ນັກກີລາໂວວີນາມ (Vovinam) ທີມຊາດລາວ ສ້າງຜົນງານໄດ້ຢ່າງໂດດເດັ່ນ ຄະນະໂວວີນາມລາວສົົ່ງນັກກີລາເຂົ້າຮ່ວມພຽງ 3 ຄົນແຕ່ຍາດໄດ້ 2 ຫຼຽນຄຳ 2 ຫຼຽນເງິນ ແລະ 1 ຫຼຽນທອງ ໃນການແຂ່ງຂັນໂວວີນາມ ຊີງແຊັມອາຊີ ຄັ້ງທີ 4 ຢູ່ປະເທດອິນໂດເນເຊຍ.
ລາຍການແຂ່ງຂັນໂວວີນາມ ຊິງແຊັມອາຊີ ຄັ້ງທີ 4 ຢູ່ປະເທດອິນໂດເນເຊຍ ເຊິ່ງຈັດຂຶ້ນໃນລະຫວ່າງວັນທີ 4 -7 ພະຈິກ 2018 ມີນັກກີລາຈາກ 17 ປະເທດໃນອາຊີເຂົ້າຮ່ວມ ສະເພາະທີມຊາດລາວ ໄດ້ສົ່ງຄະນະນັກກີລາເຂົ້າຮ່ວມ 5 ຄົນ ເປັນນັກກີລາ 3 ຄົນ.
ທ້າວ ໄພລັດ ທຳມະວົງສາ ໄດ້ລົງແຂ່ງຂັນ 2 ລາຍການໃນມື້ທຳອິດຂອງການແຂ່ງຂັນ (4 ພະຈິກ 2018) ມີຊິງຫຼຽນ 2 ລາຍການຄື: ປະເພດຟ້ອນປະກອບອາວຸດ “ກະບອງ” ແລະ ປະເພດຕໍ່ສູ້ ຮຸ່ນນ້ຳໜັກ 64 ກິໂລ, ສຳລັບລາຍການ ປະເພດຟ້ອນປະກອບອາວຸດ “ກະບອງ” ມີ 7 ປະເທດເຂົ້າຮ່ວມ, ສ່ວນປະເພດຕໍ່ສູ້ ຮຸ່ນນ້ຳໜັກ 64 ກິໂລ ມີນັກກີລາຈາກ 6 ປະເທດເຂົ້າຮ່ວມ; ຈາກຜົນການແຂ່ງຂັນທັງ 2 ລາຍການປະກົດວ່າ: ທ້າວ ໄພລັດ ທຳມະວົງສາ ນັກກີລາໂວວີນາມລາວ ສາມາດຍາດໄດ້ 1ຫຼຽນຄຳຈາກປະເພດຟ້ອນປະກອບອາວຸດ “ກະບອງ” ແລະ 1 ຫຼຽນເງິນຈາກປະເພດຕໍ່ສູ້ ຮຸ່ນນ້ຳໜັກ 64 ກິໂລ ເຊິ່ງລວມທັງໝົດ 2 ຫຼຽນທີ່ທ້າວ ໄພລັດ ຍາດມາໄດ້.
ສຳລັບການແຂ່ງຂັນໃນວັນທີ 5 ພະຈິກ 2018 ນັກກີລາໂວວີນາມ ນາງ ມາລາ ຈັນທະລັກສາ ລົງແຂ່ງປະເພດຟ້ອນຍິງດ່ຽວບໍ່ມີອາວຸດ ແລະ ນາງ ພິກສະໄໝ ອິນສຸມັງ ລົງແຂ່ງປະເພດຟ້ອນຍິງດ່ຽວປະກອບອາວຸດ “ດາບດ່ຽວ” ໂດຍທັງ 2 ໄດ້ລົງແຂ່ງປະເພດຟ້ອນຄູ່ປະກອບອາວຸດດາບຄູ່ຍິງ ຫຼັງຈາກຈົບປະເພດຟ້ອນ ທັງສອງກໍ່ໄດ້ລົງແຂ່ງປະເພດຕໍ່ສູ້ ຮຸ່ນນ້ຳໜັກ 45 ກິໂລ ແລະ 42 ກິໂລ ຕາມລຳດັບ ເຊິ່ງຜົນການແຂ່ງຂັນປະກົດວ່າ: ນັກກີລາໂວວີນາມລາວ ໄດ້ຫຼຽນເພີ່ມ 2 ຫຼຽນ ຈາກນາງ ພິກສະໄຫມ ອິນສຸມັງ ໄດ້ 1 ຫຼຽນເງິນໃນປະເພດຕໍ່ສູ້ ລຸ້ນນໍ້າໜັກ 42 ກິໂລ ແລະ 1 ຫລຽນທອງຈາກ ນາງ ມາລາ ຈັນທະລັກສາ ປະເພດຕໍ່ສູ້ ລຸ້ນນໍ້າໜັກ 45 ກິໂລ ແລະ ໄດ້ 1 ຫຼຽນຄຳຈາກລາຍການຟ້ອນຄູ່ຍິງປະກອບອາວຸດດາບຄູ່
ສະຫຼຸບລວມການແຂ່ງຂັນໃນຄັ້ງນີ້ ທີມນັກກີລາໂວວີນາມລາວ ສາມາດຍາດໄດ້ 2 ຫຼຽນຄຳ 2 ຫຼຽນເງິນ ແລະ 1 ຫຼຽນທອງ ລາຍການຕໍ່ໄປທາງຄະນະນັກກີລາໂວວີນາມລາວຈະມີແຜນເຂົ້າຮ່ວມງານກີລາມະຫາວິທະຍາໄລອາຊຽນ 2018 ທີ່ມຽນມາ ໃນເດືອນທັນວາ ແລະ ແຂ່ງຂັນຢູ່ປະເທດບັງກະລາເທດ.
ຮຽບຮຽງຂ່າວ: ບຸດສະດີ ສາຍນ້ຳມັດ
ແຫຼ່ງຂໍ້ມູນ ແລະ ຮູບປະກອບ: ໜັງສືພິມວຽງຈັນໃໝ່, ຂ່າວກິລາ Lao National TV