ສິ້ນ ແມ່ນສ່ວນໜຶ່ງທີ່ສໍາຄັນໃນການສະແດງເຖິງເອກະລັກການແຕ່ງກາຍຂອງແມ່ຍິງລາວ; ບໍ່ວ່າທ່ານຈະຍ່າງໄປທາງໃດ ທັງພາຍໃນຫ້າງຮ້ານ ຫຼື ທ້ອງຕະຫຼາດ ທ່ານຈະເຫັນໄດ້ວ່າສິ້ນມີໃຫ້ເລືອກຫຼາກຫຼາຍແບບ, ຫຼາຍສີສັນ, ຫຼາຍລວດລາຍ ໃຫ້ທ່ານຍິງສາມາດເລືອກຊຶ້ ແລະ ເລືອກໃຊ້ໄດ້ທຸກກາລະໂອກາດ.
ແຕ່ໃນທາງກົງກັນຂ້າມ, ເຄື່ອງແຕ່ງກາຍຂອງທ່ານຊາຍ ຈະມີທາງເລືອກທີ່ຄ່ອນຂ້າງຈໍາກັດ ແລະ ຍັງບໍ່ຫຼາກຫຼາຍເທົ່າແມ່ຍິງ; ນີ້ຈິ່ງເປັນແຮງບັນດານໃຈໜຶ່ງ ທີ່ເຮັດໃຫ້ ທ່ານນາງ ພອນທິດາ ສົມສະອາດ, ສ້າງຕັ້ງແບຣນ ມູເວີມ໋ອງ, ແບຣນເຄື່ອງແຕ່ງກາຍທ່ານຊາຍຂອງເພິ່ນຂຶ້ນມາ ເພື່ອຕອບສະໜອງຄວາມຕ້ອງການຂອງຕະຫຼາດ ໂດຍສະເພາະຕະຫຼາດເຄື່ອງແຕ່ງກາຍທ່ານຊາຍນັ້ນເອງ.
ທ່ານນາງ ພອນທິດາ ໄດ້ກ່າວວ່າ: “ໃນອະດີດ, ຈະມີແຕ່ຮ້ານຕັດຫຍິບເຄື່ອງຂອງຄົນຫວຽດນາມເທົ່ານັ້ນທີ່ຮັບຕັດຫຍິບຊຸດຂອງຜູ້ຊາຍ, ເຊິ່ງສ່ວນຫຼາຍຈະເປັນຊຸດສູດທໍາມະດາ, ລຽບງ່າຍ ແລະ ບໍ່ຫຼາກຫຼາຍ. ແຕ່ໃນປະຈຸບັນຜູ້ຊາຍຫຼາຍໆຄົນກໍ່ມີລົດນິຍົມທີ່ແຕກຕ່າງຈາກເກົ່າ, ມີການນໍາເທຣນແຟຊັນຫຼາຍຂຶ້ນ ເຊິ່ງໄດ້ຮັບອິດທິພົນການແຕ່ງກາຍຈາກຕ່າງປະເທດ ຈາກສື່ໂທລະພາບ ແລະ ສື່ອອນລາຍຕ່າງໆ. ຍ້ອນແນວນັ້ນ, ຊຸດສູດແບບທໍາມະດາເຫຼົ່ານັ້ນຈຶ່ງກາຍເປັນຊຸດສູດທີ່ລຽບງ່າຍຈົນເກີນໄປ ແລະ ບໍ່ເປັນທີ່ນິຍົມຫຼາຍສໍາລັບຜູ້ຊາຍໃນຍຸກປະຈຸບັນນີ້.”
ກ່ອນທີ່ເພີ່ນຈະລິເລີ່ມທຸລະກິດນີ້, ທ່ານນາງ ພອນທິດາ ໄດ້ໄປຝຶກອົບຮົມຂັ້ນພື້ນຖານໃນສະຖາບັນຝຶກອົບຮົມຕ່າງໆພາຍໃນປະເທດ ເພື່ອເກັບ ກ່ຽວຄວາມຮູ້ເພີ່ມເຕີມກ່ຽວກັບແຟຊັນການແຕ່ງກາຍຂອງທ່ານຊາຍ ແລະ ໄດ້ນໍາເອົາຄວາມຮູ້ທີ່ເພິ່ນຮໍ່າຮຽນມາ ມາເສີມແຕ່ງ ແລະ ປະສົມປະສານກັບເທຣນ ການແຕ່ງກາຍປະຈຸບັນ ໃຫ້ ແທດເໝາະກັບຄວາມຕ້ອງການຂອງລູກຄ້າຫລາຍຂຶ້ນ.
ເປົ້າໝາຍຫລັກຂອງ ມູເວີມ໋ອງ ແມ່ນເພື່ອສ້າງແບຣນເຄື່ອງແຕ່ງກາຍທ່ານຊາຍ ທີ່ສາມາດຕອບໂຈດ ຄວາມຕ້ອງການຂອງລູກຄ້າ ທີ່ຕ້ອງການເຄື່ອງແຕ່ງກາຍທີ່ດູດີ, ມີສະໄຕລ໌ ແລະ ທັນສະໄໝ ພ້ອມກັບການບໍລິການທີ່ດີເລີດ. ມາຮອດປະຈຸບັນ, ມູເວິມ໋ອງ ມີສອງສາຂາ ເຊິ່ງລູກຄ້າສາມາດເລືອກໃຊ້ບໍລີການຢູ່ສາຂາໃດກໍ່ໄດ້ຕາມຄວາມສະດວກ; ສາຂາຫຼັກ ແມ່ນຕັ້ງຢູ່ບ້ານໂພນສີນວນ ແລະ ສາຂາສອງ ແມ່ນຕັ້ງຢູ່ບ້ານທາດຫຼວງ.
