ຕໍາຫຼວດຫວຽດນາມພົບຢາບ້າ 12 ຖົງ ລວມນໍ້າໜັກ 309 ກິໂລກຣາມ ມູນຄ່າປະມານ 3 ລ້ານໂດລາສະຫະລັດ (ປະມານ 25 ກວ່າຕື້ກີບ) ຈາກການເອີ້ນລົດບັນທຸກທີ່ແລ່ນດ້ວຍຄວາມໄວສູງມາກວດສອບລົດ ເຊິ່ງການຈັບກຸມດັ່ງກ່າວຖືໄດ້ວ່າເປັນການຈັບກຸມຢາເສບຕິດຄັ້ງໃຫຍ່ລ່າສຸດໃນຫວຽດນາມ.
ສໍານັກຂ່າວ ວີເອັນ ເອັກສ໌ເພຣສ ລາຍງານໃນວັນທີ 16 ຕຸລາ ວ່າ: ເຈົ້າໜ້າທີ່ໄດ້ເອີ້ນລົດບັນທຸກທີ່ແລ່ນດ້ວຍຄວາມໄວສູງມາກວດສອບ ແລະ ໄດ້ຄົ້ນພົບຢາເສຍຕິດໃນລົດຄັນດັ່ງກ່າວໃນວັນສຸກທີ່ຜ່ານ, ຊາຍໜຸ່ມສອງຄົນທີ່ຂັບລົດມາໄດ້ອາໄສຈັງຫວະທີ່ເຈົ້າໜ້າທີ່ເຜີ ຫຼົບໜີໄປ, ແຕ່ຕໍາຫຼວດສາມາດນໍາຈັບກັບມາໄດ້ໜຶ່ງຄົນໃນມື້ຕໍ່ມາ ເປັນ ຄົນລາວ ຊື່ທ້າວ ເຊັງ ວາງ ອາຍຸ 23 ປີ ເຊິ່ງໃຫ້ການວ່າຖືກຈ້າງເປັນເງິນ 10,000 ໂດລາສະຫະລັດ (ປະມານ 85 ລ້ານກີບ) ໃນການຂົນສົ່ງຢາບ້າຊຸດນີ້ໄປເມືອງ ດານັງ ເຊິ່ງເປັນໜຶ່ງໃນເມືອງໃຫຍ່ຂອງຫວຽດນາມ ແລະ ເປັນເມືອງທ່ອງທ່ຽວທີ່ສຳຄັນອີກດ້ວຍ. ທັງນີ້, ຕໍາຫຼວດຫວຽດນາມກຳລັງນໍາຈັບອີກໜຶ່ງຜູ້ຫຼົບໜີ ເຊິ່ງແມ່ນຄົນຫວຽດນາມ.
ເຖິງແມ່ນວ່າ ຫວຽດນາມຈະມີກົດໝາຍຢາເສບຕິດທີ່ເດັດຂາດຫຼາຍທີ່ສຸດປະເທດໜຶ່ງໃນໂລກ ແຕ່ກໍຍັງເປັນສູນກາງການຂົນສົ່ງຢາເສບຕິດຍອດນິຍົມ ແລະ ຕະຫຼາດປາຍທາງ ສຳລັບຢາເສບຕິດຊະນິດຕ່າງໆ ທີ່ຖືກລັກລອບຂົນສົ່ງອອກຈາກພື້ນທີ່ເຂດສາມຫຼ່ຽມທອງຄໍາ ເຊິ່ງມີຊາຍແດນເຊື່ອມຕໍ່ 3 ປະເທດ ລາວ, ມຽນມາ ແລະ ໄທ.
ຮຽບຮຽງຂ່າວໂດຍ: ລັດສະໝີ ພອນວິໄລ
ແຫຼ່ງຂໍ້ມູນ ແລະ ຮູບພາບປະກອບ: VN Express