ສື່ຕ່າງປະເທດລາຍງານວ່າ ໃນວັນທີ 3 ກໍລະກົດ 2018 ທາງການມາເລເຊຍບຸກເຂົ້າຈັບກຸມຕົວ ທ້າວ ນາຈິບ ນາຊັດ ອະດີດລັດຖະມົນຕີມາເລເຊຍທີ່ເຮືອນພັກໃນນະຄອນຫຼວງ ກົວລາລຳເປີ ເນື່ອງຈາກກວດສອບພົບໃນຄະດີທຸຈະລິດເງິນກອງທຶນ 1MDB ມູນຄ່າກວ່າ 700 ລ້ານໂດລາ ໂດຍທ້າວ ນາຈິບໄດ້ຖືກຄວບຄຸມຕົວໄປທີ່ສຳນັກງານປາບປາມການທຸຈະລິດທັນທີ ແລະ ຈະຖືກນຳຕົວຂຶ້ນສານໃນມື້ນີ້
ທາງເຈົ້າໜ້າທີ່ໄດ້ບຸກເຂົ້າກວດຄົ້ນເຮືອນພັກ ແລະ ສະຖານທີ່ອື່ນໆ ທີ່ກ່ຽວຂ້ອງກັບທ້າວ ນາຈິບ ແລະ ຄອບຄົວ ເຈົ້າໜ້າທີ່ກວດພົບເງິນສົດໄດ້ມູນຄ່າ 114 ລ້ານຣິງກິດ ຖືກຍັດໄວ້ໃນກະເປົາ 35 ໜ່ວຍ ມີເງິນສົດກວ່າ 26 ສະກຸນເງິນ ສ່ວນຫຼາຍມີສະກຸນຣິງກິດ ແລະ ໂດລາສິງກະໂປ ສ່ວນກະເປົາອີກ 37 ໜ່ວຍແມ່ນໃສ່ໂມງ ແລະ ອັນຍະມະນີຈຳນວນຫຼາຍ ແຕ່ບໍ່ສາມາດລະບຸມູນຄ່າໄດ້
ທີ່ຜ່ານມາທາງການໄດ້ຮຽກສອບສວນທ້າວ ນາຈິບ ແລະ ຄອບຄົວ ເຖິງຄວາມກ່ຽວຂ້ອງກັບຄະດີທຸຈະລິດດັ່ງກ່າວ ແຕ່ທ້າວ ນາຈິບໄດ້ປະຕິເສດຂໍ້ກ່າວຫາມາຕະຫຼອດ ຈົນຖືກທາງການບຸກເຂົ້າຈັບກຸມຕົວໃນມື້ວານນີ້