ທ່ານ ເດວິດ ຄາເມຣອນ ນາຍົກລັດຖະມົນຕີອັງກິດ ອ້ອນວອນຊາວສະກັອດແລນຢ່າຄິດແຍກປະເທດ ຫລັງຜົນການ
ທາບທາມຄວາມເຫັນ ມີກະແສສະໜັບສະໜູນສູສີກັນກັບກະແສຄັດຄ້ານ.
ໃນວັນທີ 10 ກັນຍາ 2014 ຜ່ານມານີ້ ສຳນັກຂ່າວຕ່າງປະເທດ ໄດ້ລາຍງານວ່າ ທ່ານ ເດວິດ ຄາເມຣອນ ນາຍົກລັດຖະ
ມົນຕີຂອງປະເທດອັງກິດ ໄດ້ອອກມາຮຽກຮ້ອງໃຫ້ຊາວສະກັອດແລນ ປະຕິເສດການແຍກຕົວອອກເປັນເອກະລາດ
ຈາກສະຫະລາຊະອານາຈັກ ໃນການລົງປະຊາມະຕິ ເຊິ່ງຈະມີຂຶ້ນໃນອາທິດໜ້ານີ້ ຫລັງຈາກທີ່ຜົນການທາບທາມຄວາມ
ຄິດເຫັນຂອງປະຊາຊົນ ສະແດງໃຫ້ເຫັນມີຈຳນວນຜູ້ສະໜັບສະໜູນໃຫ້ແບ່ງແຍກເປັນເອກະລາດ ສູສີກັນກັບຈຳ
ນວນທີ່ມີຄວາມເຫັນຄັດຄ້ານການແຍກອອກຈາກອັງກິດ.
ທ່ານ ຄາເມຣອນ ໄດ້ຂຽນບົດຄວາມເຜີຍແຜ່ທາງໜັງສືພິມໄດລີ່ເມວ ລະບຸວ່າ ” ສະຫະລາຊະອານາຈັກ ຄືປະເທດທີ່ມີ
ຄຸນຄ່າ ແລະ ຄວາມພິເສດສຸດ ແລະ ນັ້ນຄືສິ່ງທີ່ກຳລັງຈະຖືກທຳລາຍລົງໄປ ເພາະສະນັ້ນ ຂໍໃຫ້ພົນລະເມືອງໃນສະກັອດ
ແລນທຸກຄົນ ຈົ່ງເຊື່ອເຖີດວ່າ ເຮົາປາຖະໜາໃຫ້ທ່ານຢູ່ກັບເຮົາຕໍ່ໄປ, ເຮົາບໍ່ຕ້ອງການໃຫ້ກຸ່ມປະເທດເຊິ່ງເປັນດັ່ງຄອບ
ຄົວດຽວກັນ ຕ້ອງແຕກສະຫລາຍ ເພາະຫາກສະຫະລາຊະອານາຈັກແຕກແຍກໄປແລ້ວ ມັນຈະບໍ່ມີວັນກັບຄືນມາເປັນ
ຄືເກົ່າອີກ, ແຕ່ຖ້າຫາກເຮົາຢູ່ຮ່ວມກັນ ເຮົາຈະສາມາດສ້າງອານາຄົດທີ່ດີກ່ວາໃຫ້ແກ່ລູກຫລານຂອງເຮົາໄດ້ ”
ໃນຂະນະທີ່ສຳນັກພະລາຊະວັງຂອງອັງກິດ ກໍໄດ້ອອກຖະແຫລງການເມື່ອວັນທີ 9 ກັນຍາ 2014 ຜ່ານມາວ່າ ສົມເດັດພະ
ລາຊີນີອາລິຊາເບດທີ 2 ກະສັດຂອງອັງກິດ ແມ່ນຈະບໍ່ມີສ່ວນຮ່ວມສະແດງຄວາມຄິດເຫັນໃດໆ ກ່ຽວກັບການເຮັດປະ
ຊາມະຕິເພື່ອແຍກປະເທດຂອງສະກັອດແລນ.
ທາງດ້ານຊາວສະກັອດແລນເອງ ກໍເຫລືອເວລາອີກພຽງບໍ່ເທົ່າໃດມື້ ກໍຈະເຖິງມື້ລົງປະຊາມະຕິຢ່າງເປັນທາງການ ໃນວັນ
ທີ 18 ກັນຍາ 2014 ທີ່ຈະມາເຖິງນີ້ ແລະ ຊາວສະກັອດແລນເອງ ກໍຈະຕ້ອງໄດ້ຕັດສິນໃຈຄັ້ງສຳຄັນແລ້ວວ່າ ຈະແຍກປະ
ເທດເປັນປະເທດສະກັອດແລນເອກະລາດ ອອກຈາກສະຫະລາຊະອານາຈັກ ຫລື ບໍ່ ຫລັງຈາກທີ່ສະກັອດແລນ ໄດ້ກາຍ
ເປັນສ່ວນໜຶ່ງຂອງສະຫະລາຊະອານາຈັກ ມາຍາວນານກ່ວາ 300 ປີ.
