ການອົດອາຫານ ຄື ການຫລຸດນ້ຳໜັກແບບຜິດໆ ແຕ່ ມື້ແລງເປັນມື້ທີ່ສາວໆຢ້ານຕຸ້ຍກັນ ທີ່ ສຸດ ແຕ່ມື້ນີ້ເຮົາມີເຕັກນິກການກິນ ມື້ຄໍ່າມາຝາກ
1. ບໍ່ຄວນງົດອາຫານແລງ
ສາວໆ ຫລາຍທ່ານມັກຫລຸດນ້ຳໜັກດ້ວຍວິທີການງົດອາຫານແລງ ເຊິ່ງບໍ່ຄວນເຮັດ ນອກຈາກຈະຢາກແລ້ວ ຍັງບໍ່ເຮັດໃຫ້ນ້ຳໜັກຫລຸດໄດ້ເທົ່າໃດ ເນື່ອງຈາກເມື່ອເຖິງເວລາອາຫານ ໂດຍປົກກະຕິຮ່າງກາຍຈະຫລັ່ງກົດອອກມາເພື່ອມີການຍ່ອຍອາຫານ ດັ່ງນັ້ນ ເມື່ອບໍ່ມີອາຫານໃນກະເພາະ ນ້ຳຍ່ອຍກໍຈະມາຍ່ອຍກະເພາະແທນ ເຮົາຈຶ່ງຄວນຫລຸດຫລາຍກວ່າງົດ ເລືອກກິນອາຫານເບົາໆ ຫລື ອາຫານທີ່ໃຫ້ພະລັງງານໜ້ອຍທີ່ສຸດ ເຊັ່ນ ເນັ້ນຜັກ ແລະ ຫມາກໄມ້ ສ່ວນຊີ້ນສັດຕິດໄຂມັນ ຂອງມັນໆ ຈືນໆ ຄວນງົດຈະດີກວ່າ ແລະ ເວລາທີ່ຄວນກິນຄື ຫົກໂມງແລງຫາເຈັດໂມງ ບໍ່ຄວນກິນເດິກກວ່ານີ້
2. ຫລັງກິນອາຫານແລງບໍ່ຄວນອອກກຳລັງກາຍຕໍ່ທັນທີ
ບາງທ່ານຢ້ານຕຸ້ຍ ຫລັງກິນອາຫານແລງຈຶ່ງອອກກຳລັງກາຍທັນທີ ຄວາມຈິງແລ້ວເປັນເລື່ອງທີ່ບໍ່ຄວນເຮັດ ຖ້າເຮົາກິນອາຫານພາຍໃນເວລາ 1-2ຊົ່ວໂມງ ແລ້ວໄປອອກກຳລັງກາຍທັນທີ ອາດເຮັດໃຫ້ເຮົາເກີດອາການຈຸກໄດ້ ຖ້າເປັນໄປໄດ້ຄວນຍ່າງເລື່ອຍໆ ບໍ່ຕ້ອງເລັ່ງ ເພາະເວລາເຮົາຍ່າງ ລຳໄສ້ຈະມີການຂະຍັບໂຕ ອາຫານກໍຈະຍ່ອຍງ່າຍ ແລະ ຍັງເປັນການໃຊ້ພະລັງງານໄປໃນໂຕນໍາອີກ ເປັນແນວທາງທີ່ດີໃນການປະຕິບັດຈະໄດ້ບໍ່ຕຸ້ຍ? ສ່ວນສາວໆ ທີ່ຕ້ອງການອອກກຳລັງກາຍຫລັງເລີກວຽກ ເປັນຕົ້ນວ່າ ໄປເຂົ້າຟິດເນສ ຈະມີຫລັກການກິນ ເຂົ້າແລງແບບໃດ ຄວາມຈິງແລ້ວຖ້າຄິດຈະອອກກຳລັງກາຍໃນໄລຍະຕອນແລງ ພໍເລີກວຽກຄວນກິນອາຫານເບົາໆ ອາຫານທີ່ຍ່ອຍງ່າຍ ຫຍ້ຳໃຫ້ລະອຽດ ເວັ້ນປະມານ 1-2ຊົ່ວໂມງ ກ່ອນການອອກກຳລັງກາຍ ງົດອາຫານຍ່ອຍຍາກ ເຊັ່ນ ຂອງມັນ ຂອງຈືນ ອາຫານທີ່ມີກະທິເຫລົ່ານີ້ຈະຍ່ອຍຍາກ
3. ຫລັງອາຫານແລງບໍ່ຄວນອາບນ້ຳໃນທັນທີ
