ໃນງານມະຫະກຳກີລາເອຊຽນພາຣາລິມປິກ 2018 ຄັ້ງທີ XII ທີ່ນະຄອນຫຼວງຈາກາຕາ, ປະເທດອິນໂດເນເຊຍ ລະຫວ່າງວັນທີ 6-13 ຕຸລາ 2018 ລາວເຮົາໄດ້ສົ່ງນັກກີລາຄົນພິການເຂົ້າຮ່ວມແຂ່ງຂັນທັງໝົດ 4 ປະເພດກີລາ ປະກອບມີ: ກີລາແລ່ນ-ລານ ກີລາລອຍນ້ຳ, ກີລາໂກນບານ ແລະ ກີລາຍົກນ້ຳໜັກ ເຊິ່ງ 4 ປະເພດທີ່ສົ່ງແຂ່ງຂັນມີທັງໝົດ 8 ລາຍການ ປະກອບມີ ແລ່ນ-ລານ (ຍິງ-ຊາຍ) ມີລາຍການແລ່ນ 100 ແມັດ 200 ແມັດ ແລະ 400 ແມັດ. ລອຍນ້ຳ (ຍິງ-ຊາຍ) ມີທ່າທຳມະດາ 50 ແມັດ ແລະ 100 ແມັດ, ທ່າກົບ 100 ແມັດ. ຍົກນ້ຳໜັກຊາຍ ລາຍການຮຸ່ນ 49 ກິໂລ ແລະ ໂກນບານລາຍການທີມຍິງ.
ໃນລາຍການແຂ່ງຂັນກີລາຍົກນ້ຳໜັກ ຮຸ້ນນ້ຳໜັກ 49 ກິໂລກຣາມ ເຊິ່ງຈັດຂຶ້ນໃນວັນທີ 7 ຕຸລາ 2018 ທີ່ຜ່ານມາ ທ້າວ ເປ້ຍ ເຫຼົາພັກດີ ສາມາດຍົກໄດ້ເຖິງ 133 ກິໂລ ເອົາຊະນະ ທ້າວ ບາຊາ ຟາແມນ ນັກກີລາຈາກປະເທດອິນເດຍ ທີ່ຍົກໄດ້ 128 kg ແລະ ອັນດັບ 3 ນັກກີລາຈາກອິນເດຍ ຍົກໄດ້ 127 kg ຄວ້າຫຼຽນຄຳປະຫວັດສາດໃນເອຊຽນພາຣາລິມປິກ ເປັນຫຼຽນຄຳທຳອິດຂອງທັບນັກກີລາລາວ ໃນເອຊຽນພາຣາລິມປິກ ຄັ້ງນີ້.
ທ້າວ ເປ້ຍ ມີເວລາຝຶກຊ້ອມກ່ອນຈະເຂົ້າຮ່ວມການແຂ່ງຂັນໃນຄັ້ງນີ້ພຽງ 6 ເດືອນເທົ່ານັ້ນ ແຕ່ກໍ່ສາມາດຍາດເອົາຫຼຽນຄຳມາຕ້ອນພີ່ນ້ອງຊາວລາວໄດ້ສຳເລັດ ແລະ ຄັ້ງຕໍ່ໄປທ້າວ ເປ້ຍ ຈະເດີນທາງໄປແຂ່ງຂັນທີ່ດູໄບ ເຊິ່ງເປັນລາຍການແຂ່ງຂັນລະດັບໂລກ, ຫຼັງຈາກນັ້ນທ້າວ ເປ້ຍ ຈະເດີນທາງໄປຮ່ວມແຂ່ງຂັນໃນງານ ພາລາລິມປິກ 2020 ທີ່ໂຕກຽວ.
ຮຽບຮຽງຂ່າວ: ບຸດສະດີ ສາຍນ້ຳມັດ
ແຫຼ່ງຂໍ້ມູນ: vientianemai, paralympic
ຮູບປະກອບຂ່າວ: paralympic, ຂ່າວກິລາ Lao National TV