສະເໜີຂ່າວຕະຫຼົກນີ້ແມ່ນເພື່ອໃຫ້ເພື່ອນຜູ້ອ່ານຮູ້ວ່າ ໃນໂລກນີ້ບໍ່ມີແຕ່ປະເທດລາວທີ່ມີເສັ້ນທາງເປ່ເພ.