ເງິນຄຣິບໂຕ ຫຼື ເງິນດິຈິຕອລ ໃນລາວເຮົາຖືວ່າເປັນເງິນທີ່ບໍ່ໄດ້ຮັບຮອງຕາມກົດໝາຍໃນ ສປປ ລາວເຮົາຕາມແຈ້ງການຈາກທະນາຄານກາງ ແຫ່ງສປປ ລາວ, ແຕ່ວ່າໃນຍີ່ປຸ່ນນັ້ນ ເງິນຄຣິບໂຕຖືກຮັບຮອງວ່າເປັນເງິນຕາອີກສະກຸນໜຶ່ງຕັ້ງແຕ່ເດືອນເມສາ ປີ 2017.
ຢ່າງໃດກໍດີ, ໃນວັນທີ 20 ກັນຍາ 2018 ມີການລາຍງານຈາກສຳນັກຂ່າວຕ່າງປະເທດວ່າ ບໍລິສັດ ເທັກ ບິວໂຣ (Tech Bureau) ໃນເມືອງ ໂອຊາກ້າ ປະເທດຍີ່ປຸ່ນ ເຊິ່ງດຳເນີນກິດຈະການຮັບແລກປ່ຽນເງິນດິຈິຕອລ ຊາອິຟ ເຜີຍວ່າ ເຊີເວີ້ຂອງບໍລິສັດຖືກແຮັກເປັນເວລາ 2 ຊົ່ວໂມງໃນອາທິດທີ່ຜ່ານມາ ແລະ ເງິນດິຈິຕອລບາງສ່ວນໄດ້ຖືກຖ່າຍໂອນອອກໄປ ລວມມູນຄ່າ 6,700 ລ້ານເຢນ (ປະມານ 509 ຕື້ກີບ), ແຕ່ບໍລິສັດຍັງບໍ່ຂໍອອກຄວາມເຫັນຕໍ່ກໍລະນີທີ່ເກີດຂື້ນ ເນື່ອງຈາກເປັນຄະດີອາຍາ ແລະ ບໍລິສັດກຳລັງໃຫ້ເຈົ້າໜ້າທີ່ທາງການສືບສວນ.
ບໍລິສັດ ເທັກ ບິວໂຣ ເຜີຍອີກວ່າ ບໍລິການຮັບແລກປ່ຽນເງິນດິຈິຕອລ ຈະຖືກລະງົບຊົ່ວຄາວ ຈົນກວ່າລາຍລະອຽດຄວາມເສຍຫາຍທັງໝົດຈະໄດ້ຮັບການຍືນຍັນ.
ຍີ່ປຸ່ນຖືວ່າເປັນສູນກາງສຳຄັນສຳລັບເງິນດິຈິຕອລ ເຊິ່ງເຊື່ອກັນວ່າມີຮ້ານຄ້າຫຼາຍເຖິງ 50,000 ແຫ່ງທົ່ວປະເທດ ທີ່ຮັບເງິນບິດຄອຍ (ບິດຄອຍແມ່ນສະກຸນເງິນໜຶ່ງຂອງເງິນດິຈິຕອລ), ຄວາມເຟື່ອງຟູຂອງເງິນປະເພດນີ້ ເຮັດໃຫ້ທາງລັດຖະບານຍີ່ປຸ່ນຕ້ອງຕັ້ງລະບົບ ກຳນົດໃຫ້ຮ້ານຮັບແລກປ່ຽນຕ້ອງມີໃບອະນຸຍາດ ເພື່ອຊ່ວຍປົກປ້ອງລູກຄ້າ.
ຮຽບຮຽງຂ່າວໂດຍ: ລັດສະໝີ ພອນວິໄລ
ແຫຼ່ງຂ່າວ: Daily News, AP, APP, ຮູບພາບປະກອບ: Finder.com, Asahi.com