ອີງຕາມການແຈ້ງການຂອງ ທະນາຄານແຫ່ງ ສປປລາວ ວ່າດ້ວຍການພັດທະນາທາງດ້ານເຕັກໂນໂລຊີມີຄວາມກ້າວໜ້າ ແລະ ຂະຫຍາຍຢ່າງກວ້າງຂວາງໃນຈັງຫວະທີ່ໄວ. ໂດຍໄດ້ມີການນໍາເອົາເຕັກໂນໂລຊີ BlockChain ມາໃຊ້ໃນການເຮັດທຸລະກໍາທາງດ້ານການເງິນ ແລະ ພັດທະນາຮູບແບບການໃຫ້ບໍລິການທາງການເງິນໃນລັກສະນະຕ່າງໆ ລວມທັງການກໍາເນີດຂອງເງິນຄຣິບໂຕ (Cryptocurrency) ເປັນຕົ້ນແມ່ນເງິນຄຣິບໂຕສະກຸນ: Bitcoin, Ethereum, Litecoin ແລະ ອື່ນໆ.
ເມື່ອວັນທີ 29 ສິງຫາ 2018 ທີ່ຜ່ານມານີ້ ທະນາຄານແຫ່ງ ສປປລາວ ໄດ້ອອກແຈ້ງການສະບັບເລກທີ 314/ຫກ, ເລື່ອງການນໍາໃຊ້ ແລະ ລົງທຶນຊື້-ຂາຍເງິນຄຣິບໂຕ (Cryptocurrency) ໄດ້ອອກມາແຈ້ງຊາບວ່າ: ໃນ ສປປລາວ ເລີ່ມມີການໂຄສະນາຊວນເຊື່ອໃຫ້ມີການນໍາໃຊ້ເງິນຄຣິບໂຕເຂົ້າໃນການຊໍາລະຄ່າສິນຄ້າ ແລະ ບໍລິການ, ມີການໂຄສະນາໃຫ້ລົງທຶນ, ຊື້ຂາຍ ຫຼື ດໍາເນີນທຸລະກຳທາງການເງິນທີ່ກ່ຽວຂ້ອງກັບເງິນຄຣິບໂຕ. ໂດຍອ້າງວ່າເປັນເງິນດິຈິຕອນ (Digital Currency) ທີ່ມີຄົນນິຍົມໃຊ້ໃນທົ່ວໂລກ.
ໃນແຈ້ງການ ທະນາຄານແຫ່ງ ສປປລາວໄດ້ລະບຸໄວ້ວ່າ:
- ເງິນຄຣິບໂຕ ບໍ່ແມ່ນເງິນ ແລະ ບໍ່ແມ່ນເຄື່ອງມື ທີ່ສາມາດນໍາໃຊ້ເພື່ອການຊໍາລະໜີ້ໄດ້ຕາມກົດໝາຍຂອງ ສປປລາວ ເນື່ອງຈາກເງິນຄຣິບໂຕ ບໍ່ມີຄຸນສົມບັດເປັນເງິນທີ່ໃຊ້ເພື່ອການຊໍາລະໜີ້ໄດ້ຕາມກົດໝາຍ ແລະ ຍັງບໍ່ມີນິຕິກໍາທີ່ກຳນົດໃຫ້ພາກສ່ວນໃດ ເປັນຜູ້ຄຸ້ມຄອງວຽກງານດັ່ງກ່າວໃນ ສປປລາວ.
- ການລົງທຶນ ຫຼື ຊື້-ຂາຍ ເງິນຄຣິບໂຕ, ປະຊາຊົນຄວນມີສະຕິລະມັດລະວັງ ແລະ ສຶກສາຂໍ້ມູນໃຫ້ລະອຽດເລິກເຊິ່ງເພາະວ່າ ເງິນຄຣິບໂຕ ມີຄວາມສ່ຽງຫຼາຍດ້ານເປັນຕົ້ນແມ່ນ: ຄວາມສ່ຽງດ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ຄວາມສ່ຽງດ້ານລາຄາທີ່ຜັນຜວນສູງ, ຄວາມສ່ຽງດ້ານເທັກໂນໂລຊີ ແລະ ອາດເປັນຊ່ອງທາງຂອງກຸ່ມຄົນບໍ່ດີໃຊ້ເພື່ອຫຼອກລວງ ຫຼື ສໍ້ໂກງປະຊາຊົນໄດ້.
ຮູບພາບປະກອບຈາກ: Google