ສະຖານະການຂອງທີມຊາດເກົາຫຼີໃຕ້ ຈະມີໂອກາດຕົກຮອບແບ່ງກຸ່ມບານໂລກຄ່ອນຂ້າງສູງ ຫຼັງເສຍໃຫ້ ສະວີເດນ 0-1 ໃນເກມທຳອິດ ແລະ ເສຍໃຫ້ເມັກຊິໂກ 1-2 ໃນເກມທີສອງ ມີລາຍງານວ່າຫຼັງຈົບເກມທີສອງ ຊອນ ເຮືອງມິນ ກອງໜ້າຂອງທີມ ເສຍໃຈຈົນຮ້ອງໄຫ້ຢ່າໜັກ ແຕ່ກໍ່ພະຍາຍາມຄຸມສະຕິໃຫ້ດີຂຶ້ນ ເມື່ອຕ້ອງໃຫ້ສຳພາດກັບສື່ໂທລະທັດບ້ານເກີດ
ຊອນ ໃຫ້ສຳພາດວ່າ ພວກເຮົາທຸ້ມເທກັນສຸດຊີວິດໃນເກມນີ້ ຕົນພະຍາຍາມກັ້ນນ້ຳຕາແລ້ວ ແຕ່ກໍ່ບໍ່ໄຫວເມື່ອເຫັນໜ້າຂອງເພື່ອນຮ່ວມທີມໃນຫ້ອງແຕ່ງຕົວ ເພາະຮູ້ດີວ່າເກມນີ້ມັນຍາກພຽງໃດ ພວກເຮົາທຸ້ມເທກັນສຸດໆ ໂດຍບໍ່ຢ້ານເລີຍວ່າຈະຕ້ອງຮັບບາດເຈັບ ນອກຈາກນີ້ເຂົາຍັງຢາກຂອບໃຈທ້າວ ຮວາງ ຮີຊານ ກອງໜ້າຂອງທີມ, ມຸນ ຊອນມິນ ແລະ ອີ ຊິງວູ ສອງກອງກາງຂອງທີມ ເພາະເຮັດຜົນງານໃຫ້ທີມໄດ້ດີ ເຖິງແມ່ນວ່າຈະເຄີຍມາຫຼິ້ນບານໂລກໃນຮອບສຸດທ້າຍເປັນຄັ້ງທຳອິດກໍ່ຕາມ ສ່ວນ ກີ ຊອງເຍືອງ ກັບຕັນທີມ ຕົນຢາກຂໍໂທດເຂົາຫຼາຍໆ ເພາະບໍ່ສາມາດແບ່ງເບົາພາລະຂອງເຂົາໄດ້ເລີຍ ສຳລັບເກມທີ່ຕ້ອງພົບກັບເຢຍລະມັນນີ້ ເປັນໜ້າທີ່ທີ່ຕ້ອງເຮັດ ຈະພະຍາຍາມຫຼິ້ນໃຫ້ດີທີ່ສຸດເທົ່າທີ່ຄົນໆໜຶ່ງຈະເຮັດໄດ້.
ນອກຈາກນີ້ ມຸນແຈ-ອິນ ປະທານາທິບໍດີຂອງເກົາຫຼີໃຕ້ ແລະ ພັນລະຍາ ໄດ້ເຂົ້າໄປໃຫ້ກຳລັງໃຈ ແລະ ປອບໃຈນັກເຕະໃນຫ້ອງແຕ່ງຕົວ ຫຼັງເກມທີ່ເສຍໃຫ້ກັບເມັກຊິໂກ 1-2 ອີກດ້ວຍ ໂດຍຜູ້ນຳເກົາຫຼີໃຕ້ໄດ້ເດີນທາງມາທີ່ຣັດເຊຍເພື່ອເຮັດພາລະກິດກັບທ່ານ ວາລາດີເມຍ ປູຕິນ ປະທານາທິບໍດີຂອງຣັດເຊຍ ໃນຊ່ວງເວລາດຽວກັນ.
https://youtu.be/QL0ngFHBGA8