ສຳນັກຂ່າວຕ່າງປະເທດລາຍງານຈາກນະຄອນຫຼວງກົວລາລຳເປີ ປະເທດ ມາເລເຊຍ ເມື່ອວັນທີ 4 ກໍລະກົດ 2018ວ່າ ທ້າວ ນາຈິບ ຣາຊັດ ໄດ້ປະຕິເສດຂໍ້ກ່າວຫາຄໍລັບຊັນ ແລະ ໃຊ້ອຳນາດບໍ່ຊອບທຳຮວມ 4 ກະທົງ ທີ່ກ່ຽວຂ້ອງກັບການບໍລິຫານຈັດການກອງທິນ ເອັມດີບີ ແລະ ຂໍໃຊ້ສິດຕໍ່ສູ້ຕາມຂະບວນການຈົນເຖິງທີ່ສຸດ ຂະນະທີ່ໄອຍະການຮຽກຮ້ອງຫຼັກຊັບປະກັນຕົວ 4 ລ້ານຣິງກິດ ຕາມຈຳນວນກະທົງທັງໝົດ ແຕ່ຜູ້ພິພາດສາຫຼຸດໃຫ້ເຫຼືອ 1 ລ້ານຣິງກິດ ແລະ ຕ້ອງເປັນເງິນສົດເທົ່ານັ້ນ ພ້ອມທັງສັ່ງຫ້າມອະດີດຜູ້ນຳມາເລເຊຍເດີນທາງອອກນອກປະເທດ ເຊິ່ງທ້າວ ນາຈິບໄດ້ມອບໜັງສືເດີນທາງ 2 ເຫຼັ້ມໃຫ້ແກ່ເຈົ້າໜ້າທີ່

ທ້າວ ນາຈິບ ອາຍຸໄວ 64ປີ ອະດີດນາຍົກລັດຖະມົນຕີ 2 ສະໄໝ ແລະ ເປັນຫົວໜ້າພັກຄົມລາຍູສາມັກຄີແຫ່ງຊາດ ຖືເປັນຜູ້ນຳມາເລເຊຍຄົນທຳອິດໃນປະຫັວດສາດທີ່ມີຄະດີສໍ້ໂກງ ໂດຍຂໍ້ຫາທີ່ໄອຍະການສັ່ງຟ້ອງຕໍ່ທ້າວ ນາຈິບນັ້ນ ກ່ຽວຂ້ອງກັບເງິນ 10.4 ລ້ານໂດລາ ທີ່ມີການໂອນເຂົ້າບັນຊີຂອງທ້າວ ນາຈິບ ເມື່ອປີ 2015 ທາງພະນັກງານສອບສວນເຊື່ອວ່າເງິນຈຳນວນດັ່ງກາວເປັນເງິນທີ່ມີການໂອນມາຈາກກອງທຶນເອສອາຣຊີ ອິນເຕີເນຊັ່ນແນລ ໜຶ່ງໃນກອງທຶນຍ່່ອຍຂອງກອງທຶນເອັມດີບີ ທີ່ທ້າວ ນາຈິບ ກໍ່ຕັ້ງຂຶ້ນເມື່ອປີ 2008 ແຕ່ຂໍ້ມູນຂອງສຳນັກງານສອບສວນກາງແຫ່ງສະຫະລັດ (ເອັຟບີໄອ) ລະບຸວ່າ ຕະຫຼອດເກືອບ 10 ປີທີ່ຜ່ານມາ ມີການຖ່າຍໂອນເງິນອອກຈາກກອງທຶນເອັມດີບີໄປແລ້ວ 4.500 ລ້ານໂດລາ

ດ້ານທະນາຍຄວາມຂອງທ້າວ ນາຈິບ ກ່າວສະແດງຄວາມເຊື່ອໝັ້ນວ່າຈະເປັນຝ່າຍຊະນະຄະດີ ເພາະນີ້ເປັນພຽງການກັ່ນແກ້ງທາງການເມືອງ ຈາກລັດຖະບານຂອງ ດຣ.ມາຫາເທີ ໂມຮັມໝັດ ນາຍົກລັດຖະມົນຕີຄົນປັດຈຸບັນ ຂະນະທີ່ໄອຍະການສູງສຸດເຊິ່ງເປັນໂຈດຟ້ອງຮ້ອງ ກ່າວສະແດງຄວາມເຊື່ອໝັ້ນວ່າຈະເປັນຝ່າຍຊະນະຄະດີຄືກັນ