ເພື່ອເປັນການໄວ້ອາໄລຕໍ່ການຈາກໄປຂອງສະຫາຍ ເຈິ່ນ ດ໋າຍ ກວາງ ກຳມະການກົມການເມືອງສູນກາງພັກຄອມມູນິດຫວຽດນາມ, ອະດີດປະທານປະເທດແຫ່ງ ສສ ຫວຽດນາມ ທີ່ເປັນເພື່ອນມິດສະຫາຍທີ່ໃກ້ຊິດ ແລະ ສະໜິດສະໜົມທີ່ສຸດຂອງພັກ, ລັດ ແລະ ປະຊາຊົນລາວບັນດາເຜົ່າ.

ຫ້ອງວ່າການສຳນັກງານນາຍົກລັດຖະມົນຕີ ອອກແຈ້ງການ ສະບັບເລກທີ 1577/ຫສນຍ ລົງວັນທີ 24 ກັນຍາ 2018 ເຖິງບັນດາທ່ານລັດຖະມົນຕີ, ຫົວໜ້າຫ້ອງການລັດທຽບເທົ່າກະຊວງ, ທ່ານເຈົ້າຄອງນະຄອນຫຼວງວຽງຈັນ ແລະ ບັນດາທ່ານເຈົ້າແຂວງໃນທົ່ວປະເທດ ຈັດຄະນະໄປວາງພວງມາລາ ແລະ ຂຽນປື້ມ ຢູ່ໃນສະຖານເອກອັກຄະລັດຖະທູດ ສສ ຫວຽດນາມ ຢູ່ນະຄອນຫຼວງວຽງຈັນ ແລະ ສະຖານກົງສູນໃຫຍ່ຂອງ ສສ ຫວຽດນາມທີ່ປະຈຳຢູ່ແຕ່ລະພາກ ໃນວັນທີ 26-27 ກັນຍາ 2018, ພ້ອມກັນນັ້ນ ກໍ່ໃຫ້ສຳນັກງານອົງການຂອງພັກ, ລັດ, ກຳລັງປ້ອງກັນຊາດ, ກຳລັງປ້ອງກັນຄວາມສະຫງົບ, ອົງການຈັດຕັ້ງມະຫາຊົນທັງສູນກາງ ແລະ ທ້ອງຖິ່ນ ເອົາທຸງລົງເຄິ່ງເສົາ ເລີ່ມແຕ່ເວລາ 6:00 ໂມງເຊົ້າ ຂອງວັນທີ 26 ກັນຍາ 2018 ຫາເວລາ 18:00 ໂມງຂອງວັນທີ 27 ກັນຍາ 2018 ແລະ ໄລຍະດັ່ງກ່າວແມ່ນໃຫ້ງົດຈັດກິດຈະກຳມ່ວນຊື່ນທີ່ເປັນລັກສະນະມ່ວນຊື່ນ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂ່າວ: ຫ້ອງວ່າການສຳນັກງານນາຍົກລັດຖະມົນຕີ