ນອກຈາກນີ້, ທ່ານນາງ ພອນທິດາ ໄດ້ກ່າວຕື່ມວ່າ ທາງເພີ່ນເອງກໍ່ມີຈຸດປະສົງ ແລະ ຄວາມສົນໃຈໃນ ການຂະຫຍາຍແບຣນຂອງເພິ່ນອອກສູ່ຕະຫຼາດໃນທົ່ວປະເທດ. ແຕ່ໃນປະຈຸບັນພວກເພິ່ນຕ້ອງການທີ່ຈະສຸມໃສ່ ການສ້າງ ແລະ ພັດທະນາແບຣນຂອງເພິ່ນໃນຕະຫຼາດຢູ່ນະຄອນຫຼວງວຽງຈັນໃຫ້ເຕັມທີ່ ກ່ອນທີ່ຈະຂະຫຍາຍແບຣນອອກສູ່ພາກອື່ນໆຂອງປະເທດ.
ທາງຮ້ານ ມູເວີມ໋ອງ ມີຊຸດສູດຫຼາກຫຼາຍແບບໄວ້ບໍລິການລູກຄ້າ ເຊິ່ງລູກຄ້າສາມາດເລືອກແບບ ແລະ ສີສັນ ຕາມທີ່ທາງຮ້ານໄດ້ວາງສະແດງເປັນຕົວຢ່າງໃຫ້ລູກຄ້າ; ນອກຈາກນີ້, ລູກຄ້າ ຍັງສາມາດເລືອກເນື້ອຜ້າທີ່ຕ້ອງການໄດ້ ແລະ ທາງຮ້ານມີຜ້າຫຼາຍປະເພດທີ່ນໍາເຂົ້າຈາກຕ່າງປະເທດຄື: ຜ້າຂົນສັດ, ຜ້າໃຍສັງເຄາະ ແລະ ຜ້າລີນິນ. ນອກຈາກນໍາໃຊ້ຜ້າທີ່ນໍາເຂົ້າຈາກຕ່າງປະເທດແລ້ວ, ທ່ານນາງ ພອນທິດາ ກໍ່ໄດ້ນໍາເອົາແຜ່ນຜ້າຫຼາຍໆຊະນິດທີ່ເປັນຜະລິດຕະພັນຂອງຄົນລາວ ມາເປັນອີກທາງເລືອກໜຶ່ງໃຫ້ລູກຄ້າໄດ້ເລືອກໃຊ້ເຊັ່ນ: ຜ້າຝ້າຍ ແລະ ຜ້າໄໝລາວເປັນຕົ້ນ.
ການບໍລິການກໍ່ເປັນອົງປະກອບໜື່ງອັນສໍາຄັນທີ່ທາງແບຣນ ມູເວີມ໋ອງ ໃຫ້ຄວາມເອົາໃຈໃສ່ ແລະ ໃຫ້ຄວາມສໍາຄັນ, ທາງຮ້ານໄດ້ມີການຝຶກອົບຮົມພະນັກງານຂອງເພີ່ນຢ່າງເປັນລະບົບ ເພື່ອພ້ອມໃຫ້ບໍລິການ ແລະ ໃຫ້ຄໍາປຶກສາແກ່ລູກຄ້າ. ທ່ານນາງ ພອນທິດາ ໄດ້ກ່າວຕື່ມວ່າ ມູເວີມ໋ອງເອົາໃຈໃສ່ ແລະ ຄັດເລືອກເອົາສະເພາະພະນັກງານຕັດຫຍິບທີ່ມີປະສົບການຫຼາຍປີ ທີ່ສາມາດຕັດຫຍິບໄດ້ຕາມມາດຕະຖານ ແລະ ມີຄວາມສາມາດໃນການອອກແບບຜະລິດຕະພັນ. ມູເວີມ໋ອງ ຍັງຮັບສ້ອມແປງຊຸດສູດທີ່ລູກຄ້າໄດ້ຊື້ກັບທາງຮ້ານ ບໍ່ວ່າລູກຄ້າຕ້ອງການທີ່ຈະປັບຂະໜາດເຂົ້າ ຫຼື ຫຍັບອອກ ທາງຮ້ານກໍ່ສາມາດອໍານວຍຄວາມສະດວກ ໃຫ້ໄດ້ຕາມຄວາມຕ້ອງການຂອງລູກຄ້າ ໂດຍທີ່ບໍ່ຄິດໄລ່ຄ່າບໍລິການ ຕະຫຼອດການໃຊ້ງານອີກດ້ວຍ.
ຮຽບຮຽງໂດຍ: ບຸນມີ ຄຳມີໄຊ
ຂຽນໂດຍ: ເຈສັນ ໂຣລັນ
ແປ ແລະ ຮຽບຮຽງໂດຍ: ອານິຕາ ສຸພະເຂດ
ຮູບໂດຍ: ພູນຊັບ ເທວົງສາ ແລະ ຮ້ານ ມູເວີມ໋ອງ
ແຫຼ່ງຂໍ້ມູນ: https://champameuanglao.com/la/the-cutting-edge/