ເພາະເມື່ອເຮົາກິນອາຫານ ຂະນະທີ່ອາຫານກຳລັງຍ່ອຍ ກະເພາະຕ້ອງເຮັດວຽກ ເລືອດຕ້ອງຖືກໄປຫລໍ່ລ້ຽງກະເພາະ ເພື່ອຊ່ວຍໃນການຍ່ອຍ ຖ້າເຮົາໄປອາບນ້ຳ ພາຍຫລັງອາຫານ ເຊິ່ງໂດຍປົກກະຕິແລ້ວມະນຸດເປັນສັດເລືອດອຸ່ນ ເມື່ອຮ່າງກາຍຖືກນ້ຳເຢັນໆ ກໍຈະເຮັດໃຫ້ເລືອດຈຳເປັນຕ້ອງມາທີ່ບໍລິເວນຜິວໜັງ ເພື່ອເຮັດໃຫ້ຮ່າງກາຍອົບອຸ່ນ ດັ່ງນັ້ນແລ້ວເລືອດຈຶ່ງຖືກແບ່ງອອກເປັນ 2ສ່ວນ ເຊິ່ງແນ່ນອນວ່າ ມັນຕ້ອງຖືກແບ່ງມາທີ່ຜິວໜັງກ່ອນເປັນອັນດັບທໍາອິດ ເຮັດໃຫ້ເລືອດສົ່ງໄປທີ່ກະເພາະໄດ້ນ້ອຍ ສິ່ງທີ່ເກີດຂຶ້ນຄື ລະບົບການຍ່ອຍເຮັດວຽກບໍ່ເຕັມປະສິດທິພາບ ທ້ອງຈະອືດ ແໜ້ນທ້ອງ ຈຸກ ຈຶ່ງຄວນເວັ້ນຢ່າງນ້ອຍທີ່ສຸດ 30ນາທີ ແລະ ທາງທີ່ດີທີ່ສຸດຕ້ອງປະມານ 1ຊົ່ວໂມງ ສຳລັບອາຫານທີ່ຍ່ອຍງ່າຍ ແລະ 2ຊົ່ວໂມງ ຖ້າເຮົາຮັບປະທານອາຫານທີ່ຍ່ອຍຍາກ
4. ຫາກສາວໆ ຕ້ອງການຫລຸດຄວາມຕຸ້ຍໂດຍໃຫ້ກິນຜັກ ຫລື ຫມາກໄມ້ໃນມື້ແລງ
ຜູ້ທີ່ຕ້ອງການຫລຸດນ້ຳໜັກ ມື້ແລງ ອາດກິນເປັນຜັກຫມາກໄມ້ ແລະ ຈະຕ້ອງບໍ່ເລືອກຫມາກໄມ້ທີ່ເປັນກົດ ເພາະຂະນະທ້ອງວ່າງຮ່າງກາຍຈະມີກົດຫລາຍຢູ່ແລ້ວ ແລະ ຫລີກລ້ຽງການກິນຜັກ ຫລືຫມາກໄມ້ດິບຂະນະທ້ອງວ່າງ ເພາະຈະເຮັດໃຫ້ທ້ອງອືດໄດ້ ແນະນຳວ່າໃຫ້ກິນຜັກສຸກ ເຊັ່ນ ການລວກ ການຕົ້ມ ແກງຈືດ ຫລື ຍໍາທີ່ລົດຊາດບໍ່ເພັດຫລາຍ
5. ອາຫານແລງ ທີ່ຄວນຫລີກລ້ຽງ
ໄດ້ແກ່ ອາຫານທີ່ຍ່ອຍຍາກ ເຊັ່ນ ຂອງມັນ ຂອງຈືນ ຊິ້ນສັດຕິດມັນ ອາຫານທີ່ມີ ຄໍເລສເຕີລໍສູງ ຖ້າຕ້ອງກິນຄວນທານໃນປະລິມານໜ້ອຍໜຶ່ງ ອາຫານທີ່ເປັນກົດຫລາຍ ສຳລັບໄວຜູ້ໃຫຍ່ ແນະນຳວ່າອາຫານ ແລງ ຄວນເປັນອາຫານຍ່ອຍງ່າຍ ມີໂປຕີນສູງ ມີຄາໂບໄຮເດດ ນຳ ແຕ່ບໍ່ຕ້ອງຫລາຍ ເຊັ່ນ ເຂົ້າ ເຂົ້າຊ້ອມມື ຜັກລວກ ຜັກຕົ້ມ ແລະ ຕ້ອງຄຳນຶງເຖິງສານອາຫານທີ່ຄົບທັງ 5ໝູ່
ຢ່າຄິດວ່າ ອາຫານ ຕອນແລງ ບໍ່ສຳຄັນ ຄວນໃສ່ໃຈ ແລະ ໃຫ້ຄວາມສຳຄັນກັບການເລືອກກິນ ເຂົ້າແລງ ໃຫ້ຫລາຍ ແຕ່ຕ້ອງກິນພຽງພໍ ບໍ່ກິນຫລາຍເກີນໄປ ເພາະນອກຈາກຈະເຮັດໃຫ້ຕຸ້ຍແລ້ວຍັງມີອີກຫລາຍພະຍາດນໍາມາຈາກການກິນອາຫານ ແລງ ທີ່ບໍ່ຖືກສຸຂະລັກສະນະ ເຊັ່ນ ເບົາຫວານ ໄຂມັນໃນເລືອດ ຄວາມດັນເລືອດສູງ ພະຍາດຫົວໃຈ ນອກຈາກນີ້ແລ້ວຍັງສົ່ງຜົນເຖິງ ຄຸນນະພາບການນອນນໍາອີກ