ເມື່ອວັນທີ 9 ມິຖຸນາ 2018 ສຳນັກຂ່າວ CNN ໃຫ້ຄວາມໃກ້ຊິດຕິດຕາມສະຖານະການພູເຂົາໄຟ ຄິລາເວ ລັດຮາວາຍ, ປະເທດສະຫະລັດອາເມລິກາ ຫລັງຈາກທີ່ພູເຂົາໄຟໄດ້ພົ່ນມັກມາອອກມາ ຕັ້ງແຕ່ເດືອນ ພຶດສະພາ. ທາດມັກມາ ຈາກພູເຂົາໄຟ ຄິລາເວ ໄດ້ໄຫລມາຮອດທະເລສາບກີນເລກ໌ (Green Lake) ຊື່ງເປັນທະເລສາບນໍ້າຈືດເທີງເກາະໃຫຍ່ຂອງລັດຮາວາຍ ແລະ ເປັນທະເລສາບນໍ້າຈືດທີ່ມີຂະຫນາດໃຫຍ່ທີ່ສຸດຂອງຫມູ່ເກາະຮາວາຍ ກໍ່ໃຫ້ເກີດການປ່ຽນແປງທາງທຳມະຊາດຢ່າງຫນ້າຕົກໃຈ ເມື່ອທາດມັກມາໄດ້ໄຫລເຄື່ອນລົງເຂົ້າຍຶດຄຸມທະເລສາບຈົນເຮັດໃຫ້ມວນນໍ້າໃນທະເລສາບລະເຫີຍກາຍເປັນອາຍ ແລະ ເຮັດໃຫ້ທະເລສາບເຫືອດແຫ້ງຈົນຫມົດພາຍໃນເວລາບໍ່ຮອດຊົ່ວໂມງ. 
ສຳນັກງານດັບເພີງແຫ່ງລັດຮາວາຍ ໄດ້ຢືນຢັນກັບສຳນັກງານສຳຫລວດທໍລະນີວິທະຍາສາດສະຫະລັດ (USGS) ວ່າປະກົດການທາດມັກມາໄຫລລົງທະເລສາບກີນເລກ໌ (Green Lake) ເກີດຂື້ນເມື່ອເວລາ 10 ໂມງເຊົ້າ ແລະ ສີ້ນສຸດລົງເມື່ອເວລາ 15 ໂມງ, ມັກມາໄຫລລົງປົກຄຸມທົ່ວທະເລສາບ ແລະ ປັດຈຸບັນແມ່ນບໍ່ມີນໍ້າເຫລືອຢູ່ໃນທະເລອີກຕໍ່ໄປ.
CNN ລາຍງານນໍາວ່າ ທະເລສາບກີນເລກ໌ ເທີງເກາະໃຫຍ່ຂອງລັດຮາວາຍແຫ່ງນີ້ ເຄີຍເປັນທະເລສາບທີ່ຜູ້ຄົນນິຍົມມາລອຍນໍ້າ ໂດຍຈຸດເລິກສຸດຂອງທະເລສາບແມ່ນສາມາດວັດແທກໄດ້ປະມານ 200ຟຸດ ຫລື ປະມານ 60,96 ແມັດ.
ແຫລ່ງຂ່າວຕ່າງປະເທດ: TRN