ທ່ານຫົວໜ້າກົມກວດກາ ກະຊວງສຶກສາທິການ ແລະ ກິລາ ນາງ ຂັນທະລີ ສີຣິພົງພັນ ໃຫ້ຮູ້ວ່າ: ໃນຜ່ານມາການປອມ
ແປງໃບປະກາສະນິຍະບັດຈົບຊັ້ນມັດທະຍົມປາຍ ແມ່ນມີລັກສະນະແຜ່ຫລາຍ, ເຊິ່ງເກີດຂຶ້ນຍ້ອນແນວຄິດສວຍໂອ
ກາດ, ເຫັນແກ່ຕົວ ແລະ ບໍ່ເກງກົວຕໍ່ລະບຽບກົດໝາຍ, ຈາກສະພາບດັ່ງກ່າວ ກະຊວງສຶກສາທິການ ແລະ ກິລາໄດ້ຕັ້ງ
ໜ່ວຍສະເພາະກິດ ເພື່ອດຳເນີນການກວດກາ ນັບແຕ່ປີ 2011-2013 ຢູ່ມະຫາວິທະຍາໄລທັງພາກລັດ ແລະ ເອກະຊົນ
ໃນນະຄອນຫລວງວຽງຈັນ ຈຳນວນ 10 ແຫ່ງ, ໄດ້ກວດກາທັງໝົດ 1.700 ກວ່າໃບ ໃນນັ້ນພົບເຫັນປະກາສະນິຍະບັດ
ປອມເຖິງ 176 ໃບ ແລະ ສ່ວນຫລາຍພົບຢູ່ວິທະຍາໄລເອກະຊົນ ພ້ອມທັງດຳເນີນມາດຕະການເຂັ້ມງວດ ຕໍ່ຜູ້ລະເມີດ
ໂດຍໄດ້ສັ່ງໂຈະການຮຽນ ແລະ ອອກຄຳສັ່ງລຶບລ້າງປະກາສະນີຍະບັດດັ່ງກ່າວ.
ສຳລັບຜູ້ທີ່ສຳເລັດການສຶກສາໄປແລ້ວ ແມ່ນໃຫ້ປະຕິບັດຕາມຄຳແນະນຳຂອງຮອງນາຍົກລັດຖະມົນຕີ, ລັດຖະມົນຕີ
ວ່າການກະຊວງສຶກສາທິການ ແລະ ກິລາ ໂດຍໃຫ້ບັນດາກະຊວງ, ອົງການທຽບເທົ່າ, ແຂວງ, ນະຄອນຫລວງ, ອົງການ
ຈັດຕັ້ງຕ່າງໆ ແລະ ສະຖາບັນການສຶກສາທັງພາກລັດ ແລະ ເອກະຊົນໃນຂອບເຂດທົ່ວປະເທດ ກວດກາຄືນຫລັງພະນັກ
ງານທີ່ເຂົ້າສັງກັດອົງການຂອງຕົນນັບແຕ່ປີ 2006 ເປັນຕົ້ນມາ, ຖ້າຫາກມີກໍລະນີສົງໃສໃຫ້ພົວພັນກົມກວດກາ, ກົມ
ວິຊາການທີ່ກ່ຽວຂ້ອງ ຂອງກະຊວງສຶກສາທິການ ແລະ ກິລາ, ໂຮງຮຽນ ຫລື ສະຖາບັນການສຶກສາຕົ້ນສັງກັດຂອງຜູ້
ກ່ຽວ, ໃນກໍລະນີກວດພົບບຸກຄົນທີ່ໄດ້ປອມແປງເອກະສານຢັ້ງຢືນການສຶກສາ, ປະກາສະນີຍະບັດ ແລະ ວຸດທິການສຶກ
ສາ ແມ່ນໃຫ້ແຈ້ງເປັນທາງການ (ເປັນລາຍລັກອັກສອນ) ມາຍັງກະຊວງສຶກສາທິການ ແລະ ກິລາ ເພື່ອຈະໄດ້ປະກາດ
ລຶບລ້າງເອກະສານດັ່ງກ່າວ, ພ້ອມທັງປະຕິບັດວິໄນຕາມລະບຽບກົດໝາຍຢ່າງເຂັ້ມງວດ.
ສຳລັບຜູ້ທີ່ເປັນລັດຖະກອນທີ່ຖືປະກາສະນິຍະບັດປອມ ທາງກະຊວງສຶກສາທິການ ແລະ ກິລາ ແລະ ມະຫາວິທະຍາໄລ
ໄດ້ປະກາດລຶບລ້າງເອກະສານດັ່ງກ່າວ ແລະ ສະເໜີໃຫ້ເຈົ້າໜ້າທີ່ ແລະ ອົງການຈັດຕັ້ງທີ່ຜູ້ກ່ຽວສັງກັດຢູ່ ປະຕິບັດວິໄນ
ຕໍ່ຜູ້ກ່ຽວຕາມລະບຽບກົດໝາຍ.
ໃນໄລຍະຜ່ານມາ ທົ່ວຂະແໜງການສຶກສາ ແລະ ກິລາໄດ້ຕັ້ງໜ້າສະກັດກັ້ນ ແລະ ແກ້ໄຂປາກົດການຫຍໍ້ທໍ້ໃນການ
ປອມແປງເອກະສານຢັ້ງຢືນການຮຽນ, ປະກາສະນິຍະບັດ ແລະ ວຸດທິການສຶກສາດ້ວຍຄວາມຮັບຜິດຊອບສູງ, ແຕ່ສະ
ພາບຫຍໍ້ທໍ້ດັ່ງກ່າວຍັງສືບຕໍ່ແຜ່ລາມໃນຂອບເຂດທົ່ວປະເທດ ແລະ ມີທ່າອ່ຽງເພີ່ມຂຶ້ນເຊິ່ງເປັນການລະເມີດລະບຽບ
ກົດໝາຍ, ທັງສົ່ງຜົນກະທົບເຖິງຄຸນນະພາບຂອງການສຶກສາ, ການພັດທະນາຊັບ ພະຍາກອນມະນຸດ ແລະ ເສດຖະກິດ
ຂອງຊາດໃນປະຈຸບັນ ກໍຄືອະນາຄົດນຳອີກ.
ແຫູ່ງຂ່າວ: ລາວພັດທະນາ